ಲಂಡನ್: ಸದ್ಯಕ್ಕೆ ಪತ್ನಿ ಮಕ್ಕಳ ಜೊತೆ ಲಂಡನ್ ನಲ್ಲಿರುವ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಮತ್ತೊಮ್ಮೆ ಕೀರ್ತನೆ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದಾರೆ. ಆ ಮೂಲಕ ಕೊಹ್ಲಿ ತಮ್ಮ ಆಧ್ಯಾತ್ಮದ ಒಲವನ್ನು ಮತ್ತೊಮ್ಮೆ ಪ್ರದರ್ಶಿಸಿದ್ದಾರೆ.
ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ದಂಪತಿ ಕೃಷ್ಣದಾಸ್ ಅವರ ಕೀರ್ತನೆ ಕಾರ್ಯಕ್ರಮಗಳನ್ನು ತಪ್ಪದೇ ಅಟೆಂಡ್ ಮಾಡುತ್ತಾರೆ. ಕೆಲವು ದಿನಗಳ ಹಿಂದಷ್ಟೇ ಕೊಹ್ಲಿ ದಂಪತಿ ಲಂಡನ್ ನ ಯೂನಿಯನ್ ಚಾಪೆಲ್ ನಲ್ಲಿ ನಡೆದಿದ್ದ ಕೀರ್ತನ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು.
ಇದೀಗ ಮತ್ತೊಮ್ಮೆ ಕೃಷ್ಣ ದಾಸ್ ಅವರ ಕೀರ್ತನ ಕಾರ್ಯಕ್ರಮದಲ್ಲಿ ಭಾಗಿಯಾಗಿ ಎಲ್ಲರ ಗಮನ ಸೆಳೆದಿದ್ದಾರೆ. ಕೃಷ್ಣದಾಸ್ ಖ್ಯಾತ ಕೀರ್ತನಕಾರ. ಯೋಗ ಜೊತೆಗೆ ಕೀರ್ತನೆಗಳನ್ನು ಹಾಡುತ್ತಾ, ಭಾರತೀಯ ಸಾಂಪ್ರದಾಯಿಕ ಭಜನೆ ಹಾಡುಗಳನ್ನು ಪ್ರಚುರಪಡಿಸುವುದರಲ್ಲಿ ಅವರು ಖ್ಯಾತರಾಗಿದ್ದಾರೆ.
ಅವರ ಕಾರ್ಯಕ್ರಮಕ್ಕೆ ಸಾಕಷ್ಟು ಸಂಖ್ಯೆಯಲ್ಲಿ ಜನ ಬರುತ್ತಾರೆ. ಕೊಹ್ಲಿ ದಂಪತಿ ಈಗಾಗಲೇ ಹಲವು ಬಾರಿ ಕೃಷ್ಣದಾಸ್ ಅವರ ಕಾರ್ಯಕ್ರಮದಲ್ಲಿ ಭಾಗಿಯಾಗಿ ತಾವು ಅವರ ಅಭಿಮಾನಿಗಳು ಎಂದು ನಿರೂಪಿಸಿದ್ದಾರೆ. ಕೃಷ್ಣದಾಸ್ ಭಜನೆ ಕಾರ್ಯಕ್ರಮದಲ್ಲಿ ತನ್ಮಯರಾಗಿ ಕುಳಿತು ಕೊಹ್ಲಿ ದಂಪತಿ ತಾವೂ ಭಕ್ತಿಭಾವದಲ್ಲಿ ಮುಳುಗಿದ್ದಾರೆ. ಈ ಬಾರಿಯೂ ಅವರು ಕೀರ್ತನೆಯಲ್ಲಿ ಭಾಗಿಯಾದ ಫೋಟೋಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
