ಮುಂಬೈ: ದಕ್ಷಿಣ ಆಫ್ರಿಕಾ ವಿರುದ್ಧ ತವರಿನಲ್ಲಿ ಐತಿಹಾಸಿಕ ಟೆಸ್ಟ್ ಸರಣಿ ಸೋಲಿನ ಬಳಿಕ ಫ್ಯಾನ್ಸ್ ಟೀಂ ಇಂಡಿಯಾ ಕೋಚ್ ಗೌತಮ್ ಗಂಭೀರ್ ಮೇಲೆ ಸಿಟ್ಟಿಗೆದ್ದಿದ್ದಾರೆ. ಮೊದಲು ಗಂಭೀರ್ ತೊಲಗಬೇಕು ಎಂದಿದ್ದಾರೆ.
ಗೌತಮ್ ಗಂಭೀರ್ ಕೆಲವು ದಿನಗಳ ಹಿಂದೆ ನನ್ನ ತಂಡ ಒಂದೇ ದಿನದಲ್ಲಿ 400 ರನ್ ಚೇಸ್ ಮಾಡಲೂ ರೆಡಿ ಇರಬೇಕು, ಎರಡು ದಿನದಲ್ಲೇ ಟೆಸ್ಟ್ ಪಂದ್ಯ ಮುಗಿಸುವ ಸಾಮರ್ಥ್ಯವನ್ನೂ ಪಡೆಯಬೇಕು ಎಂದು ಹೇಳಿಕೊಂಡಿದ್ದರು. ಅವರ ಅದೇ ಹೇಳಿಕೆ ಇಟ್ಟುಕೊಂಡು ಈಗ ಅವರನ್ನು ಟ್ರೋಲ್ ಮಾಡಲಾಗುತ್ತಿದೆ.
ಏನೋ ಮಾಡುತ್ತೇನೆ ಎಂದು ಕೊಚ್ಚಿಕೊಂಡು ಟೀಂ ಇಂಡಿಯಾ ಕೋಚ್ ಆದ ಗೌತಮ್ ಗಂಭೀರ್ ಈಗ ಜಿಂಬಾಬ್ವೆ ತಂಡದ ರೇಂಜ್ ಗೆ ತಂದು ಬಿಟ್ಟರು ಎಂದು ಫ್ಯಾನ್ಸ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಮೊದಲೇ ರೋಹಿತ್, ಕೊಹ್ಲಿಯಂತಹ ದಿಗ್ಗಜರು ನಿವೃತ್ತಿಯಾಗಿ ಫ್ಯಾನ್ಸ್ ಪಂದ್ಯ ವೀಕ್ಷಿಸುವ ಆಸಕ್ತಿ ಕಳೆದುಕೊಂಡಿದ್ದಾರೆ. ಅಂತಹದ್ದರಲ್ಲಿ ತಂಡದ ಈ ಮಟ್ಟಿಗಿನ ಕಳಪೆ ಪ್ರದರ್ಶನ ಕ್ರಿಕೆಟ್ ಬಗ್ಗೆಯೇ ನಿರಾಸಕ್ತಿ ಮೂಡುವಂತೆ ಮಾಡುತ್ತಿದೆ.
ಕೆಲವರು ಈಗಾಗಲೇ ಸೋಷಿಯಲ್ ಮೀಡಿಯಾದಲ್ಲಿ ಗಂಭೀರ್ ರನ್ನು ಕಿತ್ತು ಹಾಕಬೇಕು ಎಂದು ಟ್ರೆಂಡ್ ಶುರು ಮಾಡಿದ್ದಾರೆ. ಇದು ಬಿಸಿಸಿಐ ಕಿವಿಗೆ ತಲುಪುವವರೆಗೂ ಇದನ್ನು ಶೇರ್ ಮಾಡೋಣ ಎಂದು ಕರೆ ಕೊಡುತ್ತಿದ್ದಾರೆ. ಆದರೆ ಸದ್ಯಕ್ಕೆ ಟಿ20 ವಿಶ್ವಕಪ್ ಗಮನದಲ್ಲಿಟ್ಟುಕೊಂಡು ಕೋಚ್ ಬದಲಾವಣೆ ಮಾಡುವ ಯಾವುದೇ ಸಾಧ್ಯತೆಯೂ ಇಲ್ಲ.
