ಬೆಂಗಳೂರು: ಅಂಬಿ ಮನೆಗೆ ಮತ್ತೆ ಅಂಬರೀಶ್ ಆಗಮನವಾಗಿದೆ. ಅಂಬರೀಶ್ ಪುತ್ರ ಅಭಿಷೇಕ್ ಅಂಬರೀಶ್ ಪತ್ನಿ ಅವಿವಾ ಬಿಡಪ್ಪಾ ಗಂಡು ಮಗುವಿಗೆ ಜನ್ಮವಿತ್ತಿದ್ದು, ಸುಮಲತಾ ಮಗುವಿನ ಜೊತೆಗಿರುವ ಫೋಟೋ ರಿವೀಲ್ ಆಗಿದೆ.
ರೆಬಲ್ ಸ್ಟಾರ್ ಅಂಬರೀಶ್ ಹೋದ ಮೇಲೆ ಅಂಬಿ ಮನೆಯಲ್ಲಿ ಶೂನ್ಯ ಆವರಿಸಿತ್ತು. ಅದನ್ನು ಈ ಮಗು ತುಂಬಲಿದೆ ಎಂದೇ ಕುಟುಂಬದವರು ಅಂದುಕೊಂಡಿದ್ದಾರೆ. ಇಂದು ಬೆಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಅವಿವಾ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ತಾಯಿ ಮತ್ತು ಮಗು ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ತಿಳಿದುಬಂದಿದೆ.
ಮಗುವಿನ ಜೊತೆ ಸುಮಲತಾ ಪೋಸ್ ನೀಡಿದ್ದಾರೆ. ಈ ಫೋಟೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಮಗುವಿನ ಫೋಟೋ ನೋಡಿದ ಅಭಿಮಾನಿಗಳು, ಮಗು ಥೇಟ್ ರೆಬಲ್ ಸ್ಟಾರ್ ಅಂಬರೀಶ್ ರನ್ನು ಹೋಲುತ್ತಿದೆ. ಮಂಡ್ಯದ ಗಂಡು ವಾಪಸ್ ಬಂದ್ರು ಎಂದು ಕಾಮೆಂಟ್ ಮಾಡುತ್ತಿದ್ದಾರೆ.
ಕೆಲವು ದಿನಗಳ ಹಿಂದಷ್ಟೇ ಅವಿವಾ ಸೀಮಂತ ಶಾಸ್ತ್ರವನ್ನು ಕುಟುಂಬಸ್ಥರು ಮತ್ತು ಆಪ್ತರ ಸಮ್ಮುಖದಲ್ಲಿ ನೆರವೇರಿಸಲಾಗಿತ್ತು. ತಮ್ಮ ದೊಡ್ಡ ಮಗ ಎಂದೇ ಕರೆಯುವ ದರ್ಶನ್ ಬಂಧನದಲ್ಲಿರುವುದರಿಂದ ಅಭಿಷೇಕ್ ಮತ್ತು ಸುಮಲತಾ ಸೀಮಂತವನ್ನೂ ಸರಳವಾಗಿ ನೆರವೇರಿಸಿದ್ದರು.
