ಮುಂಬೈ: ಟೀಂ ಇಂಡಿಯಾ ಯಂಗ್ ಸೆನ್ಸೇಷನ್ ಯಶಸ್ವಿ ಜೈಸ್ವಾಲ್ ಜೀವನ ಮುಂದಿನ ತಲೆಮಾರಿನವರಿಗೆ ಸ್ಪೂರ್ತಿದಾಯಕ ಕತೆಯಾಗಿರುತ್ತದೆ.
ಇಂಗ್ಲೆಂಡ್ ವಿರುದ್ಧ ಎರಡು ಟೆಸ್ಟ್ ಪಂದ್ಯಗಳಲ್ಲಿ ಜೈಸ್ವಾಲ್ ಸತತ ಎರಡು ದ್ವಿಶತಕ ಸಿಡಿಸಿ ಮಿಂಚಿದ್ದಾರೆ. ಅವರನ್ನು ಮಾಜಿ ಕ್ರಿಕೆಟಿಗರಾದ ಡಾನ್ ಬ್ರಾಡ್ಮನ್, ಸಚಿನ್ ತೆಂಡುಲ್ಕರ್ ಮುಂತಾದ ದಿಗ್ಗಜರಿಗೆ ಹೋಲಿಕೆ ಮಾಡುತ್ತಿದ್ದಾರೆ. ಜೈಸ್ವಾಲ್ ರ ಸದ್ಯದ ಆಟ ನೋಡುತ್ತಿದ್ದರೆ ಅವರು ಭವಿಷ್ಯದಲ್ಲಿ ಭಾರತದ ಮತ್ತೊಬ್ಬ ದಿಗ್ಗಜ ಆಟಗಾರನ ಸಾಲಿಗೆ ಸೇರ್ಪಡೆಯಾಗುವುದು ಖಚಿತ.
ಐಪಿಎಲ್ ನಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಪರ ಆಡುವ ಯಶಸ್ವಿ 4 ಕೋಟಿ ರೂ. ಸಂಭಾವನೆ ಪಡೆಯುತ್ತಿದ್ದಾರೆ. ತಮ್ಮ ವೃತ್ತಿ ಜೀವನದ ಆರಂಭದಲ್ಲಿ ಜೈಸ್ವಾಲ್ ಕ್ರಿಕೆಟ್ ಕಿಟ್ ತೆಗೆದುಕೊಳ್ಳಲೂ ಕಷ್ಟಪಟ್ಟಿದ್ದರು. ತಂದೆ ಪಾನಿಪೂರಿ ಮಾರುತ್ತಿದ್ದರೆ ಜೈಸ್ವಾಲ್ ಕೂಡಾ ಅವರಿಗೆ ಸಾಥ್ ನೀಡುತ್ತಿದ್ದರು. ಅವರು ಪಾನಿ ಹಾಕಿಕೊಡುತ್ತಿರುವ ವಿಡಿಯೋಗಳು ಈಗಲೂ ಸೋಷಿಯಲ್ ಮೀಡಿಯಾದಲ್ಲಿದೆ.
ತೀರಾ ಬಡತನದಿಂದ ಟೆಂಟ್ ನಲ್ಲಿ ವಾಸವಾಗಿದ್ದ ಜೈಸ್ವಾಲ್ ಇಂದು ಐದು ಬೆಡ್ ರೂಂಗಳ ಐಷಾರಾಮಿ ಮನೆಯ ಒಡೆಯ. ಕಳೆದ ವರ್ಷವಷ್ಟೇ ಜೈಸ್ವಾಲ್ ತಮ್ಮ ಸ್ವಂತ ಸಂಪಾದನೆಯಿಂದ ಮುಂಬೈನಲ್ಲಿ 15,000 ಚದರ ಅಡಿ ಇರುವ ಫರ್ನಿಶ್ ಆಗಿರುವ ಮನೆಯನ್ನು ಖರೀದಿಸಿದ್ದರು.
ಕ್ರಿಕೆಟ್ ನಲ್ಲಿ ಜನಪ್ರಿಯರಾದ ಮೇಲೆ ಜೈಸ್ವಾಲ್ ಗೆ ಬೂಸ್ಟ್, ಜೆಬಿಎಲ್ ಇಂಡಿಯಾ ಮುಂತಾದ ಪ್ರತಿಷ್ಠಿತ ಸಂಸ್ಥೆಗಳೊಂದಿಗೆ ಜಾಹೀರಾತು ಒಪ್ಪಂದ ಸಿಕ್ಕಿದೆ. ಹೀಗಾಗಿ ಜೈಸ್ವಾಲ್ ತಮ್ಮ ಕುಟುಂಬಸ್ಥರನ್ನು ತಮ್ಮ ಐಷಾರಾಮಿ ಫ್ಲ್ಯಾಟ್ ನಲ್ಲಿರಿಸಿ ಕೊಂಚವೂ ಕಷ್ಟ ಬಾರದಂತೆ ನೋಡಿಕೊಳ್ಳುತ್ತಿದ್ದಾರೆ. ಇದಲ್ಲವೇ ನಿಜವಾದ ಯಶಸ್ಸು.
