ಗೌತಮ್ ಗಂಭೀರ್, ರೋಹಿತ್ ಶರ್ಮಾ ವಿಚಾರಗಳನ್ನು ಮೀಡಿಯಾಗೆ ಬಿಟ್ಟ ಕ್ರಿಕೆಟಿಗ ಯಾರು ಎಂದು ಪತ್ತೆ

ಮುಂಬೈ: ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಮತ್ತು ಕೋಚ್ ಗೌತಮ್ ಗಂಭೀರ್ ನಡುವೆ ವಾಗ್ವಾದ ನಡೆದಿತ್ತು ಎಂದು ಸುದ್ದಿಯಾಗಿತ್ತು. ಈ ವಿಚಾರಗಳನ್ನು ಮಾಧ್ಯಮಗಳಿಗೆ ಬಿಟ್ಟುಕೊಟ್ಟಿದ್ದು ಯಾರು ಎಂದು ಈಗ ಬಹಿರಂಗವಾಗಿದೆ.

ಆಸ್ಟ್ರೇಲಿಯಾ ಪ್ರವಾಸದಲ್ಲಿ ಬ್ಯಾಟಿಗರ ವೈಫಲ್ಯದ ಬಗ್ಗೆ ಕೋಚ್ ಗಂಭೀರ್ ಕೆಂಡಾಮಂಡಲರಾಗಿದ್ದರು. ಅದರಲ್ಲೂ ಮೆಲ್ಬೊರ್ನ್ ಟೆಸ್ಟ್ ಸೋತ ಬಳಿಕ ಡ್ರೆಸ್ಸಿಂಗ್ ರೂಂನಲ್ಲಿ ಅವರು ನಾಯಕ ರೋಹಿತ್ ಸೇರಿದಂತೆ ಕ್ರಿಕೆಟಿಗರ ಜೊತೆ ಕೂಗಾಡಿದ್ದರು ಎಂದು ವರದಿಯಾಗಿತ್ತು.

ಹಾಗಿದ್ದರೆ ತಂಡದ ಆಂತರಿಕ ವಿಚಾರಗಳನ್ನು ಹೊರಗೆ ಬಿಟ್ಟುಕೊಟ್ಟಿದ್ದು ಯಾರು ಎಂದು ಎಲ್ಲರಿಗೂ ಅನುಮಾನ ಮೂಡಿತ್ತು. ಆದರೆ ಈಗ ಮಾಧ್ಯಮಗಳಿಗೆ ವಿಚಾರ ಸೋರಿಕೆ ಮಾಡಿದ ಕ್ರಿಕೆಟಿಗ ಯಾರು ಎಂದು ತಿಳಿದುಬಂದಿದೆ.

ಮೂಲಗಳ ಪ್ರಕಾರ ಕ್ರಿಕೆಟಿಗ ಸರ್ಫರಾಜ್ ಖಾನ್ ಈ ವಿಚಾರಗಳನ್ನು ಬಟಾಬಯಲು ಮಾಡಿದ್ದರು ಎನ್ನಲಾಗುತ್ತಿದೆ. ಖಾಸಗಿ ವಾಹಿನಿಯೊಂದು ಈ ವಿಚಾರವನ್ನು ವರದಿ ಮಾಡಿದೆ. ಆದರೆ ನಿಜವಾಗಿಯೂ ಸರ್ಫರಾಜ್ ಮೂಲಕವೇ ವಿವರಗಳು ಹೊರಗೆ ಬಂದಿದೆಯೇ ಎನ್ನುವುದು ಖಚಿತವಾಗಿಲ್ಲ.