ಡ್ರಾಮಾ ಮಾಡೋದು ಬಿಟ್ಟು ಆಡಿ, ಟೀಂ ಇಂಡಿಯಾ ಹಿರಿಯರಿಂದಾಗಿ ಕಿರಿಯರಿಗೆ ಬೈಗುಳ

ಬೆಂಗಳೂರು: ಡ್ರಾಮಾ ಮಾಡೋದು ಬಿಟ್ಟು ಚೆನ್ನಾಗಿ ಆಡಿ ಸಾಮರ್ಥ್ಯ ತೋರಿಸಿ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಟೀಂ ಇಂಡಿಯಾ ಕಿರಿಯ ಆಟಗಾರರಿಗೂ ಫ್ಯಾನ್ಸ್ ಕ್ಲಾಸ್ ತೆಗೆದುಕೊಂಡಿದ್ದಾರೆ.

ಇತ್ತೀಚೆಗಷ್ಟೇ ನ್ಯೂಜಿಲೆಂಡ್ ವಿರುದ್ಧ ರೋಹಿತ್ ಶರ್ಮಾ ನೇತೃತ್ವದ ಹಿರಿಯ ಕ್ರಿಕೆಟಿಗರ ತಂಡ ಟೆಸ್ಟ್ ಸರಣಿಯಲ್ಲಿ ಹೀನಾಯ ಸೋಲು ಕಂಡಿತ್ತು. ಇದೀಗ ಸೂರ್ಯಕುಮಾರ್ ಯಾದವ್ ನೇತೃತ್ವದ ಯುವ ಆಟಗಾರರ ಬಳಗ ದಕ್ಷಿಣ ಆಫ್ರಿಕಾದಲ್ಲಿ ಟಿ20 ಸರಣಿ ಆಡಲು ತೆರಳಿದೆ.

ಆಫ್ರಿಕಾಗೆ ತಲುಪಿದ ಟೀಂ ಇಂಡಿಯಾ ಆಟಗಾರರು ಪರಸ್ಪರ ರಸವತ್ತಾದ ಪ್ರಶ್ನೆಗಳನ್ನು ಕೇಳುತ್ತಾ ಮಜಾ ಮಾಡಿಕೊಂಡು ಪ್ರಯಾಣಿಸಿದ ವಿಡಿಯೋವನ್ನು ಬಿಸಿಸಿಐ ಪ್ರಕಟಿಸಿದೆ. ಆದರೆ ಇದು ಈಗಾಗಲೇ ಟೆಸ್ಟ್ ಸರಣಿ ಸೋಲಿನ ಬೇಸರದಲ್ಲಿರುವ ಅಭಿಮಾನಿಗಳ ಪಿತ್ತ ನೆತ್ತಿಗೇರಿಸಿದೆ.

ಹೀಗಾಗಿ ಈ ಶೋಕಿಗಳೆಲ್ಲಾ ಬಿಟ್ಟು ಆಟದ ಕಡೆಗೆ ಗಮನ ಕೊಡಿ. ಹಿರಿಯರಂತೂ ಸೋತು ಸುಣ್ಣವಾದರೂ. ನೀವಾದರೂ ಗೆದ್ದು ತಂಡದ ಮಾನ ಉಳಿಸಿ ಎಂದು ಹಲವರು ಕಾಮೆಂಟ್ ಮಾಡಿದ್ದಾರೆ. ಮತ್ತೆ ಕೆಲವರು ಬರೀ ಇಂಥದ್ದೇ ಡ್ರಾಮಾಗಳೇ ಆಯ್ತು, ಆಟದ ವಿಚಾರದಲ್ಲಿ ಸೊನ್ನೆ ಎಂದು ಜರೆದಿದ್ದಾರೆ. ಒಟ್ಟಿನಲ್ಲಿ ಹಿರಿಯರು ಮಾಡಿದ ತಪ್ಪನ್ನು ಕಿರಿಯರು ಅನುಭವಿಸುವಂತಾಗಿದೆ.