ಐಪಿಎಲ್ ಗೆ ಮೊದಲು ದೇವರ ದರ್ಶನ: ಪದ್ಧತಿ ಪಾಲಿಸಿದ ಧೋನಿ

Photo Courtesy: Twitter

ರಾಂಚಿ: ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಧೋನಿ ಪ್ರತೀ ಬಾರಿ ಐಪಿಎಲ್ ಗೆ ಮೊದಲು ದೇವಾಲಯಕ್ಕೆ ಭೇಟಿ ನೀಡಿ ಪೂಜೆ ಸಲ್ಲಿಸುತ್ತಾರೆ. ಅದನ್ನು ಈ ಬಾರಿಯೂ ಪಾಲಿಸಿದ್ದಾರೆ.

2024 ರ ಐಪಿಎಲ್ ಗೆ ಧೋನಿ ಇಂದಿನಿಂದ ಅಭ್ಯಾಸ ಆರಂಭಿಸಿದ್ದಾರೆ. ಅದಕ್ಕೆ ಮೊದಲು ಅವರು ರಾಂಚಿಯ ದಿಯೋರಿ ಮಾ ದೇವಾಲಯಕ್ಕೆ ಭೇಟಿ ನೀಡಿ ಪೂಜೆ ಸಲ್ಲಿಸಿದ್ದಾರೆ. ಪ್ರತೀ ಬಾರಿಯೂ ಐಪಿಎಲ್ ಗೆ ಮೊದಲು ಧೋನಿ ಇಲ್ಲಿಗೆ ಭೇಟಿ ನೀಡುತ್ತಾರೆ. ಧೋನಿ ಬಂದಿದ್ದು ನೋಡಿ ಖುಷಿಯಾದ ಅಭಿಮಾನಿಗಳು ಅವರಿಗೆ ಮುತ್ತಿಗೆ ಹಾಕಿ ಸೆಲ್ಫೀ ಪಡೆದುಕೊಂಡರು.  ಆದರೆ ಎಲ್ಲೂ ತಾಳ್ಮೆ ಕಳೆದುಕೊಳ್ಳದ ಧೋನಿ ಎಲ್ಲರೊಂದಿಗೇ ನಗು ನಗುತ್ತಾ ಸೆಲ್ಫೀಗೆ ಪೋಸ್ ಕೊಟ್ಟರು.

ಧೋನಿ ಐಪಿಎಲ್ ತಯಾರಿ ಶುರು
ಇನ್ನು ರಾಂಚಿಯಲ್ಲಿ ದೇವಾಲಯ ಸಂದರ್ಶನ ನಡೆದ ಬೆನ್ನಲ್ಲೇ ಧೋನಿ ಅಭ್ಯಾಸ ಶುರು ಮಾಡಿದ್ದಾರೆ. ರಾಂಚಿಯಲ್ಲಿ ಪ್ಯಾಡ್ ಕಟ್ಟಿಕೊಂಡು ಬ್ಯಾಟಿಂಗ್ ಅಭ್ಯಾಸ ನಡೆಸುತ್ತಿರುವ ವಿಡಿಯೋ, ಫೋಟೋಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಧೋನಿ ಅಭ್ಯಾಸಕ್ಕಿಳಿದಿದ್ದು ನೋಡಿ ಅಭಿಮಾನಿಗಳೂ ಖುಷಿಯಾಗಿದ್ದಾರೆ.

ಇದು ಧೋನಿಗೆ ಕೊನೆಯ ಐಪಿಎಲ್ ಎಂಬ ಮಾತು ಕೇಳಿಬರುತ್ತಿದೆ. ಆದರೆ ಈ ಬಗ್ಗೆ ಮಾತನಾಡಿರುವ ಚೆನ್ನೈ ತಂಡದ ಸಿಇಒ ವಿಶ್ವನಾಥನ್, ಇದನ್ನು ಧೋನಿಯೇ ನಿರ್ಧರಿಸುತ್ತಾರೆ ಎಂದಿದ್ದಾರೆ. ಕಳೆ ಬಾರಿಯೂ ಧೋನಿ ಐಪಿಎಲ್ ಆಡುವ ಮುನ್ನ ಇದೇ ಕೊನೆಯ ಐಪಿಎಲ್ ಇರಬಹುದು ಎಂದು ಎಲ್ಲರೂ ಅಂದುಕೊಂಡಿದ್ದರು. ಆದರೆ ಅವರು ನನ್ನ ದೇಹ ಸಹಕರಿಸಿದರೆ ಇನ್ನೊಂದು ವರ್ಷ ಐಪಿಎಲ್ ಆಡುವುದಾಗಿ ಹೇಳಿದ್ದರು. ಅದರಂತೆ ಈ ವರ್ಷ ಐಪಿಎಲ್ ಆಡುವುದು ಪಕ್ಕಾ ಆಗಿದೆ. ಆದರೆ ಇದೇ ಕೊನೆಯ ಐಪೆಲ್ ಇರಬಹುದೇ ಎನ್ನುವುದಕ್ಕೆ ಅವರೇ ಉತ್ತರ ನೀಡಬೇಕಿದೆ.