ದುಬೈ: ಏಷ್ಯಾ ಕಪ್ ಕ್ರಿಕೆಟ್ 2025 ರಲ್ಲಿ ಹೈಡ್ರಾಮಾ ಬಳಿಕ ಕೊನೆಗೂ ಪಾಕಿಸ್ತಾನ ತಂಡ ಯುಎಇ ವಿರುದ್ಧ ಪಂದ್ಯವಾಡಲು 1 ಗಂಟೆ ತಡವಾಗಿ ಮೈದಾನಕ್ಕೆ ಬಂದಿದೆ.
ಭಾರತದ ವಿರುದ್ಧದ ಪಂದ್ಯದಲ್ಲಿ ಕೈ ಕುಲುಕುವ ವಿಚಾರವಾಗಿ ನಡೆದ ವಿವಾದ ಪಾಕಿಸ್ತಾನ ತಂಡವನ್ನು ರೊಚ್ಚಿಗೇಳಿಸಿದೆ. ಮ್ಯಾಚ್ ರೆಫರಿ ಆಂಡಿ ಪೈಕ್ರಾಫ್ಟ್ ಅವರನ್ನು ವಜಾಗೊಳಿಸಬೇಕೆಂದು ಐಸಿಸಿ ಮುಂದೆ ಬೇಡಿಕೆಯಿಟ್ಟರೂ ಐಸಿಸಿ ಇದನ್ನು ತಿರಸ್ಕರಿಸಿತ್ತು.
ಹೀಗಾಗಿ ಇಂದಿನ ಪಂದ್ಯಕ್ಕೆ ನಿಗದಿತ ಸಮಯವಾದರೂ ಪಾಕ್ ತಂಡ ಬಂದಿರಲಿಲ್ಲ. ಹೀಗಾಗಿ ಕೂಟ ಬಹಿಷ್ಕರಿಸಲು ತೀರ್ಮಾನಿಸಿದೆಯೇ ಎಂಬ ಅನುಮಾನ ಮೂಡಿತ್ತು. ಈ ಬಗ್ಗೆ ತೀರ್ಮಾನಿಸಲು 1 ಗಂಟೆ ಕಾಲಾವಕಾಶವನ್ನು ಪಾಕಿಸ್ತಾನ್ ಕೇಳಿತ್ತು ಎನ್ನಲಾಗಿದೆ.
ಹೀಗಾಗಿ ನಿಗದಿತ ಸಮಯಕ್ಕೆ ಪಂದ್ಯ ಶುರುವಾಗಿಲ್ಲ. ಈಗಷ್ಟೇ ಪಾಕಿಸ್ತಾನ ತಂಡದ ಬಸ್ ಮೈದಾನದತ್ತ ಬಂದಿದೆ. ಹೀಗಾಗಿ ಪಂದ್ಯ ತಡವಾಗಿ ಆರಂಭವಾಗಲಿದೆ. ಐಸಿಸಿ ಮತ್ತು ಪಿಸಿಬಿ ಮ್ಯಾಚ್ ರೆಫರಿ ಬಗ್ಗೆ ತುರ್ತು ಸಭೆ ನಡೆಸಿದ ಬಳಿಕ ಪಾಕ್ ಪಂದ್ಯವಾಡಲು ಒಪ್ಪಿಕೊಂಡಿದೆ ಎನ್ನಲಾಗಿದೆ.
