ಮುಂಬೈ: ಅಮಿತಾಭ್ ಬಚ್ಚನ್ ಪತ್ನಿ, ನಟಿ ಜಯಾ ಬಚ್ಚನ್ ಆಗಾಗ ಪಪ್ಪಾರಾಜಿಗಳೊಂದಿಗಿನ ಕಿತ್ತಾಟದಿಂದ ಸುದ್ದಿಯಾಗುತ್ತಲೇ ಇರುತ್ತಾರೆ.
ಇದೀಗ ಪಪ್ಪಾರಾಜಿಗಳ ಮುಂದೆ ಗತ್ತು ತೋರಿಸಲು ಹೋಗಿ ಜಯಾ ಇನ್ನಿಲ್ಲದಂತೆ ಸೋಷಿಯಲ್ ಮೀಡಿಯಾದಲ್ಲಿ ಟ್ರೋಲ್ ಆಗುತ್ತಿದ್ದಾರೆ. ನಯವಂತಿಕೆ ಏನು ಎಂದು ರೇಖಾ ಅವರನ್ನು ನೋಡಿ ಕಲಿಯಿರಿ ಎಂದು ನೆಟ್ಟಿಗರು ಕ್ಲಾಸ್ ತೆಗೆದುಕೊಂಡಿದ್ದಾರೆ.
ಇದು ನಡೆದಿರುವುದು ಅಮೀರ್ ಖಾನ್ ಪುತ್ರಿ ಇರಾ ಖಾನ್ ವಿವಾಹ ಆರತಕ್ಷತೆಯಲ್ಲಿ. ಬಾಲಿವುಡ್ ಸ್ನೇಹಿತರಿಗಾಗಿ ಅಮೀರ್ ಕುಟುಂಬ ಅದ್ಧೂರಿ ರಿಸೆಪ್ಷನ್ ಏರ್ಪಡಿಸಿತ್ತು. ಈ ಕಾರ್ಯಕ್ರಮಕ್ಕೆ ಪುತ್ರಿ ಶ್ವೇತಾ ಜೊತೆ ಜಯಾ ಬಂದಿದ್ದರು. ಜಯಾರನ್ನು ನೋಡಿದ ಪಪ್ಪಾರಾಜಿಗಳು ಫೋಟೋಗೆ ಪೋಸ್ ಕೊಡಲು ಹೇಳಿದ್ದಾರೆ.
ತಮಗೆ ಬೇಕಾದ ಆಂಗಲ್ ನಲ್ಲಿ ನಿಲ್ಲಲು ಕ್ಯಾಮರಾ ಮ್ಯಾನ್ ಗಳು ಹೇಳುವುದು ಸಾಮಾನ್ಯ. ಅದರಂತೆ ಪಪ್ಪಾರಾಜಿಗಳು ಪೋಸ್ ಕೊಡಲು ನಿರ್ದೇಶನ ನೀಡಿದಾಗ ಜಯಾ ‘ನನಗೇ ಪೋಸ್ ಕೊಡಲು ಕಲಿಸುತ್ತಿದ್ದಾರೆ’ ಎಂದು ಗತ್ತು ತೋರಿದ್ದಾರೆ. ಬಳಿಕ ಜೊತೆಗಿದ್ದ ಶ್ವೇತಾ, ಸೊನಾಲಿ ಬೇಂದ್ರೆ ಪೋಸ್ ಕೊಡುತ್ತಿದ್ದರೆ ಜಯಾ ದೌಲತ್ತು ತೋರಿ ಮುನ್ನಡೆದಿದ್ದಾರೆ. ಇದನ್ನು ನೋಡಿದ ನೆಟ್ಟಿಗರು ಇಷ್ಟೊಂದು ಅಹಂಕಾರ ಒಳ್ಳೆಯದಲ್ಲ ಎಂದಿದ್ದಾರೆ.
