ಬೆಂಗಳೂರು: ಬಿಗ್ ಬಾಸ್ ಕನ್ನಡ ಏಳನೇ ಆವೃತ್ತಿಯಲ್ಲಿ ವಿಜೇತರಾಗಿ 60 ಲಕ್ಷ ರೂ. ಬಹುಮಾನ ಮೊತ್ತ ಗೆದ್ದರೂ ಶೈನ್ ಶೆಟ್ಟಿ ತಮ್ಮ ಮೂಲ ವೃತ್ತಿಯನ್ನು ಮರೆತಿಲ್ಲ.
ಬಿಗ್ ಬಾಸ್ ಗೆ ಬರುವ ಮೊದಲು ನಟ ಶೈನ್ ಜೀವನೋಪಾಯಕ್ಕಾಗಿ ಗಲ್ಲಿ ಕಿಚನ್ ಎಂಬ ಹೋಟೆಲ್ ಆರಂಭಿಸಿದ್ದರು. ಶೈನ್ ಬಿಗ್ ಬಾಸ್ ಗೆ ಹೋದ ಮೇಲೆ ಅವರ ಹೋಟೆಲ್ ಮತ್ತಷ್ಟು ಜನಪ್ರಿಯವಾಗಿತ್ತು.
ಇದೀಗ ಬಿಗ್ ಬಾಸ್ ವಿಜೇತರಾದ ಮರುದಿನವೇ ತಮ್ಮ ಗಲ್ಲಿ ಕಿಚನ್ ಗೆ ಬಂದ ಶೈನ್ ಅಭಿಮಾನಿಗಳೊಂದಿಗೆ ಬೆರೆತಿದ್ದಾರೆ. ಈ ಮೊದಲಿನಂತೇ ಹೋಟೆಲ್ ನಲ್ಲಿ ತಿಂಡಿ ಪೂರೈಸುವ ಕೆಲಸ ಮಾಡಿದರೂ ಈ ಬಾರಿ ಅಭಿಮಾನಿಗಳು ಅವರನ್ನು ಸೆಲ್ಫೀಗಾಗಿ ಮುಗಿಬಿದ್ದಿದ್ದಾರೆ. ತಮ್ಮನ್ನು ನೋಡಲು ಬಂದ ಅಭಿಮಾನಿಗಳನ್ನು ಕಂಡು ಮೂಕವಿಸ್ಮಿತರಾದ ಶೈನ್ ಎಲ್ಲರಿಗೂ ಧನ್ಯವಾದ ಸಲ್ಲಿಸಿದ್ದಾರೆ.
ಮಸಾಲೆ ದೋಸೆ ಸವಿದ ವಾಸುಕಿ: ಇನ್ನು, ಸ್ಪರ್ಧೆಯಲ್ಲಿ ಮತ್ತೊಬ್ಬ ಫೈನಲಿಸ್ಟ್ ಆಗಿದ್ದ ವಾಸುಕಿ ವೈಭವ್ ಮನೆಯಲ್ಲಿ ಗೆಳೆಯರ ಜತೆ ಪಾರ್ಟಿ ಮಾಡಿದ್ದಾರೆ. ಅಲ್ಲದೆ, ತಾವು ಬಹು ದಿನಗಳಿಂದ ಮಿಸ್ ಮಾಡಿಕೊಳ್ಳುತ್ತಿದ್ದ ವಿದ್ಯಾರ್ಥಿ ಭವನ ಮಸಾಲೆ ದೋಸೆ ಸವಿದು ಮನೆಗೆ ಬಂದ ಖುಷಿ ಆಚರಿಸಿಕೊಂಡಿದ್ದಾರೆ.
