ಬೆಂಗಳೂರು: ಕನ್ನಡದಲ್ಲಿ ಗತಿಸಿ ಹೋದ ನಟರ ಪೈಕಿ ಛೇ ಅವರು ಒಮ್ಮೆ ನಮ್ಮ ಕಣ್ಣ ಮುಂದೆ ಬರಬೇಕಿತ್ತು ಎಂದು ಅಭಿಮಾನಿಗಳು ಅಂದುಕೊಳ್ಳುವ ಏಕೈಕ ನಟ ಎಂದರೆ ಪುನೀತ್ ರಾಜ್ ಕುಮಾರ್ ಇರಬಹುದು. ಅಭಿಮಾನಿಗಳ ಪ್ರೀತಿಯ ಅಪ್ಪು ಈಗ ರಿಯಾಲಿಟಿ ಶೋ ಮೂಲಕ ಬರುತ್ತಿದ್ದಾರೆ.
ಜೀ ಕನ್ನಡದಲ್ಲಿ ಪ್ರಸಾರವಾಗುವ ಕಾಮಿಡಿ ಕಿಲಾಡಿಗಳು ಪ್ರೀಮಿಯರ್ ಲೀಗ್ ಮತ್ತು ಮಹಾನಟಿ ಸಂಗಮದಲ್ಲಿ ಈ ಬಾರಿ ಪುನೀತ್ ರಾಜ್ ಕುಮಾರ್ ಅವರ ಪಾತ್ರವನ್ನು ಕರೆತರಲಾಗಿದೆ. ಸ್ಕಿಟ್ ಒಂದರಲ್ಲಿ ಟೈಮ್ ಮಿಷನ್ ಹಿಂದೆ ಮಾಡಿ ಸ್ಪರ್ಧಿ ಪುನೀತ್ ರಾಜ್ ಕುಮಾರ್ ಅವರನ್ನು ಕರೆತರುವಂತೆ ಸನ್ನಿವೇಶವೊಂದನ್ನು ಸೃಷ್ಟಿಸಲಾಗಿದೆ.
ಈ ವೇಳೆ ಥೇಟ್ ಪುನೀತ್ ಪಾತ್ರಧಾರಿ ವೇದಿಕೆ ಎಂಟ್ರಿ ಕೊಡುತ್ತಾರೆ. ಥೇಟ್ ಪುನೀತ್ ನಂತೇ ಹಾವಭಾವ, ಫೇಸ್ ಕಟ್, ಧ್ವನಿ ಮಾಡಿಕೊಂಡು ವೇದಿಕೆಗೆ ಬಂದಾಗ ಸೆಟ್ ನಲ್ಲಿದ್ದವರೆಲ್ಲರೂ ಕಣ್ಣೀರಾಗುತ್ತಾರೆ. ಆಂಕರ್ ಅನುಶ್ರೀಯಂತೂ ಕಣ್ಣೀರು ಹಾಕುತ್ತಲೇ ಇಡೀ ಶೋ ವೀಕ್ಷಿಸಿದ್ದಾರೆ.
ಇನ್ನು, ಪುನೀತ್ ರನ್ನೇ ಹೋಲುವ ವ್ಯಕ್ತಿಯ ಪ್ರೋಮೋವನ್ನು ವಾಹಿನಿ ಪ್ರಸಾರ ಮಾಡಿದ್ದು ಇದನ್ನು ನೋಡಿದ ನೆಟ್ಟಿಗರೂ ಭಾವುಕರಾಗಿದ್ದಾರೆ. ನಿಜವಾಗಿಯೂ ಈ ರೀತಿ ನಡೆದು ಒಮ್ಮೆ ಪುನೀತ್ ನಮ್ಮ ಎದುರು ಬಂದಿದ್ದರೆ ಎಷ್ಟು ಚೆನ್ನಾಗಿರುತ್ತಿತ್ತು ಎಂದು ಆಸೆಪಟ್ಟಿದ್ದಾರೆ. ಬಳಿಕ ಪುನೀತ್ ರಂತೇ ನೃತ್ಯ ಮಾಡಿ ಅಲ್ಲಿದ್ದವರನ್ನು ರಂಜಿಸಿದ್ದಾರೆ.
