ಟೋಕಿಯೋ: ಇಬ್ಬರು ಮದಗಜಗಳ ಹೋರಾಟವೆಂದರೆ ಸುಮ್ನೇನಾ? ಕ್ರೀಡಾ ಲೋಕದಲ್ಲೂ ಇಂತಹ ಸಮಬಲರ ಹೋರಾಟದ ಕೌತುಕಕ್ಕೆ ಅನೇಕ ಬಾರಿ ಸಾಕ್ಷಿಯಾಗಿದ್ದೇವೆ. ಇದೀಗ ಪಿ.ವಿ. ಸಿಂಧು-ಯಮಗುಚಿ ನಡುವಿನ ಕಾದಾಟದಲ್ಲೂ ಅಷ್ಟೇ ರೋಚಕತೆ ಇತ್ತು.
ಮೊದಲಿನ ಸೆಟ್ ನಲ್ಲಿ ಇಬ್ಬರೂ ಅಂಕ ಪಡೆಯಲು ಹೋರಾಟ ನಡೆಸಿದರೂ ಸಿಂಧು ತಮ್ಮ ಆಕ್ರಮಣಕಾರಿ ಮನೋಭಾವ ಪ್ರದರ್ಶಿಸಿ ಮೇಲುಗೈ ಸಾಧಿಸಿದರು. ಆದರೆ ಎರಡನೇ ಸೆಟ್ ಅಷ್ಟು ಸುಲಭದ್ದಾಗಿರಲಿಲ್ಲ. ಅದರಲ್ಲೂ ಸ್ಕೋರ್ 10 ರ ಮೇಲೆ ತಲುಪಿದ ಮೇಲೆ ಇಬ್ಬರೂ ಜಿದ್ದಿಗೆ ಬಿದ್ದವರಂತೆ ಆಡಿದರು.
ಆದರೆ ನಡು ನಡುವೆ ಯಮಗುಚಿ ಒತ್ತಡ ನಿಭಾಯಿಸಲು ಸೋತಿದ್ದು ಸ್ಪಷ್ಟವಾಗಿತ್ತು. ಆಕೆ ಈ ಒತ್ತಡ ನಿಭಾಯಿಸಲಾಗದೇ ಕೆಲವೊಂದು ತಪ್ಪು ಮಾಡಿದರೆ ಸಿಂಧು ಒತ್ತಡವನ್ನು ಕೂಲ್ ಆಗಿ ಕೊನೆಯವರೆಗೂ ನಿಭಾಯಿಸಿದ್ದೇ ಆಕೆಯ ಗೆಲುವಿಗೆ ಕಾರಣವಾಯಿತು.
ಈ ಬಾರಿ ಒಲಿಂಪಿಕ್ಸ್ ಗಾಗಿ ಸಿಂಧು ಭರ್ಜರಿ ತಯಾರಿಯನ್ನೇ ಮಾಡಿದ್ದರು. ಲಂಡನ್ ಗೆ ತೆರಳಿ ವಿಶೇಷವಾಗಿ ಮಾನಸಿಕವಾಗಿ ಫಿಟ್ ಆಗಿರಲು ತರಬೇತಿ ಪಡೆದಿದ್ದರು. ಅದೆಲ್ಲದರ ಫಲ ಅವರಿಗೆ ಇಂದಿನ ಪಂದ್ಯದಲ್ಲಿ ಕೈ ಹಿಡಿಯಿತು. ಸಿಂಧು ಇಂದು ಆಡಿದ ರೀತಿ ಆಕೆ 2019 ರಲ್ಲಿ ವಿಶ್ವ ಚಾಂಪಿಯನ್ ಶಿಪ್ ಚಿನ್ನದ ಪದಕ ಗೆಲ್ಲುವಾಗ ಇದ್ದ ಅದೇ ಛಾಯೆ ಕಂಡುಬಂತು. ಇದೇ ಫಾರ್ಮ್ ಮುಂದುವರಿಸಿದರೆ ಆಕೆ ಸತತ ಎರಡನೇ ಬಾರಿಗೆ ಒಲಿಂಪಿಕ್ಸ್ ನಲ್ಲಿ ಬೆಳ್ಳಿ ಅಥವಾ ಚಿನ್ನದ ಪದಕ ಗೆಲ್ಲುವುದನ್ನು ಯಾರಿಂದಲೂ ತಪ್ಪಿಸಲಾಗದು.
