ಕಾಮನ್ ವೆಲ್ತ್ ಗೇಮ್ಸ್ ನಲ್ಲಿಂದು ಭಾರತಕ್ಕೆ 8 ಚಿನ್ನ ಗೆಲ್ಲುವ ಅವಕಾಶ!

ಬರ್ಮಿಂಗ್ ಹ್ಯಾಮ್: ಕಾಮನ್ ವೆಲ್ತ್ ಗೇಮ್ಸ್ ನಲ್ಲಿ ಭಾರತ ಇಂದು ಭರ್ಜರಿ ಚಿನ್ನ ಬೇಟೆಯಾಡುವ ಅವಕಾಶ ಹೊಂದಿದೆ.

ಕ್ರಿಕೆಟ್: ಭಾರತ ಮಹಿಳಾ ಕ್ರಿಕೆಟ್ ತಂಡ ಫೈನಲ್ಸ್ ನಲ್ಲಿ ಇಂದು ಆಸ್ಟ್ರೇಲಿಯಾ ವಿರುದ್ಧ ಆಡಲಿದ್ದು, ಈ ಪಂದ್ಯದಲ್ಲಿ ಗೆದ್ದರೆ ಭಾರತಕ್ಕೆ ಚಿನ್ನದ ಪದಕ ಗ್ಯಾರಂಟಿ. ಈ ಪಂದ್ಯ ರಾತ್ರಿ 9.30 ಕ್ಕೆ ನಡೆಯಲಿದೆ.

ಟೇಬಲ್ ಟೆನಿಸ್: ಪುರುಷರ ಡಬಲ್ಸ್ ವಿಭಾಗದಲ್ಲಿ ಶರತ್ ಕಮಲ್-ಜ್ಞಾನಶೇಖರನ್ ಜೋಡಿ ಫೈನಲ್ಸ್ ಆಡಲಿದ್ದು, ಈ ಪಂದ್ಯ ಸಂಜೆ 6.15 ಕ್ಕೆ ನಡೆಯಲಿದೆ. ಶರತ್ ಕಮಲ್ ಮತ್ತು ಶ್ರೀಜಾ ಅಕುಲಾ ಜೋಡಿ ಮಿಕ್ಸೆಡ್ ಡಬಲ್ಸ್ ಹಂತಕ್ಕೆ ಏರಿದ್ದು, ಈ ಪಂದ್ಯ ಮಧ್ಯರಾತ್ರಿ 12.15 ಕ್ಕೆ ನಡೆಯಲಿದೆ.

ಬಾಕ್ಸಿಂಗ್: ಬಾಕ್ಸಿಂಗ್ ನಲ್ಲಿ ಭಾರತದ ಭರವಸೆಯ ತಾರೆ ಅಮಿತ್ ಪಂಘಲ್ ಇಂದು ಫೈನಲ್ ಕದನಕ್ಕಿಳಿಯಲಿದ್ದಾರೆ. ಈ ಪಂದ್ಯ ಅಪರಾಹ್ನ 3.15 ಕ್ಕೆ ನಡೆಯಲಿದೆ. ಸಂಜೆ 7.00 ಗಂಟೆಗೆ ನಡೆಯಲಿರುವ ಪಂದ್ಯದಲ್ಲಿ ನಿಖತ್ ಝರೀನ್ ಫೈನಲ್ಸ್ ಆಡಲಿದ್ದಾರೆ.
ಅಥ್ಲೆಟಿಕ್ಸ್: ಟ್ರಿಪಲ್ ಜಂಪ್ ವಿಭಾಗದಲ್ಲಿ ಭಾರತದ ಪ್ರವೀಣ್,ಅಬ್ದುಲ್ಲಾ, ಎಲ್ಡ್ ಹೋಸ್ ಫೈನಲ್ ಸುತ್ತಿನಲ್ಲಿದ್ದಾರೆ. ಈ ಹಣಾಹಣಿ ಮಧ‍್ಯಾಹ್ನ 2.20 ಕ್ಕೆ ನಡೆಯುವುದು. ಭಾರತ ಮಹಿಳಾ ರಿಲೇ ತಂಡ ಇಂದು ಫೈನಲ್ಸ್ ಆಡಲಿದ್ದು, ಈ ಪಂದ್ಯ ಸಂಜೆ 5.24 ಕ್ಕೆ ನಡೆಯುವುದು. ಪುರುಷರ ರಿಲೇ ತಂಡವೂ ಫೈನಲ್ ಆಡಲಿದ್ದು ಈ ಪಂದ್ಯ ಮಧ್ಯರಾತ್ರಿ 1.00 ಗಂಟೆಗೆ ನಡೆಯುವುದು.

ಇದಲ್ಲದೆ, ಭಾರತದ ಬ್ಯಾಡ್ಮಿಂಟನ್ ತಾರೆ ಪಿ.ವಿ. ಸಿಂಧು, ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಕಿಡಂಬಿ ಶ್ರೀಕಾಂತ್ ಇಂದು ಸೆಮಿಫೈನಲ್ ಪಂದ್ಯವಾಡಲಿದ್ದಾರೆ. ಇದಲ್ಲದೆ ಭಾರತ ಮಹಿಳಾ ಹಾಕಿ ತಂಡ ಕಂಚಿನ ಪದಕಕ್ಕಾಗಿ ಮಧ್ಯಾಹ್ನ 1.30 ಕ್ಕೆ ಕಣಕ್ಕಿಳಿಯಲಿದೆ.