ನವದೆಹಲಿ: ಕುಸ್ತಿ ಫೆಡರೇಷನ್ ಮಾಜಿ ಮುಖ್ಯಸ್ಥ ಬ್ರಿಜ್ ಭೂಷಣ್ ಸಿಂಗ್ ವಿರುದ್ಧ ಮತ್ತೊಮ್ಮೆ ಕುಸ್ತಿಪಟು ಸಾಕ್ಷಿ ಮಲಿಕ್ ಗಂಭೀರ ಆರೋಪ ಮಾಡಿದ್ದಾರೆ. ಈ ಹಿಂದೆ ಹೋಟೆಲ್ ಕೊಠಡಿಯೊಂದರಲ್ಲಿ ಬ್ರಿಜ್ ತನ್ನೊಂದಿಗೆ ನಡೆದುಕೊಂಡಿರುವ ಘಟನೆಯನ್ನು ಸಂದರ್ಶನವೊಂದರಲ್ಲಿ ವಿವರಿಸಿದ್ದಾರೆ. 2012 ರಲ್ಲಿ ಅಲ್ಮಾಟಿಯಲ್ಲಿ ನಡೆದ ಏಷ್ಯನ್ ಜ್ಯೂನಿಯರ್ ಚಾಂಪಿಯನ್ ಶಿಪ್ ವೇಳೆ ಆಗ ಕುಸ್ತಿ ಫೆಡರೇಷನ್ ಮುಖ್ಯಸ್ಥರಾಗಿದ್ದ ಬ್ರಿಜ್ ಲೈಂಗಿಕವಾಗಿ ಬಳಸಿಕೊಳ್ಳಲು ಪ್ರಯತ್ನಿಸಿದರು ಎಂದಿದ್ದಾರೆ. ಹೋಟೆಲ್ ಕೊಠಡಿಯಲ್ಲಿ ಘಟನೆ ನಡೆದಿತ್ತು ಎಂದು ಸಾಕ್ಷಿ ಮಲಿಕ್ ವಿವರಿಸಿದ್ದಾರೆ.
ಪೋಷಕರೊಂದಿಗೆ ಮಾತನಾಡಲು ಬ್ರಿಜ್ ನನ್ನನ್ನು ಹೋಟೆಲ್ ಕೊಠಡಿಯೊಳಗೆ ಕಳುಹಿಸಿದ್ದರು. ನಾನು ಪೋಷಕರೊಂದಿಗೆ ಮಾತನಾಡಿ ಕರೆ ಕಟ್ ಮಾಡಿದ ಬಳಿಕ ನನಗೆ ಕಿರುಕುಳ ನೀಡಲು ಪ್ರಾರಂಭಿಸಿದರು. ನಾನು ಅವರ ಹಾಸಿಗೆ ಮೇಲೆ ಕೂತಿದ್ದೆ. ನನ್ನನ್ನು ಅವರು ಲೈಂಗಿಕವಾಗಿ ಬಳಸಿಕೊಳ್ಳಲು ಪ್ರಯತ್ನಿಸಿದರು. ಆದರೆ ಅವರನ್ನು ತಳ್ಳಿ ನಾನು ಅಳಲು ಆರಂಭಿಸಿದೆ. ಯಾವಾಗ ನನ್ನಿಂದ ಅವರಿಗೆ ಬೇಕಾಗಿದ್ದು ಸಿಗಲ್ಲ ಎನಿಸಿತೋ ಆ ಬಳಿಕ ಅವರು ದೂರ ಸರಿದರು. ಬಳಿಕ ನಾನು ಅಲ್ಲಿಂದ ಹೊರಬಂದು ನನ್ನ ಕೊಠಡಿ ಸೇರಿಕೊಂಡೆ ಎಂದು ಸಾಕ್ಷಿ ಮಲಿಕ್ ಹೇಳಿದ್ದಾರೆ.
ಇನ್ನು, ತಮ್ಮ ಜೀವನದಲ್ಲಿ ಇದೇ ರೀತಿ ಚಿಕ್ಕವಳಿದ್ದಾಗ ಟ್ಯೂಷನ್ ಶಿಕ್ಷಕರಿಂದಲೂ ಇದೇ ರೀತಿ ಲೈಂಗಿಕ ಕಿರುಕುಳವಾಗಿತ್ತು ಎಂದು ಆರೋಪಿಸಿದ್ದಾರೆ. ಆದರೆ ಇಂತಹ ಅನುಭವಗಳಾಗಿದ್ದರೂ ನನ್ನ ಪೋಷಕರು ನನಗೆ ಬೆಂಬಲವಾಗಿ ನಿಂತರು ಎಂದು ಸ್ಮರಿಸಿಕೊಂಡಿದ್ದಾರೆ.
