ಸಮೋಸಗಾಗಿ ರೈಲು ನಿಲ್ಲಿಸಲಿಲ್ಲ: ರೈಲ್ವೇ ಇಲಾಖೆಯಿಂದ ಸ್ಪಷ್ಟನೆ

ಇಂದೋರ್: ಇಂದೋರ್‌ನ ರಾವು ಸಿಗ್ನಲ್ ಬಳಿ ಗೂಡ್ಸ್ ರೈಲನ್ನು ನಿಲ್ಲಿಸಿ, ಸಮೋಸಾ/ತಿಂಡಿ ತರಲು ಹೋಗಿದ್ದ ಲೋಕೋ ಪೈಲಟ್‌ಗಳ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿತ್ತು. ಆದರೆ, ಈ ಘಟನೆಗೆ ಸಂಬಂಧಿಸಿದಂತೆ ಸತ್ಯಾಸತ್ಯತೆ ಬಹಿರಂಗವಾಗಿದ್ದು, ಚಾಲಕರು ತಿಂಡಿ ಖರೀದಿಸಲು ರೈಲನ್ನು ನಿಲ್ಲಿಸಿರಲಿಲ್ಲ ಎಂಬ ಸ್ಪಷ್ಟನೆ ಸಿಕ್ಕಿದೆ.

ವಾಸ್ತವದಲ್ಲಿ ನಡೆದಿದ್ದೇನು?

ವರದಿಗಳ ಪ್ರಕಾರ, 'ಕಾನ್ಕೋರ್ ಗ್ರೀನ್ ಫೀಲ್ಡ್ ಪ್ರೈವೇಟ್ ಟರ್ಮಿನಸ್'ಗೆ ಸೇರಿದ ಗೂಡ್ಸ್ ರೈಲು (ಇಂಜಿನ್ ಸಂಖ್ಯೆ: 27237 ಮತ್ತು 27600) ರಾವು ಯಾರ್ಡ್‌ನಲ್ಲಿ ನಿಗದಿತ ಇಂಜಿನಿಯರಿಂಗ್ ಕಾಮಗಾರಿ ನಡೆಯುತ್ತಿದ್ದ ಕಾರಣದಿಂದಾಗಿ ನಿಯಮಾನುಸಾರವೇ ರಾವು ಹೋಮ್ ಸಿಗ್ನಲ್ ಬಳಿ ರೈಲನ್ನು ನಿಲ್ಲಿಸಲಾಗಿತ್ತು.

ಚಾಲಕರು ತಿಂಡಿ ಅಥವಾ ಸಮೋಸಾ ಖರೀದಿಸಲು ರೈಲನ್ನು ಎಲ್ಲಂದರಲ್ಲಿ ನಿಲ್ಲಿಸಿರಲಿಲ್ಲ. ಅಧಿಕೃತ ಇಂಜಿನಿಯರಿಂಗ್ ಕಾಮಗಾರಿಯ ಹಿನ್ನೆಲೆಯಲ್ಲಿ ಸಿಗ್ನಲ್ ಸಿಗದೆ ರೈಲು ಸ್ಥಗಿತಗೊಂಡಿತ್ತು.

ವದಂತಿ ಮತ್ತು ತಪ್ಪಾಗಿ ಬಿಂಬಿಸಿದ ವಿಡಿಯೋ

ರೈಲು ಅಧಿಕೃತವಾಗಿ ಸಿಗ್ನಲ್‌ನಲ್ಲಿ ಕಾಯುತ್ತಿದ್ದ ಆ ಸಮಯವನ್ನು ಬಳಸಿಕೊಂಡು, ಸಹಾಯಕ ಲೋಕೋ ಪೈಲಟ್ ಕೆಳಗಿಳಿದು ಹತ್ತಿರದ ಅಂಗಡಿಯಿಂದ ಆಹಾರ ಪದಾರ್ಥವನ್ನು ಖರೀದಿಸಿದ್ದಾರೆ. ಚಾಲಕ ರೈಲಿಗೆ ಮರಳುತ್ತಿದ್ದ ದೃಶ್ಯವನ್ನು ಸ್ಥಳೀಯರು ಕ್ಯಾಮೆರಾದಲ್ಲಿ ಸೆರೆಹಿಡಿದು, "ತಿಂಡಿಗಾಗಿಯೇ ರೈಲು ನಿಲ್ಲಿಸಲಾಗಿದೆ" ಎಂದು ತಪ್ಪು ಮಾಹಿತಿಯೊಂದಿಗೆ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಮಾಡಿದ್ದಾರೆ.

ರೈಲ್ವೆ ಇಲಾಖೆಯ ಸ್ಪಷ್ಟನೆ

ರೈಲ್ವೆ ಅಧಿಕೃತ ಮೂಲಗಳ ಪ್ರಕಾರ, ಸಿಗ್ನಲ್ ಕಾಮಗಾರಿಯಿಂದಾಗಿ ರೈಲು ನಿಲ್ಲುವುದು ಕಡ್ಡಾಯವಾಗಿತ್ತು. ಆ ಬಿಡುವಿನ ಸಮಯದಲ್ಲಿ ಚಾಲಕ ಸಿಬ್ಬಂದಿ ಆಹಾರ ತಂದಿದ್ದಾರೆಯೇ ಹೊರತು, ಆಹಾರಕ್ಕಾಗಿಯೇ ಚಲಿಸುತ್ತಿದ್ದ ರೈಲನ್ನು ನಿಲ್ಲಿಸಿ ಸಾರ್ವಜನಿಕರಿಗೆ ತೊಂದರೆ ಮಾಡಿಲ್ಲ.

ಯಾವುದೇ ಸತ್ಯಾಸತ್ಯತೆಯನ್ನು ಪರಿಶೀಲಿಸದೆ, ವೈರಲ್ ವಿಡಿಯೋ ಆಧರಿಸಿ ಚಾಲಕರ ಮೇಲೆ ತಪ್ಪು ಆರೋಪ ಹೊರಿಸಲಾಗಿತ್ತು. ಇದೀಗ ಪ್ರಕರಣದ ಸಂಪೂರ್ಣ ವಿವರಣೆ ಹೊರಬಂದಿದ್ದು, ಸುಳ್ಳು ವದಂತಿಗಳಿಗೆ ತೆರೆಬಿದ್ದಿದೆ.