ವಯನಾಡು: ನನ್ನ, ನಂಬಿ ನನ್ನ ತಂಗಿ ಪ್ರಿಯಾಂಕ ನನಗೆ ಅತ್ಯುತ್ತಮ ಸಹೋದರಿಯಾಗಿದ್ದಳು. ಇನ್ನು ಮುಂದೆ ಅವಳು ನಿಮ್ಮ ತಂಗಿಯಾಗಿರುತ್ತಾಳೆ ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ವಯನಾಡಿನ ಜನರಿಗೆ ಭರವಸೆಯಿತ್ತಿದ್ದಾರೆ.
ವಯನಾಡು ಲೋಕಸಭಾ ಉಪಚುನಾವಣೆಯಲ್ಲಿ ತಮ್ಮಿಂದ ತೆರವಾಗುತ್ತಿರುವ ಸ್ಥಾನಕ್ಕೆ ರಾಹುಲ್ ತಮ್ಮ ಸಹೋದರಿ ಪ್ರಿಯಾಂಕ ಗಾಂಧಿ ವಾದ್ರಾರನ್ನೇ ಕಣಕ್ಕಿಳಿಸಿದ್ದಾರೆ. ತಂಗಿ ಪರವಾಗಿ ನಿನ್ನೆ ವಯನಾಡಿನಲ್ಲಿ ರಾಹುಲ್ ಅಬ್ಬರದ ಪ್ರಚಾರ ನಡೆಸಿದ್ದರು. ಬಳಿಕ ಸೋಷಿಯಲ್ ಮೀಡಿಯಾ ಎಕ್ಸ್ ನಲ್ಲಿ ಪ್ರಿಯಾಂಕರನ್ನು ಹಾಡಿ ಹೊಗಳಿದ್ದಾರೆ.
‘ನನಗೆ ವಿಶ್ವಾಸವಿದೆ, ಪ್ರಿಯಾಂಕ ರೂಪದಲ್ಲಿ ವಯನಾಡಿಗೆ ಬೆಸ್ಟ್ ಸಂಸದೆ ಸಿಗುತ್ತಾರೆ. ಆಕೆಯ ಪರಿಶ್ರಮವೇ ಇದನ್ನು ತೋರಿಸುತ್ತದೆ. ಆಕೆ ಈಗಾಗಲೇ ವಯನಾಡಿನ ಅಭಿವೃದ್ಧಿಗೆ, ಇಲ್ಲಿನ ಸಮಸ್ಯೆಗಳನ್ನು ಪರಿಹರಿಸಲು ಏನು ಮಾಡಬಹುದು ಎಂದು ಯೋಜನೆ ರೂಪಿಸುತ್ತಿದ್ದಾಳೆ’ ಎಂದು ರಾಹುಲ್ ಹಾಡಿ ಹೊಗಳಿದ್ದಾರೆ.
‘ಇಷ್ಟು ದಿನ ಪ್ರಿಯಾಂಕ ನನಗೆ ಉತ್ತಮ ಸಹೋದರಿಯಾಗಿದ್ದಳು. ನನಗೆ ಭರವಸೆಯಿದೆ, ಮುಂದೆ ಅವಳು ನಿಮಗೆ ಕೇವಲ ಸಂಸದೆಯಾಗಿ ಮಾತ್ರ ಇರುವುದಿಲ್ಲ, ನಿಮ್ಮ ತಂಗಿಯಾಗಿ, ಮಗಳಾಗಿ, ನಿಮ್ಮೆಲ್ಲರ ಪರವಾಗಿ ವಾದ ಮಾಡುವ ಪ್ರತಿನಿಧಿಯಾಗಿರುತ್ತಾಳೆ’ ಎಂದು ರಾಹುಲ್ ಗಾಂಧಿ ಹೇಳಿದ್ದಾರೆ.
