ಚನ್ನಪಟ್ಟಣ: ಮೊಮ್ಮಗ ನಿಖಿಲ್ ಕುಮಾರಸ್ವಾಮಿಗಾಗಿ ತಮ್ಮ ಆರೋಗ್ಯವನ್ನೂ ಪಣಕ್ಕಿಟ್ಟು ಇಂದು ಜೆಡಿಎಸ್ ವರಿಷ್ಠ ಎಚ್ ಡಿ ದೇವೇಗೌಡರು ಚನ್ನಪಟ್ಟಣ ಉಪಚುನಾವಣೆ ಪ್ರಚಾರ ಕಣಕ್ಕೆ ಧುಮುಕಲಿದ್ದಾರೆ.
ಇತ್ತೀಚೆಗೆ ದೇವೇಗೌಡರು ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಭಾಗಿಯಾಗುವುದು ಕಡಿಮೆ. ವಯೋಸಹಜವಾದ ಅವರ ಆರೋಗ್ಯ ಸಮಸ್ಯೆಗಳಿಂದಾಗಿ ಅವರು ಸಂಸತ್ತು ಬಿಟ್ಟರೆ ಬೇರೆ ಕಾರ್ಯಕ್ರಮಗಳಲ್ಲಿ ಭಾಗಿಯಾಗುವುದು ಕಡಿಮೆ. ಆದರೆ ಈಗ ಮೊಮ್ಮಗ ನಿಖಿಲ್ ನನ್ನು ಗೆಲ್ಲಿಸಲು ತಾವೇ ರಂಗಕ್ಕಿಳಿಯಲು ಮುಂದಾಗಿದ್ದಾರೆ.
ಚನ್ನಪಟ್ಟಣ ಉಪ ಚುನಾವಣೆ ಗೌಡರ ಕುಟುಂಬಕ್ಕೆ ಪ್ರತಿಷ್ಠೆಯ ಕಣವಾಗಿದೆ. ಎರಡು ಬಾರಿ ಸೋತಿದ್ದ ನಿಖಿಲ್ ಚನ್ನಪಟ್ಟಣದಲ್ಲಿ ಕಣಕ್ಕಿಳಿಯಬೇಕು ಎಂಬುದು ದೇವೇಗೌಡರ ಒತ್ತಾಸೆಯೂ ಆಗಿತ್ತು. ತಮ್ಮ ಬಳಿ ನಿಖಿಲ್ ನನ್ನು ಕರೆಸಕೊಂಡು ದೇವೇಗೌಡರು ಬುದ್ಧಿ ಹೇಳಿದ ಬಳಿಕ ನಿಖಿಲ್ ಅಭ್ಯರ್ಥಿಯಾಗಿದ್ದರು.
ಇದೀಗ ಮೂರನೇ ಬಾರಿ ನಿಖಿಲ್ ಸೋತರೆ ಎದುರಾಳಿಗಳ ವಿರುದ್ಧ ಜಾರಿ ಬಿದ್ದಂತಾಗಲಿದೆ. ಹೀಗಾಗಿ ಚನ್ನಪಟ್ಟಣ ಚುನಾವಣೆಯಲ್ಲಿ ಶತಾಯ ಗತಾಯ ನಿಖಿಲ್ ಗೆಲ್ಲಿಸಲು ತಂದೆ ಕುಮಾರಸ್ವಾಮಿ ಈಗಾಗಲೇ ಹಗಲಿರುಳು ಎನ್ನದೇ ಓಡಾಡುತ್ತಿದ್ದಾರೆ. ಇದೀಗ ದೊಡ್ಡ ಗೌಡರ ಆಗಮನ ಮತ್ತಷ್ಟು ಬಲ ನೀಡಲಿದೆ.
