ದೊಡ್ಮನೆಯಲ್ಲಿ ಒಂದೇ ವಾರಕ್ಕೆ ಆಟ ಮುಗಿಸಿದ ಯಮುನಾ ಶ್ರೀನಿಧಿ

Photo Courtesy X

ಬೆಂಗಳೂರು: ನಟಿ ಯಮುನಾ ಶ್ರೀನಿಧಿ ಅವರು ಬಿಗ್ ಬಾಸ್ ಕನ್ನಡ 11ನೇ ಆವೃತ್ತಿಯ ಮೊದಲ ವಾರದಲ್ಲೇ ದೊಡ್ಮನೆಯಿಂದ ಹೊರಬಿದ್ದಿದ್ದಾರೆ.

ಪ್ರತಿ ಚಟುವಟಿಕೆ, ಮಾತುಕತೆ ವೇಳೆಯೂ ತಮ್ಮದೇ ಧಾಟಿಯಲ್ಲಿ ಉಪಸ್ಥಿತಿಯನ್ನು ತೋರಿಸುತ್ತಿದ್ದ ಯಮುನಾ, ಉಗ್ರಂ ಮಂಜು ಜೊತೆಗಿನ ಜಗಳದ ನಂತರ ತಣ್ಣಗಾಗಿದ್ದರು. ಕೊನೆಯ ದಿನವೂ ಅವರ ಮುನಿಸು ಮುಂದುವರಿದಿತ್ತು. ಟಾಸ್ಕ್‌ಗಳಲ್ಲೂ ಹುಮ್ಮಸ್ಸಿನಿಂದ ಭಾಗವಹಿಸಿದ್ದ ಅವರು ಮನೆಯಲ್ಲಿ ಮುಂದುವರಿಯುವಲ್ಲಿ ವಿಫಲರಾಗಿದ್ದಾರೆ.

ಆರಂಭಿಕ ವಾರದಲ್ಲೇ ಗದ್ದಲ ಕೋಲಾಹಲದಿಂದ ಗಮನ ಸೆಳೆದಿದ್ದ ಸ್ವರ್ಗ ನರಕಗಳನ್ನೊಳಗೊಂಡ ಬಿಗ್ ಬಾಸ್ ಮನೆಯಲ್ಲಿ ಯಮುನಾ ತಮ್ಮ ಛಾಪು ಮೂಡಿಸುವಲ್ಲಿ ವಿಫಲರಾಗಿದ್ದಾರೆ. ಮನೆಯಲ್ಲಿ ಅವರ ಧ್ವನಿ ಜೋರಾಗಿ ಕೇಳಿಬಂದರೂ ಪ್ರೇಕ್ಷಕನ ಸ್ಪಂದನೆ ಸಿಕ್ಕಿಲ್ಲ.

ಹಂಸಾ ಮತ್ತು ಯಮುನಾ ಕೊನೆಯ ಸ್ಥಾನಕ್ಕೆ ಕುಸಿದಿದ್ದರು. ಅಂತಿಮವಾಗಿ ಹಂಸಾ ಸೇಫ್ ಆಗುವ ಮೂಲಕ ಮುಂದಿನ ಹಂತಕ್ಕೆ ಕಾಲಿಟ್ಟರೆ, ಯಮುನಾ ಹೊರನಡೆದರು.