ಸುರೇಶ್ ಶೃಂಗೇರಿ ನಿರ್ದೇಶನದ ವೀಕೆಂಡ್ ಚಿತ್ರ ಹಂತ ಹಂತವಾಗಿ ಟಾಕ್ ಕ್ರಿಯೇಟ್ ಮಾಡುತ್ತಾ ಸಾಗಿ ಬಂದು ಈ ವಾರ ಅದ್ದೂರಿಯಾಗಿ ತೆರೆ ಕಾಣುತ್ತಿದೆ. ಟೆಕ್ಕಿಗಳ ಬದುಕಿನೊಳಗೆ ಇಣುಕು ನೋಟ ಬೀರಿರುವ ಈ ಚಿತ್ರ ಯುವ ತುಮುಲಗಳ ರೋಚಕವಾದ ಕಥಾ ಹಂದರವನ್ನೊಳಗೊಂಡಿದೆ. ಅದರ ಝಲಕ್ಕುಗಳು ಟ್ರೈಲರ್ ಮೂಲಕವೇ ಅನಾವರಣಗೊಂಡು ಪ್ರೇಕ್ಷಕರೆಲ್ಲ ವೀಕೆಂಡಿನತ್ತ ಚಿತ್ತ ನೆಟ್ಟು ಕೂರುವಂತಾಗಿದೆ.
ಮಂಜುನಾಥ್ ಮಯೂರ ಮೋಷನ್ ಪಿಕ್ಚರ್ಸ್ ಅಡಿಯಲ್ಲಿ ನಿರ್ಮಾಣ ಮಾಡಿರುವ ಈ ಚಿತ್ರವನ್ನು ಶೃಂಗೇರಿ ಸುರೇಶ್ ನಿರ್ಮಾಣ ಮಾಡಿದ್ದಾರೆ. ಯುವ ಸಮುದಾಯವನ್ನು ದೃಷ್ಟಿಯಲ್ಲಿಟ್ಟುಕೊಂಡು ಟೆಕ್ಕಿಗಳ ಮನೋ ಲೋಕವನ್ನು ಅನಾವರಣಗೊಳಿಸುವಂತೆ ಈ ಚಿತ್ರ ಮೂಡಿ ಬಂದಿದೆಯಂತೆ.
ವೀಕೆಂಡ್ ಅನ್ನೋದು ಹೊರ ಜಗತ್ತಿಗೆ ವಾರಾಂತ್ಯದ ಮೋಜು ಮಸ್ತಿ ಅಂತಷ್ಟೇ ಬಿಂಬಿತವಾಗಿದೆ. ಆದರೆ ಇದರ ಹಿಂದೆ ಅದೆಷ್ಟೋ ದುರಂತಗಾಥೆಗಳೂ ಇವೆ. ಅಂಥಾದ್ದನ್ನೆಲ್ಲ ಒಟ್ಟುಗೂಡಿಸಿ ಸಾಮಾಜಿಕ ಸಂದೇಶವೊಂದನ್ನು ವೀಕೆಂಡ್ ಹೊತ್ತು ತಂದಿದೆ.
ಈ ಮೂಲಕವೇ ಮಿಲಿಂದ್ ಮತ್ತು ಸಂಜನಾ ಬುರ್ಲಿ ಎಂಬ ನಾಯಕ ನಾಯಕಿಯ ಆಗಮನವೂ ಆಗಿದೆ. ಈ ಎರಡೂ ಪಾತ್ರಗಳೂ ಕೂಡಾ ಅನೇಕ ಶೇಡುಗಳನ್ನು ಹೊಂದಿವೆಯಂತೆ. ನಟನೆಗೆ ಸವಾಲಿನಂತಿರೋ ಈ ಪಾತ್ರಗಳನ್ನು ಇವರಿಬ್ಬರೂ ಲೀಲಾಜಾಲವಾಗಿಯೇ ನಿರ್ವಹಿಸಿದ್ದಾರೆಂಬ ಮೆಚ್ಚುಗೆ ಚಿತ್ರತಂಡದಲ್ಲಿದೆ. ಇನ್ನುಳಿದಂತೆ ಅನಂತ್ ನಾಗ್ ಪ್ರಧಾನ ಪಾತ್ರವೊಂದರಲ್ಲಿ ನಟಿಸಿದ್ದಾರೆ. ಅದು ವೀಕೆಂಡಿನ ಮತ್ತೊಂದು ಆಕರ್ಷಣೆ ಅನ್ನೋದರಲ್ಲಿ ಯಾವ ಸಂಶಯವೂ ಇಲ್ಲ.
