ಬೆಂಗಳೂರು: ತರುಣ್ ಸುಧೀರ್ ಮಡದಿಯಾದ ಬಳಿಕ ನಟಿ ಸೋನಲ್ ಮೊಂಥೆರೋ ಇದೇ ಮೊದಲ ಬಾರಿಗೆ ಟಿವಿ ಶೋ ಒಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ವೇಳೆ ಅವರ ಕುತ್ತಿಗೆ ನೋಡಿ ನೆಟ್ಟಿಗರು ಶಹಬ್ಬಾಶ್ ಎಂದಿದ್ದಾರೆ.
ಜೀ ಕನ್ನಡದಲ್ಲಿ ಪ್ರಸಾರವಾಗುವ ಡಿಕೆಡಿ ಶೋಗೆ ಸೋನಲ್ ಅತಿಥಿಯಾಗಿ ಬಂದಿದ್ದಾರೆ. ಈ ಶೋನಲ್ಲಿ ತರುಣ್ ಕೂಡಾ ಅತಿಥಿ ಜಡ್ಜ್ ಆಗಿ ಬಂದಿದ್ದರು. ಈ ವೇಳೆ ಸೋನಲ್ ರನ್ನು ತರುಣ್ ಗೆ ಅಚ್ಚರಿ ನೀಡಲು ಕರೆಸಿಕೊಳ್ಳಲಾಗಿತ್ತು. ಈ ಸಂದರ್ಭದಲ್ಲಿ ಸೀರೆ ಉಟ್ಟು ಸಾಂಪ್ರದಾಯಿಕವಾಗಿ ಬಂದ ಸೋನಲ್ ಕುತ್ತಿಗೆಯಲ್ಲಿ ಮದುವೆ ದಿನ ಕಟ್ಟಿರುವ ಅರಶಿನದ ತಾಳಿ ಸರ ಹಾಗೆಯೇ ಇತ್ತು.
ಇದನ್ನು ನೋಡಿ ನೆಟ್ಟಿಗರು ಹೊಗಳಿಕೆಯ ಸುರಿಮಳೆಗೈದಿದ್ದಾರೆ. ವೇದಿಕೆಯಲ್ಲಿ ತರುಣ್ ಗಾಗಿ ಸೋನಲ್ ಒಂದು ಹಾಡನ್ನೂ ಹಾಡಿದ್ದಾರೆ. ಇಬ್ಬರಿಗೂ ನಿರೂಪಕಿ ಅನುಶ್ರೀ ಸಾಕಷ್ಟು ತರ್ಲೆ ಮಾಡಿದ್ದಾರೆ. ಆದರೆ ಎಲ್ಲಕ್ಕಿಂತ ನೆಟ್ಟಿಗರ ಗಮನ ಸೆಳೆದಿದ್ದು ಸೋನಲ್ ತಾಳಿ ಸರ ಹಾಕಿಕೊಂಡಿರುವುದು.
ಇತ್ತೀಚೆಗೆ ಸೆಲೆಬ್ರಿಟಿಗಳು ಮದುವೆಯಾದ ಮೇಲೆ ತಾಳಿ ಸರ ಹಾಕದೇ ಓಡಾಡುತ್ತಾರೆ. ಅದನ್ನೇ ಒಂದು ಪ್ಯಾಶನ್ ಎಂದುಕೊಂಡಿದ್ದಾರೆ. ಆದರೆ ಸೋನಲ್ ಮದುವೆ ದಿನ ಕಟ್ಟಿದ ಅದೇ ಅರಶಿನ ದಾರವನ್ನೇ ಕುತ್ತಿಗೆಯಲ್ಲಿ ಹಾಕಿಕೊಂಡಿರುವುದು ನೋಡಿ ನಿಮಗೆ ತಾಳಿ ಮೇಲೆ ಎಷ್ಟು ಗೌರವವಿದೆ ಎಂದು ಇದರಿಂದ ಗೊತ್ತಾಗುತ್ತದೆ ಎಂದು ಹೊಗಳಿದ್ದಾರೆ.
