ಬೆಂಗಳೂರು: ನ್ಯೂ ಇಯರ್ ಡೇ ಎಂದರೆ ಸಾಕು ಬೆಂಗಳೂರು ಪೊಲೀಸರಿಗೆ ಎಲ್ಲಿಲ್ಲದ ತಲೆನೋವು. ಪಾರ್ಟಿ ಮಾಡುವ ಯುವ ಜನರನ್ನು ಅತ್ತ ತಡೆಯುವ ಹಾಗೂ ಇಲ್ಲ, ಇತ್ತ ಕುಡಿದು ಗಾಡಿ ಚಲಾಯಿಸಿ ಅಪಾಯ ತಂದುಕೊಳ್ಳದಂತೆ ಕಡಿವಾಣ ಹಾಕದೆಯೂ ಇರುವ ಹಾಗಿಲ್ಲ.
ಜತೆಗೆ ಹೆಣ್ಣು ಮಕ್ಕಳ ಸುರಕ್ಷತೆಯೂ ತಲೆನೋವಾಗಿಬಿಡುತ್ತದೆ. ಇದೀಗ ಬೆಂಗಳೂರು ಪೊಲೀಸರ ಈ ಜಾಗೃತಿ ಕರೆಗೆ ರಾಕಿಂಗ್ ಸ್ಟಾರ್ ಯಶ್ ಸಾಥ್ ಕೊಡುತ್ತಿದ್ದಾರೆ.
ಹೊಸ ವರ್ಷಾಚರಣೆ ವೇಳೆ ಪಾನಮತ್ತರಾಗಿ ಚಾಲನೆ ಮಾಡುವ ಯುವ ಜನಾಂಗಕ್ಕೆ ಜಾಗೃತಿ ಮೂಡಿಸುವ ಅಭಿಯಾನಕ್ಕೆ ಯಶ್ ಕೈ ಜೋಡಿಸಿದ್ದಾರೆ. ವಿಡಿಯೋ ಸಂದೇಶ ಮೂಲಕ ಯಶ್ ಕುಡಿದು ಗಾಡಿ ಓಡಿಸಬೇಡಿ ಎಂದು ಮನವಿ ಮಾಡಿದ್ದಾರೆ. ಈ ವಿಡಿಯೋವನ್ನು ಬೆಂಗಳೂರು ಪೊಲೀಸರು ಸಾಮಾಜಿಕ ಜಾಲತಾಣಗಳ ಮೂಲಕ ಹರಿಯಬಿಟ್ಟಿದ್ದಾರೆ. ನಮ್ಮ ಮಾತು ಕೇಳದಿದ್ದರೆ ಬೇಡ, ಕನಿಷ್ಠ ನಿಮ್ಮದೇ ಮೆಚ್ಚಿನ ನಟನ ಮಾತನ್ನಾದರೂ ಕೇಳಿ ಎಂದು ಪೊಲೀಸರು ಮನವಿ ಮಾಡಿದ್ದಾರೆ.