ಚಿಕ್ಕಣ್ಣನ ಮನೆಗೆ ಕರೆಸಿ ಉಪಾಧ್ಯಕ್ಷ ಸಿನಿಮಾಗೆ ಅಭಿನಂದಿಸಿದ ರಾಕಿಂಗ್ ಸ್ಟಾರ್ ಯಶ್

Photo Courtesy: Twitter

ಬೆಂಗಳೂರು: ಕನ್ನಡ ಚಿತ್ರರಂಗದಲ್ಲಿ ಹಾಸ್ಯ ನಟನಾಗಿ ಬಂದು ಇಂದು ನಾಯಕ ನಟನಾಗಿ ಮಿಂಚುತ್ತಿರುವ ಚಿಕ್ಕಣ್ಣಗೆ ಒಂದು ಕಾಲದಲ್ಲಿ ಕೈ ಹಿಡಿದಿದ್ದು ರಾಕಿಂಗ್ ಸ್ಟಾರ್ ಯಶ್.

ಯಶ್ ಅವಕಾಶ ಕೊಟ್ಟಿದ್ದರಿಂದಲೇ ಚಿಕ್ಕಣ್ಣಗೆ ಸ್ಯಾಂಡಲ್ ವುಡ್ ನಲ್ಲಿ ಅವಕಾಶ ಸಿಕ್ಕಿತ್ತು. ಇದನ್ನು ಅನೇಕ ಸಂದರ್ಶನಗಳಲ್ಲಿ ಚಿಕ್ಕಣ್ಣ ಹೇಳಿಕೊಂಡಿದ್ದರು. ಯಾವುದೋ ಒಂದು ಶೋನಲ್ಲಿ ಚಿಕ್ಕಣ್ಣನ ಪ್ರತಿಭೆ ಗಮನಿಸಿ ತಾವೇ ಕರೆದು ಅವಕಾಶ ಕೊಟ್ಟಿದ್ದಲ್ಲದೆ, ಅವರು ಕೇಳಿದಷ್ಟು ಸಂಭಾವನೆಯನ್ನೂ ಕೊಡಿಸಿದ್ದರಂತೆ ಯಶ್.

ಇದೀಗ ಚಿಕ್ಕಣ್ಣ ನಾಯಕರಾಗಿ ನಟಿಸಿರುವ ಉಪಾಧ್ಯಕ್ಷ ಸಿನಿಮಾ ಥಿಯೇಟರ್ ನಲ್ಲಿ ಬಿಡುಗಡೆಯಾಗಿ ಉತ್ತಮ ಪ್ರತಿಕ್ರಿಯೆ ಪಡೆಯುತ್ತಿದೆ. ಇದೇ ಕಾರಣಕ್ಕೆ ಯಶ್ ತಮ್ಮ ಮನೆಗೆ ಕರೆಸಿ ಚಿಕ್ಕಣ್ಣ ಮತ್ತು ನಾಯಕಿ ಮಲೈಕಾ ಜೊತೆ ಉಪಾಹಾರ ಸೇವಿಸಿ ಚಿತ್ರದ ಯಶಸ್ಸಿಗೆ ಅಭಿನಂದನೆ ಸಲ್ಲಿಸಿದ್ದಾರೆ.

ಯಶ್-ರಾಧಿಕಾ ದಂಪತಿ ಜೊತೆಗೆ ಚಿಕ್ಕಣ್ಣ-ಮಲೈಕಾ ಜೊತೆಯಾಗಿ ಕೂತು ಉಪಾಹಾರ ಸೇವಿಸಿದ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಬಳಿಕ ಇಬ್ಬರಿಗೂ ಯಶ್ ಮತ್ತು ರಾಧಿಕಾ ಶುಭ ಹಾರೈಸಿ ಬೀಳ್ಕೊಟ್ಟಿದ್ದಾರೆ.