ಬೆಂಗಳೂರು: ಸ್ಯಾಂಡಲ್ ವುಡ್ ನಲ್ಲಿ ಎಲ್ಲರೂ ಇಷ್ಟಪಡುವ ಜೋಡಿ ರಾಕಿಂಗ್ ಸ್ಟಾರ್ ಯಶ್ ಮತ್ತು ರಾಧಿಕಾ ಪಂಡಿತ್ ಗೆ ಇಂದು ಮೂರನೇ ವರ್ಷದ ವಿವಾಹ ವಾರ್ಷಿಕೋತ್ಸವ ಸಂಭ್ರಮ. ಈ ಖುಷಿಯಲ್ಲಿ ರಾಧಿಕಾ ಹಳೆಯ ಫೋಟೋ ಒಂದನ್ನು ಪ್ರಕಟಿಸಿದ್ದಾರೆ.
ಜತೆಗೆ ಯಶ್ ಮತ್ತು ತಮ್ಮ ಸಂಬಂಧದ ಬಗ್ಗೆ ಭಾವನಾತ್ಮಕ ಸಂದೇಶ ಬರೆದಿದ್ದಾರೆ. ಆದರೆ ಈ ಸಂದರ್ಭದಲ್ಲಿ ಅವರು ಪ್ರಕಟಿಸಿದ ಫೋಟೋ ಒಂದು ಅವರಿಬ್ಬರ ಲವ್ ಲೈಫ್ ಎಷ್ಟು ಹಳೆಯದು ಎಂಬ ರಹಸ್ಯ ಹೊರಹಾಕಿದೆ.
ಈ ಫೋಟೋ ಯಶ್ ‘ಲಕ್ಕಿ’ ಸಿನಿಮಾ ಮಾಡುವ ಸಂದರ್ಭದಲ್ಲಿ ತೆಗೆದಿದ್ದು ಎಂದು ಅವರ ಹೇರ್ ಸ್ಟೈಲ್ ನೋಡಿದರೆ ಗೊತ್ತಾಗುತ್ತದೆ. ಮೊಗ್ಗಿನ ಮನಸ್ಸು ಸಿನಿಮಾದಿಂದಲೂ ರಾಧಿಕಾ ಮತ್ತು ಯಶ್ ಸ್ನೇಹಿತರಾಗಿದ್ದರು. ಆ ಸ್ನೇಹ ಪ್ರೀತಿಯಾಗಿ ಚಿಗುರೊಡೆದಿತ್ತು. ಆದರೆ ಇವರಿಬ್ಬರೂ ಎಲ್ಲೂ ತಮ್ಮ ಪ್ರೀತಿಯನ್ನು ಬಹಿರಂಗಪಡಿಸಿರಲಿಲ್ಲ. ಇದ್ದಕ್ಕಿದ್ದ ಹಾಗೆ ಎಂಗೇಜ್ ಮೆಂಟ್ ಮಾಡಿಕೊಳ್ಳುವ ವಿಚಾರವನ್ನು ಮಾಧ್ಯಮಗಳಿಗೆ ತಿಳಿಸಿ ಶಾಕ್ ಕೊಟ್ಟಿತ್ತು ಈ ಜೋಡಿ.
ರಾಧಿಕಾ ಮತ್ತು ಯಶ್ ಜತೆಯಾಗಿ ನಿಂತಿರುವ ಈ ಹಳೆಯ ಚೆಂದದ ಫೋಟೋವನ್ನು ಅಭಿಮಾನಿಗಳು ತುಂಬಾ ಇಷ್ಟಪಟ್ಟಿದ್ದಾರೆ. ಜತೆಗೆ ಈ ರಾಮಾಚಾರಿ ಜೋಡಿಯ ಜೀವನ ಹೀಗೇ ಇರಲಿ ಎಂದು ಹಾರೈಸಿದ್ದಾರೆ.
