ಬೆಂಗಳೂರು: ಇತ್ತೀಚೆಗೆ ಸ್ಟಾರ್ ನಟರು ಸಿಕ್ಸ್ ಪ್ಯಾಕ್ ಬಾಡಿ ಬೆಳೆಸುವುದು ಸಾಮಾನ್ಯ. ಬಾಲಿವುಡ್ ನಿಂದ ಬಂದ ಈ ಟ್ರೆಂಡ್ ಕನ್ನಡದಲ್ಲೂ ಸಾಮಾನ್ಯವಾಗಿದೆ. ಆದರೆ ಕನ್ನಡದಲ್ಲಿ ಎಲ್ಲರಿಗಿಂತ ಮೊದಲು ಸಿಕ್ಸ್ ಪ್ಯಾಕ್ ಮಾಡಿ ತೋರಿಸಿದವರು ರಿಯಲ್ ಸ್ಟಾರ್ ಉಪೇಂದ್ರ.
ಒಂದು ಕಾಲದಲ್ಲಿ ಕನ್ನಡದ ಸಲ್ಮಾನ್ ಖಾನ್ ಎಂದು ಕರೆಯಿಸಿಕೊಳ್ಳುತ್ತಿದ್ದ ಉಪೇಂದ್ರ ಈಗಲೂ ಮೈ ಕಟ್ಟು ಕಾಯ್ದುಕೊಳ್ಳುವುದನ್ನು ಮರೆತಿಲ್ಲ. ರಕ್ತ ಕಣ್ಣೀರು ಸಿನಿಮಾದ ಬಾ ಬಾರೋ ರಸಿಕ, ನಾಗರಹಾವು ಸಿನಿಮಾದಲ್ಲಿ ಜ್ಯೋತಿಕಾ ಜೊತೆ ಯಾಕಿಂಗಾಡ್ತೀಯೇ, ಐ ಲವ್ ಯೂ ಸಿನಿಮಾದಲ್ಲಿ ರಚಿತಾ ರಾಮ್ ಜೊತೆ ಹಾಡಿನಲ್ಲಿ ಅವರ ಸಿಕ್ಸ್ ಪ್ಯಾಕ್ ಬಾಡಿ ಪ್ರದರ್ಶನ ಹುಡುಗಿಯರ ಮನ ಕದ್ದಿತ್ತು.
ಈಗಲೂ ಉಪೇಂದ್ರ ಅದೇ ರೀತಿ ತಮ್ಮ ಮೈಕಟ್ಟು ಕಾಯ್ದುಕೊಳ್ಳಲು ಆದ್ಯತೆ ನೀಡುತ್ತಾರೆ ಎಂಬುದು ಇತ್ತೀಚೆಗಿನ ವಿಡಿಯೋವೊಂದರಿಂದ ಖಾತ್ರಿಯಾಗಿದೆ. ಜಿಮ್ ನಲ್ಲಿ ವರ್ಕೌಟ್ ಮಾಡುತ್ತಿರುವ ಉಪೇಂದ್ರ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದೆ.
ಸದ್ಯಕ್ಕೆ ಉಪೇಂದ್ರ ಯುಐ ಸಿನಿಮಾ ಶೂಟಿಂಗ್ ನಲ್ಲಿ ತೊಡಗಿಸಿಕೊಂಡಿದ್ದು ಆ ಸಿನಿಮಾಗಾಗಿಯೇ ಈ ಕಸರತ್ತು ಮಾಡುತ್ತಿರಬಹುದು ಎನ್ನಲಾಗಿದೆ. ಯುಐ ಸಿನಿಮಾಗೆ ಸ್ವತಃ ಉಪೇಂದ್ರ ನಿರ್ದೇಶನ ಮಾಡುತ್ತಿದ್ದಾರೆ. ಅವರ ಇತ್ತೀಚೆಗಿನ ಬಾಡಿ ಬಿಲ್ಡ್ ವಿಡಿಯೋ ನೋಡಿದರೆ ಯುಐ ಬಗ್ಗೆ ಮತ್ತಷ್ಟು ಕುತೂಹಲ ಮೂಡುವುದು ಗ್ಯಾರಂಟಿ.
