ಬೆಂಗಳೂರು: ಬಿಗ್ ಬಾಸ್ ನಲ್ಲಿ ಎಲ್ಲರ ಮನೆ ಮಾತಾಗಿದ್ದ ಹುಚ್ಚ ವೆಂಕಟ್ ಇದೀಗ ಮತ್ತೆ ಪ್ರತ್ಯಕ್ಷರಾಗಿದ್ದಾರೆ. ಕೆಲವು ಸಮಯದ ಹಿಂದೆ ಬೀದಿ ಬೀದಿ ತಿರುಗಾಡುತ್ತಿದ್ದ ಹುಚ್ಚ ವೆಂಕಟ್ ಈಗ ಬಿಗ್ ಬಾಸ್ ನಲ್ಲಿ ಅವಕಾಶ ಕೊಡಿ ಎಂದು ವಿಡಿಯೋ ಹರಿಯಬಿಟ್ಟಿದ್ದಾರೆ.
ಬಿಗ್ ಬಾಸ್ ಕನ್ನಡ ಸೀಸನ್ 11 ಆರಂಭಕ್ಕೆ ಎರಡೇ ದಿನಗಳ ಮೊದಲು ಹುಚ್ಚ ವೆಂಕಟ್ ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೋ ಮೂಲಕ ಕಲರ್ಸ್ ವಾಹಿನಿಗೆ ಮತ್ತು ಕಿಚ್ಚ ಸುದೀಪ್ ಗೆ ಮನವಿ ಮಾಡಿದ್ದಾರೆ. ನನಗೆ ಒಂದು ಅವಕಾಶ ಕೊಡಿ ಎಂದು ಅಂಗಲಾಚಿದ್ದಾರೆ.
‘ಇದು ಕಲರ್ಸ್ ಕನ್ನಡದವರಿಗೆ, ಇದು ಸುದೀಪ್ ಅವರಿಗೆ ಕೂಡಾ.. ನನಗೆ ಒಂದು ಅವಕಾಶ ಕೊಡಿ ಮತ್ತೆ ಬಿಗ್ ಬಾಸ್ ಗೆ ಬರಕ್ಕೆ. ಖಂಡಿತಾ ನಾನು ಉಳಿಸ್ಕೋತಿನಿ. ನಾನು ಗಲಾಟೆ ಮಾಡಲ್ಲ, ಎಲ್ಲಾ ಟಾಸ್ಕ್ ಮಾಡ್ತೀನಿ. ಒಂದು ದಿನಕ್ಕೆ ಕರೆದರೂ ಬರ್ತೀನಿ, ಒಂದು ವಾರಕ್ಕೆ ಕರೆದರೂ ಬರ್ತೀನಿ, ಅಲ್ಲೇ ಫಿನಾಲೆವರೆಗೆ ಇರಿ ಅಂದ್ರೂ ಇರ್ತೀನಿ. ಒಟ್ಟಿನಲ್ಲಿ ನನ್ನ ಕರೀರಿ. ಯಾಕೆಂದರೆ ಎಲ್ಲರೂ ನನ್ನನ್ನು ಬಿಗ್ ಬಾಸ್ ಹುಚ್ಚ ವೆಂಕಟ್ ಅಂತಿದ್ದಾರೆ. ಬಿಗ್ ಬಾಸ್ ಬಂದ ಮೇಲೆ ನೀವು ಹೋಗಲ್ವಾ ಎಂದು ಕೇಳ್ತಿದ್ದಾರೆ. ಸುದೀಪ್ ಅವರು ಮನಸ್ಸು ಮಾಡಿದ್ರೆ ಆಗುತ್ತೆ. ಒಂದು ಅವಕಾಶ ಕೊಡಿ ಎಂದು ಹುಚ್ಚ ವೆಂಕಟ್ ವಿಡಿಯೋದಲ್ಲಿ ಮನವಿ ಮಾಡಿದ್ದಾರೆ.
ಬಿಗ್ ಬಾಸ್ ಕನ್ನಡ ಸೀಸನ್ 3 ರ ಸ್ಪರ್ಧಿಯಾಗಿದ್ದ ಹುಚ್ಚ ವೆಂಕಟ್, ಮನೆಯೊಳಗೆ ಸಹಸ್ಪರ್ಧಿ ಮೇಲೆ ಹಲ್ಲೆ ನಡೆಸಿ ಗಲಾಟೆ ಎಬ್ಬಿಸಿದ್ದರು. ಕೆಲವು ಸಮಯದ ಹಿಂದೆ ಭಿಕ್ಷುಕನಂತೆ ಮನೆ ಮನೆ ತಿರುಗಾಡುವ ವಿಡಿಯೋವೂ ವೈರಲ್ ಆಗಿತ್ತು. ಇದೀಗ ಬಿಗ್ ಬಾಸ್ ಗೆ ಅವಕಾಶ ಕೇಳಿಕೊಂಡು ಸುದ್ದಿಯಾಗಿದ್ದಾರೆ.
