ಬೆಂಗಳೂರು: ಇದೇ 20,21 ಹಾಗೂ 22ರಂದು ಸಂಬಂಧಗಳ ಹಬ್ಬ ಅನುಬಂಧ ಅವಾರ್ಡ್ಸ್‌ 2024 ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಲಿದೆ. ಈಗಾಗಲೇ ಬಿಡುಗಡೆಯಾಗಿರುವ ಪ್ರೋಮೋಗಳು ಸೀರಿಯಲ್ ಪ್ರಿಯರಲ್ಲಿ ಕುತೂಹಲ ಹೆಚ್ಚಿಸಿದೆ.
ಈ ಸಮಾರಂಭದಲ್ಲಿ ಸೀರಿಯಲ್ ನಟ ನಟಿಯರಿಂದ ಮನೋರಂಜನಾ ಕಾರ್ಯಕ್ರಮಗಳು ನಡೆಯಲಿದೆ.
ಇನ್ನೂ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಭಾಗ್ಯಲಕ್ಷ್ಮೀ ಸೀರಿಯಲ್ ಟಾಪ್ ರೇಟಿಂಗ್‌ನಲ್ಲಿ ಮುನ್ನುಗ್ಗುತ್ತಿದೆ. ಭಾಗ್ಯಲಕ್ಷ್ಮೀ ಸೀರಿಯಲ್ ಅಭಿಮಾನಿಯೊಬ್ಬರು ಅನುಬಂಧ ವೇದಿಕೆಯಲ್ಲಿ ತಾಂಡವ್‌ಗೆ ಕ್ಲಾಸ್‌ ತೆಗೆದುಕೊಂಡಿದ್ದಾರೆ.
ಪ್ರೋಮೋದಲ್ಲಿ ಕೋಲು ಹಿಡಿದುಕೊಂಡು ವೇದಿಕೆ ಹತ್ತಿದ ಅಜ್ಜಿಯೊಬ್ಬರು ತಾಂಡವ್‌ಗೆ ಬುದ್ಧಿ ಮಾತು ಹೇಳಿದ್ದಾರೆ. ಇದನ್ನೆಲ್ಲ ನೋಡಿದ ಕಲಾವಿದರು ನಗೆಗಡಲಲ್ಲಿ ತೇಲಾಡಿದ್ದಾರೆ.
ಭಾಗ್ಯಲಕ್ಷ್ಮೀ ಸೀರಿಯಲ್‌ನ ಅಪ್ಪಟ ಅಭಿಮಾನಿಯಾಗಿರುವ ಅಜ್ಜಿ, ಇನ್ಮುಂದೆ ಶ್ರೇಷ್ಠಾ ಜತೆ ಕಾಣಿಸಿಕೊಳ್ಳಬಾರದು. ಮನೆಯಲ್ಲಿ ಭಾಗ್ಯಲಕ್ಷ್ಮೀ ಇರುವಾಗ ಇನ್ನೊಬ್ಬಳು ಯಾಕೆ ಬೇಕು. ಶ್ರೇಷ್ಠಾ ಇನ್ಮುಂದೆ ಯಾವುದೇ ಕಾರಣಕ್ಕು ತಾಂಡವ್ ಮುಂದೆ ಕಾಣಿಸಿಕೊಳ್ಳಬಾರದು ಎಂದು ಎಚ್ಚರಿಕೆ ನೀಡಿದ್ದಾರೆ.
