ಬೆಂಗಳೂರು: ಬಿಗ್ ಬಾಸ್ ಖ್ಯಾತಿಯ, ನಟ ಹುಚ್ಚ ವೆಂಕಟ್ ಅವರನ್ನು ಹುಡುಕಿಕೊಡಿ ಎಂದು ಕಿರು ಚಿತ್ರವೊಂದರ ನಿರ್ದೇಶಕ ವಿಜಯ್ ಕಿತ್ತೂರು ಸೋಷಿಯಲ್ ಮೀಡಿಯಾದಲ್ಲಿ ಕಣ್ಣೀರು ಹಾಕಿದ್ದಾರೆ.
ಹುಚ್ಚ ವೆಂಕಟ್ ನಾಯಕರಾಗಿ ಮಾಡಿ ಕಿರು ಚಿತ್ರವೊಂದನ್ನು ಮಾಡಿದ್ದೆವು. ಈಗ ಅದನ್ನು ಬಿಡುಗಡೆ ಮಾಡುತ್ತಿದ್ದೇವೆ. ನಿಮ್ಮನ್ನು ಹುಡುಕಿ ಹುಡುಕಿ ಸಾಕಾಗಿದೆ. ನೀವು ಎಲ್ಲೇ ಇದ್ರೂ ದಯವಿಟ್ಟು ನನ್ನ ನಂಬರ್ ಗೆ ಕಾಲ್ ಮಾಡಿ ಎಂದು ವಿಜಯ್ ಕಿತ್ತೂರು ಸೋಷಿಯಲ್ ಮೀಡಿಯಾದಲ್ಲಿ ಕಣ್ಣೀರು ಹಾಕಿ ಮನವಿ ಮಾಡಿದ್ದಾರೆ.
‘ವಿಷ್ಣು ಮಾರ್ಗ’ ಎನ್ನುವ ಕಿರು ಚಿತ್ರ ಮಾಡಿದ್ದೇನೆ. ಆ ಕತೆಗೆ ಹುಚ್ಚ ವೆಂಕಟ್ ಸರಿಯಾಗಿ ಸೂಟ್ ಆಗುತ್ತಾರೆ ಎಂದು ಅವರನ್ನು ನಾಯಕರಾಗಿ ಮಾಡಿ ಸಿನಿಮಾ ಮಾಡಿದ್ದೆವು. ಶೂಟಿಂಗ್ ಎಲ್ಲಾ ಚೆನ್ನಾಗಿ ಮಾಡಿಕೊಟ್ಟರು. ಡಬ್ಬಿಂಗ್ ಕೂಡಾ ಮಾಡಿಕೊಟ್ಟಿದ್ದರು. ಪ್ರಮೋಷನ್ ಎಲ್ಲಾ ಮಾಡೋಣ ಎಂದಿದ್ದರು. ಈಗ ಕಿರು ಚಿತ್ರ ಮುಗಿದು ತುಂಬಾ ಸಮಯವಾಗಿದೆ. ಅದನ್ನು ಈಗ ಬಿಡುಗಡೆ ಮಾಡಲು ನಿರ್ಧರಿಸಿದ್ದೇವೆ.
ಆದರೆ ಹುಚ್ಚ ವೆಂಕಟ್ ನಮಗೆ ಕೈಗೆ ಸಿಕ್ತಾ ಇಲ್ಲ. ಹಾಸ್ಪಿಟಲ್ ಗೆ ಅಡ್ಮಿಟ್ ಆಗಿದ್ದಾರೆ ಎಂದು ಯಾರೋ ಹೇಳಿದ್ದರು. ಹಾಗೆ ಅಲ್ಲೂ ಹೋಗಿ ವಿಚಾರಿಸಿದ್ದೆ. ಅಲ್ಲೂ ಅವರಿಲ್ಲ. ಅವರನ್ನು ಹುಡುಕದೇ ಇರುವ ಜಾಗವಿಲ್ಲ. ಹಾಗೇ ಅವರಿಗೆ ಸಂಬಂಧಪಟ್ಟ ಕೆಲವೊಂದು ವಿಷಯಗಳು ಸೋಷಿಯಲ್ ಮೀಡಿಯಾದಲ್ಲಿ ಓಡಾಡ್ತಾ ಇತ್ತು. ಅದನ್ನು ಕೇಳಿ ತುಂಬಾ ಬೇಸರವಾಯಿತು. ಇದೇ ಫೆ.22 ಸುಚಿತ್ರಾ ಫಿಲಂ ಇನ್ಸ್ಟ್ರಿಟ್ಯೂಟ್ ನಲ್ಲಿ ಮಧ‍್ಯಾಹ್ನ 3 ಗಂಟೆಗೆ ಚಿತ್ರ ಬಿಡುಗಡೆ ಮಾಡುತ್ತೀವಿ. ಹುಚ್ಚ ವೆಂಕಟ್ ಅವರನ್ನು ಹುಡುಕಿ ಸುಸ್ತಾಗಿದ್ದೀವಿ. ದಯವಿಟ್ಟು ಈ ವಿಡಿಯೋ ನೋಡ್ತಿರೋರು ಯಾರಿಗಾದರೂ ಅವರ ಸಂಪರ್ಕ ಇದ್ದರೆ ನನ್ನ ನಂಬರ್ 8123771562 ಗೆ ಕಾಲ್ ಮಾಡಿ. ಹುಚ್ಚ ವೆಂಕಟ್ ನಿಮ್ಮ ನಿರೀಕ್ಷೆಯಲ್ಲಿದ್ದೀವಿ’ ಎಂದು ವಿಜಯ್ ಕಿತ್ತೂರು ಮನವಿ ಮಾಡಿದ್ದಾರೆ.
ಕೆಲವು ದಿನಗಳ ಮೊದಲು ಹುಚ್ಚ ವೆಂಕಟ್ ಬೀದಿ ಬೀದಿ ಅಲೆಯುತ್ತಿರುವ ಮತ್ತು ಊಟ, ನೀರಿಗಾಗಿ ಭಿಕ್ಷೆ ಬೇಡುತ್ತಿರುವ ವಿಡಿಯೋ ವೈರಲ್ ಆಗಿತ್ತು. ಇದೀಗ ನಿರ್ದೇಶಕರೊಬ್ಬರ ಈ ವಿಡಿಯೋ ವೈರಲ್ ಆಗಿದೆ.
