ಬೆಂಗಳೂರು: ರೇಣುಕಾಸ್ವಾಮಿ ಮರ್ಡರ್ ಕೇಸ್ ನಲ್ಲಿ ನಟ ದರ್ಶನ್ ಬಂಧಿತರಾದಾಗ ಅವರ ಆತ್ಮೀಯ ಬಳಗದಲ್ಲಿದ್ದವರೆಲ್ಲರೂ ಕೆಲವು ದಿನ ಸೈಲೆಂಟ್ ಆಗಿದ್ದರು. ಅದು ಈಗಲೂ ಮುಂದುವರಿದಿದೆ. ಆದರೆ ಅವರ ಕಷ್ಟ ಕಾಲದಲ್ಲಿ ಅವರಿಗೆ ಹೆಗಲುಕೊಟ್ಟು ನಿಂತಿದ್ದು ಒಬ್ಬರೇ ನಟ.
ದರ್ಶನ್ ಗೆ ಚಿತ್ರರಂಗದಲ್ಲಿ ತಮ್ಮದೇ ಆದ ಗೆಳೆಯರ ಬಳಗವಿದೆ. ಅವರು ಮರ್ಡರ್ ಕೇಸ್ ನಲ್ಲಿ ಬಂಧಿತರಾದಾಗ ಕೆಲವರು ಜಾರಿಕೊಂಡರೆ ಮತ್ತೆ ಕೆಲವರು ಏನೇ ಆದರೂ ನಮ್ಮ ಬಾಸ್ ತಪ್ಪು ಮಾಡಿರಲ್ಲ ಎಂದು ಮಾಧ್ಯಮಗಳ ಮುಂದೆ ಸಮರ್ಥಿಸಿಕೊಂಡೇ ಬಂದಿದ್ದರು.
ಆದರೆ ದರ್ಶನ್ ಜೊತೆಗಿನ ಸ್ನೇಹ ಕೇವಲ ಭೇಟಿಗೆ ಮಾತ್ರ ಸೀಮಿತವಾಗದೇ ಅವರ ಕುಟುಂಬದ ಜೊತೆಗೇ ನಿಂತು ಕಷ್ಟಕ್ಕೆ ಹೆಗಲುಕೊಟ್ಟಿದ್ದು ನಟ ಧನ್ವೀರ್ ಗೌಡ ಮಾತ್ರ. ಮೊದಲಿನಿಂದಲೂ ದರ್ಶನ್ ಅಭಿಮಾನಿ ಎಂದೇ ಗುರುತಿಸಿಕೊಂಡಿದ್ದ ಧನ್ವೀರ್ ಚಿತ್ರರಂಗಕ್ಕೆ ಕಾಲಿಡಲು ದರ್ಶನ್ ಸಹಾಯ ಪಡೆದಿದ್ದರು. ಅವರ ಬೆಂಬಲದಿಂದಲೇ ಇಂದು ತಕ್ಕ ಮಟ್ಟಿಗೆ ಸ್ಟಾರ್ ಆಗಿ ಗುರುತಿಸಿಕೊಂಡಿದ್ದಾರೆ.
ಆದರೆ ಈ ಸಹಾಯಕ್ಕೆ ಅವರು ಹತ್ತರಷ್ಟು ವಾಪಸ್ ಮಾಡಿದ್ದಾರೆ. ವಿಜಯಲಕ್ಷ್ಮಿ ದರ್ಶನ್ ಜೊತೆಗೆ ಪರಪ್ಪನ ಅಗ್ರಹಾರ, ಬಳ್ಳಾರಿ ಜೈಲಿಗೆ ಹೋಗಿ ಬರುತ್ತಿದ್ದ ಕೆಲಸದ ಜೊತೆಗೆ ಕೊನೆಯಲ್ಲಿ ಶ್ಯೂರಿಟಿ ಕೊಡಲೂ ಅವರೇ ಬಂದಿದ್ದರು. ದರ್ಶನ್ ಬಿಡುಗಡೆಯಾಗಿ ಮನೆಗೆ ಹೋಗುವಾಗ ಡ್ರೈವರ್ ಕೆಲಸವನ್ನೂ ಮಾಡಿದ್ದರು. ಈಗ ದರ್ಶನ್ ಆಸ್ಪತ್ರೆಗೆ ದಾಖಲಾಗುವಾಗಲೂ ಅವರು ಜೊತೆ ನಿಂತಿದ್ದಾರೆ. ಈ ಮೂಲಕ ದರ್ಶನ್ ಅಭಿಮಾನಿಗಳ ಹೃದಯವನ್ನೂ ಧನ್ವೀರ್ ಗೆದ್ದಿದ್ದಾರೆ.
