ಅಂಬಾರಿ ಏರಿದ ಲೂಸ್ ಮಾದ ಈಗ ಯೋಗಿಯಾಗುತ್ತಿದ್ದಾನೆ. ಕೆ. ಮಂಜು ನಿರ್ಮಿಸುತ್ತಿರುವ ಯೋಗಿ ಚಿತ್ರದಲ್ಲಿ ಯೋಗೇಶ್ ನಟಿಸುತ್ತಿದ್ದಾರೆ. ಯೋಗೇಶ್‌ಗೆ ಇದು ಮೂರನೇ ಚಿತ್ರ. ಚಿತ್ರದ ಪಾತ್ರ ಇಲ್ಲಿ ಹೊಸದು. ಚಿತ್ರವನ್ನು ಪ್ರಕಾಶ್ ನಿರ್ದೇಶಿಸಲಿದ್ದಾರೆ.
ನಾಯಕ ನಾಯ್ಡು ಹೋಟೆಲ್‌ನಲ್ಲಿ ಸರ್ವರ್ ಆಗಿರುತ್ತಾನೆ. ಅವತ್ತಿನ ಸಂಬಳದ ಜೊತೆ ನೂರು ರೂ. ಟಿಪ್ಸ್ ಸಿಕ್ಕರೆ ಅದೇ ಅವನಿಗೆ ಸ್ವರ್ಗ. ಹೀಗಿರುವಾಗ ನಾಯಕಿ ಎಂಟ್ರಿ ಕೊಡುತ್ತಾಳೆ. ನಂತರ ಇವರಿಬ್ಬರ ಮಧ್ಯೆ ಪ್ರೀತಿ ಹುಟ್ಟುತ್ತದೆ. ಚಿತ್ರದಲ್ಲಿ ಒಂದಿಷ್ಟು ರೌಡಿಸಂ ಕೂಡಾ ಇದೆಯಂತೆ. ನಾಯಕ ತನಗೆ ಗೊತ್ತಿಲ್ಲದ ಹಾಗೆ ಭೂಗತ ಲೋಕ ಪ್ರವೇಶಿಸುತ್ತಾನಂತೆ.
ಸುಮಾರು ಮೂರೂವರೆ ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರಕ್ಕೆ ಇಮ್ರಾನ್ ಅವರ ನೃತ್ಯ ಸಂಯೋಜನೆ ಹಾಗೂ ಇಸ್ಮಾಯಿಲ್ ಅವರ ಕಲಾ ನಿರ್ದೇಶನವಿದೆ.ಈ ಹಿಂದೆ ಪ್ರಕಾಶ್ ಯಮಲೋಕದಲ್ಲಿ ವೀರಪ್ಪನ್ ಚಿತ್ರ ನಿರ್ದೇಶಿಸಿದ್ದರು. ಈ ಚಿತ್ರವನ್ನು ಕೂಡಾ ಮಂಜು ನಿರ್ಮಿಸಿದ್ದರು.