ರೌಡಿಸಂ, ಲವ್ ಸ್ಟೋರಿ ಚಿತ್ರಗಳು ಸಾಲು ಸಾಲಾಗಿ ಬರುತ್ತಿವೆ. ಇವೆಲ್ಲಕ್ಕಿಂತ ಹೊರತಾಗಿ ಬಿಡುಗಡೆ ಸಿದ್ದವಾಗುತ್ತಿರುವ ಚಿತ್ರ 'ಅನು'.
ಮೆಡಿಕಲ್ ಕಾಲೇಜು ವಿದ್ಯಾರ್ಥಿನಿಯ ಕೊಲೆಯ ಸುತ್ತ ನಡೆಯುತ್ತಿರುವ ಚಿತ್ರ ಇದಾಗಿದ್ದು, ಕ್ರೈಂ ರಿಪೋರ್ಟರ್ ಆಗಿ ಪೂಜಾ ಗಾಂಧಿ ನಟಿಸುತ್ತಿದ್ದಾರೆ. ಮೊದಲ ಬಾರಿಗೆ ಸಸ್ಪೆನ್ಸ್ ಹಾಗೂ ಮರ್ಡರ್ ಮಿಸ್ಟ್ರಿ ಇರುವಂತಹ ಸಿನಿಮಾದಲ್ಲಿ ನಟಿಸುತ್ತಿರುವ ಪೂಜಾ ಭರ್ಜರಿ ಫೈಟಿಂಗ್ ದೃಶ್ಯದಲ್ಲಿ ಕಾಣಿಸಿಕೊಂಡಿದ್ದಾರೆ.
ಈಗಾಗಲೇ ತೆಲುಗು ಭಾಷೆಯಲ್ಲಿ ನಿರ್ಮಾಣವಾಗಿ ಯಶಸ್ವಿ ಪ್ರದರ್ಶನ ಕಂಡ ಅನುಸೂಯ ಚಿತ್ರದ ರಿಮೇಕ್ ಇದಾಗಿದ್ದು, ನಾಯಕಿ ಪ್ರಧಾನ ಚಿತ್ರವಾಗಿದೆ. ಚಿತ್ರದ ಚಿತ್ರೀಕರಣ ಮುಗಿದಿದ್ದು, ಸ್ಪೆಷಲ್ ಎಫೆಕ್ಟ್ ಕಾರ್ಯ ನಡೆಯುತ್ತಿದೆ. ಚಿತ್ರವನ್ನು ಶಿವಗಣಪತಿ ನಿರ್ದೇಶಿಸುತ್ತಿದ್ದು, ಬಾಲು ನಿರ್ಮಿಸಿದ್ದಾರೆ. ಕಾಲೇಜು ವಿದ್ಯಾರ್ಥಿನಿಯಾಗಿ ದುನಿಯಾ ಖ್ಯಾತಿಯ ರಶ್ಮಿ ಅಭಿನಯಿಸುತ್ತಿದ್ದಾರೆ.
