ನಟ ನವೀನ್ ಕೃಷ್ಣ ಅಭಿನಯದ ಧಿಮಾಕು ಚಿತ್ರ ಈ ವಾರ ಬಿಡುಗಡೆಯಾಗುತ್ತಿದೆ. ಈಗಾಗಲೇ ಚಿತ್ರಕ್ಕೆ ಎಲ್ಲೆಡೆ ಭರ್ಜರಿ ಪ್ರಚಾರ ನೀಡಲಾಗಿದೆ. ಅನೇಕ ಚಿತ್ರಗಳಲ್ಲಿ ನಟಿಸಿದರೂ ಯಾವುದರಲ್ಲೂ ಯಶಸ್ವಿ ಕಂಡಿರದ ನವೀನ್ ಕೃಷ್ಣ ಈ ಚಿತ್ರದ ಮೇಲೆ ಅತ್ಯಂತ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ.
ಅಂದಹಾಗೆ ಈ ಚಿತ್ರವನ್ನು ರಜನಿಕಾಂತ್ ಕೂಡಾ ನೋಡಲಿದ್ದಾರಂತೆ. ಸದ್ಯದಲ್ಲೇ ಈ ಚಿತ್ರದ ವಿಶೇಷ ಪ್ರದರ್ಶನವನ್ನು ಏರ್ಪಡಿಸಲಿದ್ದು, ಅಲ್ಲಿಗೆ ರಜನಿ ಬಂದು ಚಿತ್ರ ವೀಕ್ಷಿಸಲಿದ್ದಾರಂತೆ. ನವೀನ್ ಕೃಷ್ಣ ಅವರ ಪತ್ನಿಯ ತಂದೆ ಗೋಪಿನಾಥ್ ಹಾಗೂ ರಜನಿ ಸಂಬಂಧಿಕರಾದ್ದರಿಂದ ಈ ಚಿತ್ರವನ್ನು ರಜನಿ ನೋಡಲಿದ್ದಾರೆ. ಚಿತ್ರದ ಬಗ್ಗೆ ಈಗಾಗಲೇ ರಜನಿ ಆಪ್ತ ಸ್ನೇಹಿತರಾದ ರಾಜ್ ಬಹದ್ದೂರ್ ಉತ್ತಮ ಅಭಿಪ್ರಾಯವನ್ನು ರಜನಿಗೆ ನೀಡಿದ್ದಾರಂತೆ.
ಇದರಿಂದಾಗಿ ಚಿತ್ರತಂಡ ಸಂತಸದಲ್ಲಿದೆ. ಈ ಚಿತ್ರವನ್ನು ಮಗನಿಗಾಗಿ ಶ್ರೀನಿವಾಸ ಮೂರ್ತಿ ನಿರ್ಮಿಸಿದ್ದಾರೆ. ಚಿತ್ರಕ್ಕೆ ಸಂಭಾಷಣೆ ಹಾಗೂ ಗೀತರಚನೆಯಲ್ಲಿ ನವೀನ್ ಕೃಷ್ಣ ನೆರವಾಗಿದ್ದಾರೆ. ಈ ಚಿತ್ರವನ್ನು ಗೆಲ್ಲಿಸಲೇಬೇಕೆಂಬ ಹಠದಲ್ಲಿದ್ದಾರೆ ನವೀನ್.
ರಜನಿಕಾಂತ್ ನೋಡಿದ ಕೂಡಲೇ ಚಿತ್ರ ಗೆಲ್ಲುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ಪ್ರೇಕ್ಷಕರಿಗೆ ಇಷ್ಟವಾದರೆ ಮಾತ್ರ ಚಿತ್ರ ಗೆಲ್ಲೋದು.
