ಇಸ್ಲಾಮಾಬಾದ್: ಇರಾನ್ ಮತ್ತು ಇಸ್ರೇಲ್ ನಡುವಿನ ಯುದ್ಧದಲ್ಲಿ ಪಾಕಿಸ್ತಾನ ನಗಲೂ ಆಗದೆ ಅಳಲೂ ಆಗದ ಸ್ಥಿತಿಯಲ್ಲಿದೆ. ಒಂದೆಡೆ ಮಿತ್ರ ಇರಾನ್ ಇನ್ನೊಂದೆಡೆ ದೊಡ್ಡಣ್ಣ ಅಮೆರಿಕಾದ ನಡುವೆ ಪಾಕ್ ಅಡಕತ್ತರಿಯಲ್ಲಿ ಸಿಕ್ಕಂತಾಗಿದೆ.
ಇಸ್ರೇಲ್ ಮತ್ತು ಇರಾನ್ ನಡುವೆ ಯುದ್ಧ ನಡೆಯುತ್ತಿದ್ದಾಗ ಆರಂಭದಲ್ಲಿ ಪಾಕಿಸ್ತಾನ ಸ್ನೇಹಿತ ಇರಾನ್ ಬೆಂಬಲಕ್ಕೆ ರಾಜರೋಷವಾಗಿ ನಿಂತಿತ್ತು. ಅವರ ಕೆಲವು ನಾಯಕರು ನಾವು ಇಸ್ರೇಲ್ ಮೇಲೆ ದಾಳಿ ನಡೆಸುತ್ತೇವೆ ಎಂದೆಲ್ಲಾ ಕೊಚ್ಚಿಕೊಂಡಿದ್ದರು.
ಇದನ್ನು ಅರಿತ ಇಸ್ರೇಲ್ ಸ್ನೇಹಿತ ಅಮೆರಿಕಾ, ಪಾಕಿಸ್ತಾನದ ಸೇನಾ ಮುಖ್ಯಸ್ಥಆಸಿಫ್ ಮುನೀರ್ ರನ್ನು ತನ್ನ ದೇಶಕ್ಕೆ ಕರೆಸಿ ರಾಜಾತಿಥ್ಯ ನೀಡಿದರೋ ಈಗ ದೊಡ್ಡಣ್ಣನ ಮಾತು ಮೀರೋ ಹಾಗಿಲ್ಲ, ಇರಾನ್ ನ್ನು ತೆಗೆದುಹಾಕುವಂತಿಲ್ಲ ಎಂಬಂತಾಗಿದೆ ಪಾಕಿಸ್ತಾನದ ಸ್ಥಿತಿ.
ಮೊದಲೇ ಆರ್ಥಿಕವಾಗಿ ದಿವಾಳಿಯಾಗಿರುವ ಪಾಕಿಸ್ತಾನಕ್ಕೆ ಅಮೆರಿಕವೂ ಬೇಕು, ಇರಾನ್ ಕೂಡಾ ಬೇಕು. ಇರಾನ್ ನಲ್ಲಿ ಈಗಾಗಲೇ ಸಾಕಷ್ಟು ಹೂಡಿಕೆಗಳನ್ನು ಮಾಡಿದೆ. ಅಮೆರಿಕಾದಿಂದ ಬೇಕಾದಾಗ ಸಾಲ ಸಿಗುತ್ತದೆ. ಹೀಗಾಗಿ ಈ ಎರಡೂ ರಾಷ್ಟ್ರಗಳನ್ನೂ ಮೀರುವ ಹಾಗಿಲ್ಲ. ಹೀಗಾಗಿ ಸೋಷಿಯಲ್ ಮೀಡಿಯಾದಲ್ಲಿ ಪಾಕಿಸ್ತಾನ ಈಗ ಸಖತ್ ಟ್ರೋಲ್ ಆಗುತ್ತಿದೆ.
