ರಾತ್ರಿ ನಿದ್ರೆ ಬರುವವರೆಗೂ ಬೆಡ್ ಮೇಲೆ ಮಲಗಿ ಮೊಬೈಲ್ ನೋಡುತ್ತಿದ್ದರೆ ಇದನ್ನು ತಪ್ಪದೇ ಓದಿ

ಇಂದಿನ ಡಿಜಿಟಲ್ ಯುಗದಲ್ಲಿ ಮಲಗುವ ಮುನ್ನ ಬೆಡ್ ಮೇಲೆ ಮಲಗಿ ಮೊಬೈಲ್ ಸ್ಕ್ರಾಲ್ ಮಾಡುವುದು, ವೀಡಿಯೊಗಳನ್ನು ನೋಡುವುದು ಅಥವಾ ಸೋಶಿಯಲ್ ಮೀಡಿಯಾ ಬಳಸುವುದು ಪ್ರತಿಯೊಬ್ಬರ ನಿತ್ಯದ ಅಭ್ಯಾಸವಾಗಿಬಿಟ್ಟಿದೆ. ಆದರೆ, ರಾತ್ರಿ ವೇಳೆಯಲ್ಲಿ ಫೋನ್ ಬಳಸುವ ಈ 'ಚಿಕ್ಕ' ಅಭ್ಯಾಸವು ನಿಮ್ಮ ಶಾರೀರಿಕ ಹಾಗೂ ಮಾನಸಿಕ ಆರೋಗ್ಯದ ಮೇಲೆ ಭೀಕರ ಪರಿಣಾಮ ಬೀರುತ್ತದೆ ಎಂಬುದು ನಿಮಗೆ ತಿಳಿದಿದೆಯೇ? 

ಬ್ಲೂ ಲೈಟ್' ಪ್ರಭಾವ ಮತ್ತು ನಿದ್ರಾಹೀನತೆ
ಸ್ಮಾರ್ಟ್‌ಫೋನ್ ಸ್ಕ್ರೀನ್‌ನಿಂದ ಹೊರಹೊಮ್ಮುವ ನೀಲಿ ಬೆಳಕು ನಮ್ಮ ಮೆದುಳಿಗೆ ಹಗಲಿನ ವಾತಾವರಣದ ಭ್ರಮೆ ಮೂಡಿಸುತ್ತದೆ. ಇದು ದೇಹದಲ್ಲಿ ನಿದ್ರೆಯನ್ನು ಪ್ರಚೋದಿಸುವ 'ಮೆಲಟೋನಿನ್' ಎಂಬ ಹಾರ್ಮೋನ್ ಉತ್ಪತ್ತಿಯನ್ನು ತಡೆಯುತ್ತದೆ. ಇದರಿಂದಾಗಿ ನಿದ್ರೆ ಸರಿಯಾಗಿ ಬಾರದೆ ನಿದ್ರಾಹೀನತೆಯ ಸಮಸ್ಯೆ ಎದುರಾಗುತ್ತದೆ.

ಕಣ್ಣಿನ ಆಯಾಸ ಮತ್ತು ದೃಷ್ಟಿ ದೋಷ
ಕತ್ತಲೆಯಲ್ಲಿ ಮೊಬೈಲ್‌ನ ಪ್ರಕಾಶಮಾನವಾದ ಬೆಳಕನ್ನು ದಿಟ್ಟಿಸಿ ನೋಡುವುದರಿಂದ ಕಣ್ಣುಗಳು ಬೇಗನೆ ಆಯಾಸಗೊಳ್ಳುತ್ತವೆ.  ಕಣ್ಣು ಒಣಗುವುದು, ಕಣ್ಣುರಿ ಮತ್ತು ಉರಿತ, ದೂರದ ದೃಷ್ಟಿ ಮಂಜಾಗುವುದು, ತಲೆನೋವು ಆವರಿಸುವುದು ಕಂಡುಬರುತ್ತದೆ.

ಮೆದುಳಿನ ಆಯಾಸ ಮತ್ತು ಒತ್ತಡ
ಮಲಗುವ ಮುನ್ನ ಸೋಶಿಯಲ್ ಮೀಡಿಯಾದಲ್ಲಿ ಬರುವ ಆತಂಕಕಾರಿ ಸುದ್ದಿಗಳು, ವೀಡಿಯೊಗಳು ಅಥವಾ ಇಮೇಲ್‌ಗಳನ್ನು ನೋಡುವುದರಿಂದ ಮೆದುಳು ಉತ್ತೇಜನಗೊಂಡು ಕೆಲಸ ಮಾಡಲು ಪ್ರಾರಂಭಿಸುತ್ತದೆ. ಇದರಿಂದ ಮನಸ್ಸು ಶಾಂತವಾಗುವ ಬದಲು ಆತಂಕ ಮತ್ತು ಮಾನಸಿಕ ಒತ್ತಡ ಹೆಚ್ಚಾಗುತ್ತದೆ.

ದೈಹಿಕ ಬೊಜ್ಜು ಮತ್ತು ಚಯಾಪಚಯ ದೋಷ
ರಾತ್ರಿ ಸರಿಯಾಗಿ ನಿದ್ರೆ ಮಾಡದಿರುವುದರಿಂದ ದೇಹದ ಚಯಾಪಚಯ ಕ್ರಿಯೆ ಮಂದಗತಿಯಾಗುತ್ತದೆ. ಇದರಿಂದ ಹಾರ್ಮೋನ್‌ಗಳ ಏರುಪೇರಾಗಿ, ಅನಗತ್ಯವಾಗಿ ಹಸಿವಾಗುವುದು ಹಾಗೂ ದೇಹದ ತೂಕ ಮತ್ತು ಬೊಜ್ಜು ಹೆಚ್ಚಾಗುವ ಸಾಧ್ಯತೆ ಇರುತ್ತದೆ.

ದೀರ್ಘಕಾಲದ ಕಾಯಿಲೆಗಳ ಅಪಾಯ
ಪ್ರತಿದಿನ ರಾತ್ರಿ ತಡವಾಗಿ ಮಲಗುವುದು ಮತ್ತು ಸರಿಯಾದ ನಿದ್ರೆ ಇಲ್ಲದಿರುವುದು ದೀರ್ಘಕಾಲದಲ್ಲಿ ರಕ್ತದೊತ್ತಡ, ಮಧುಮೇಹ ಹಾಗೂ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯವನ್ನು ಹೆಚ್ಚಿಸುತ್ತದೆ.