ತಿನ್ನುವಾಗ ನಾಲಿಗೆ ಕಚ್ಚಿ ಗಾಯವಾದರೆ ತಕ್ಷಣ ಏನು ಮಾಡಬೇಕು

ಆಹಾರ ಸೇವಿಸುವಾಗ ಅಥವಾ ಮಾತನಾಡುತ್ತ ತುರತುರಿಯಲ್ಲಿ ಕೆಲವೊಮ್ಮೆ ಆಕಸ್ಮಿಕವಾಗಿ ನಾಲಿಗೆಯನ್ನು ಕಚ್ಚಿಕೊಳ್ಳುವುದು ಸಾಮಾನ್ಯ. ಇದು ವಿಪರೀತ ನೋವನ್ನು ಉಂಟುಮಾಡುವುದಲ್ಲದೆ, ರಕ್ತಸ್ರಾವಕ್ಕೂ ಕಾರಣವಾಗಬಹುದು. ಊಟ ಮಾಡುವಾಗ ನಾಲಿಗೆ ಕಚ್ಚಿ ಗಾಯವಾದರೆ ತಕ್ಷಣವೇ ಕೈಗೊಳ್ಳಬೇಕಾದ ಸರಳ ಹಾಗೂ ಪರಿಣಾಮಕಾರಿ ಕ್ರಮಗಳು ಇಲ್ಲಿವೆ:

ತಣ್ಣನೆಯ ನೀರು ಅಥವಾ ಐಸ್ ಕ್ಯೂಬ್ ಬಳಸಿ
ನಾಲಿಗೆ ಕಚ್ಚಿದ ತಕ್ಷಣವೇ ಒಂದು ತುಂಡು ಐಸ್ ಅಥವಾ ತಣ್ಣನೆಯ ನೀರನ್ನು ಬಾಯಿಗೆ ಹಾಕಿಕೊಳ್ಳಿ. ಐಸ್ ತುಂಡನ್ನು ಗಾಯವಾಗಿರುವ ಜಾಗದ ಮೇಲೆ ಸ್ವಲ್ಪ ಒತ್ತಿಹಿಡಿಯುವುದರಿಂದ ರಕ್ತನಾಳಗಳು ಸಂಕುಚಿತಗೊಂಡು ರಕ್ತಸ್ರಾವವು ತಕ್ಷಣವೇ ನಿಲ್ಲುತ್ತದೆ. ಅಲ್ಲದೆ, ಇದು ಆ ಭಾಗದಲ್ಲಿ ಮರಗಟ್ಟುವಿಕೆಯನ್ನು ಉಂಟುಮಾಡಿ ತೀವ್ರ ನೋವಿನಿಂದ ತಾತ್ಕಾಲಿಕ ಉಪಶಮ ತರುತ್ತದೆ.

ಉಪ್ಪು ನೀರಿನಿಂದ ಬಾಯಿ ಮುಕ್ಕಳಿಸಿ
ಗಾಯವಾದ ಜಾಗದಲ್ಲಿ ಸೋಂಕು ತಗುಲದಂತೆ ತಡೆಯಲು ಉಪ್ಪು ನೀರು ಅತ್ಯಂತ ಪರಿಣಾಮಕಾರಿ ಔಷಧಿಯಾಗಿದೆ. ಉಗುರುಬೆಚ್ಚಗಿನ ನೀರಿಗೆ ಸ್ವಲ್ಪ ಉಪ್ಪನ್ನು ಸೇರಿಸಿ ಚೆನ್ನಾಗಿ ಕರಗಿಸಿ. ನಂತರ ಈ ನೀರಿನಿಂದ ದಿನಕ್ಕೆ 3-4 ಬಾರಿ ಬಾಯಿ ಮುಕ್ಕಳಿಸಿ. ಇದು ಗಾಯವನ್ನು ಬೇಗನೆ ಗುಣಪಡಿಸಲು ಸಹಾಯ ಮಾಡುತ್ತದೆ ಮತ್ತು ಬಾಯಿಯಲ್ಲಿರುವ ಬ್ಯಾಕ್ಟೀರಿಯಾಗಳನ್ನು ನಾಶಪಡಿಸುತ್ತದೆ.

ಜೇನುತುಪ್ಪ ಅಥವಾ ಅರಿಶಿನದ ಲೇಪನ
ಅರಿಶಿನವು ನೈಸರ್ಗಿಕ ಪ್ರತಿಜೀವಕ ಗುಣಗಳನ್ನು ಹೊಂದಿದೆ. ಸ್ವಲ್ಪ ಅರಿಶಿನ ಪುಡಿಗೆ ಹನಿ ಜೇನುತುಪ್ಪವನ್ನು ಬೆರೆಸಿ ನಾಲಿಗೆಯ ಗಾಯವಿರುವ ಜಾಗಕ್ಕೆ ಹಚ್ಚಿಕೊಳ್ಳಿ. ಜೇನುತುಪ್ಪವು ಗಾಯವನ್ನು ತೇವವಾಗಿಟ್ಟುಕೊಂಡು ನೋವು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಮತ್ತು ಅರಿಶಿನವು ಸೋಂಕು ಹಬ್ಬದಂತೆ ತಡೆಯುತ್ತದೆ.

ಮಸಾಲೆಯುಕ್ತ ಮತ್ತು ಹುಳಿ ಪದಾರ್ಥಗಳಿಂದ ದೂರವಿರಿ
ನಾಲಿಗೆಗೆ ಗಾಯವಾದ ತಕ್ಷಣ ಖಾರ, ಹೆಚ್ಚು ಮಸಾಲೆ ಇರುವ ಪದಾರ್ಥಗಳು, ಉಪ್ಪು ಹಾಗೂ ಹುಳಿ ಅಂಶವಿರುವ ಆಹಾರಗಳನ್ನು ತಿನ್ನುವುದನ್ನು ಕೆಲವು ದಿನಗಳವರೆಗೆ ತಪ್ಪಿಸಿ. ಇವುಗಳು ಗಾಯದ ಮೇಲೆ ಬಿದ್ದಾಗ ತೀವ್ರ ಉರಿ ಹಾಗೂ ನೋವು ಹೆಚ್ಚಾಗುತ್ತದೆ. ಸಾಧ್ಯವಾದರೆ ಮೃದುವಾದ ಮತ್ತು ತಣ್ಣನೆಯ ಆಹಾರಗಳನ್ನು ಸೇವಿಸಿ.

ಸಾಮಾನ್ಯವಾಗಿ ನಾಲಿಗೆಯ ಜೀವಕೋಶಗಳು ಬೇಗನೆ ಚೇತರಿಸಿಕೊಳ್ಳುವ ಸಾಮರ್ಥ್ಯ ಹೊಂದಿರುವುದರಿಂದ, ಇಂತಹ ಸಣ್ಣಪುಟ್ಟ ಗಾಯಗಳು 2 ರಿಂದ 3 ದಿನಗಳಲ್ಲಿ ತಾನಾಗಿಯೇ ಗುಣವಾಗುತ್ತವೆ. ಒಂದು ವೇಳೆ ಗಾಯವು ಬಹಳ ಆಳವಾಗಿದ್ದರೆ ಅಥವಾ ಕೆಲವು ದಿನಗಳಾದರೂ ವಾಸಿಯಾಗದಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.