ಡಬ್ಲ್ಯುಪಿಎಲ್ ಫೈನಲ್: ಆರ್ ಸಿಬಿ-ಡೆಲ್ಲಿ ಕ್ಯಾಪಿಟಲ್ಸ್ ನಡುವೆ ಯಾರು ಗೆದ್ದರೂ ಇತಿಹಾಸ

ದೆಹಲಿ: ಡಬ್ಲ್ಯುಪಿಎಲ್ 2 ನೇ ಆವೃತ್ತಿಯ ಫೈನಲ್ ಪಂದ್ಯ ನಾಳೆ ದೆಹಲಿಯ ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆಯಲಿದೆ. ಈ ಮೂಲಕ ಎರಡನೇ ಆವೃತ್ತಿಗೆ ವಿದ್ಯುಕ್ತ ತೆರೆ ಬೀಳಲಿದೆ.

ಫೈನಲ್ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ಮುಖಾಮುಖಿಯಾಗುತ್ತಿದೆ.  ಆರ್ ಸಿಬಿ ಕಳೆದ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಸೋಲಿಸಿ ಫೈನಲ್ ಗೇರಿತ್ತು. ಟೂರ್ನಮೆಂಟ್ ನಲ್ಲಿ ಮುಂಬೈಗೆ ಹೋಲಿಸಿದರೆ ದುರ್ಬಲ ತಂಡವಾಗಿದ್ದ ಆರ್ ಸಿಬಿಗೆ ಈ ಗೆಲುವು ವಿಶೇಷ ಆತ್ಮವಿಶ್ವಾಸ ತಂದುಕೊಡಲಿದೆ.

ಅತ್ತ ಡೆಲ್ಲಿ ಆರಂಭದಿಂದಲೂ ಅತ್ಯುತ್ತಮ ಪ್ರದರ್ಶನ ನೀಡುತ್ತಲೇ ಬಂದಿತ್ತು. ಹಾಗೆ ನೋಡಿದರೆ ಡೆಲ್ಲಿಗೆ ಇದು ಎರಡನೇ ಫೈನಲ್. ಮೊದಲ ಆವೃತ್ತಿಯಲ್ಲಿ ಮುಂಬೈ ವಿರುದ್ಧ ಡೆಲ್ಲಿ ಫೈನಲ್ ಆಡಿ ಸೋತಿತ್ತು. ಹೀಗಾಗಿ ಕಳೆದ ಆವೃತ್ತಿಯ ಸೋಲಿನ ತಪ್ಪು ಮತ್ತೆ ಪುನರಾವರ್ತನೆಯಾಗದಂತೆ ನೋಡಿಕೊಳ್ಳಲಿದೆ.

ಅದೇನೇ ಇದ್ದರೂ ಈ ಡಬ್ಲ್ಯುಪಿಎಲ್ ನಲ್ಲಿ ಆರ್ ಸಿಬಿಯಾಗಲೀ, ಡೆಲ್ಲಿಯಾಗಲೀ ಯಾವುದೇ ತಂಡ ಗೆದ್ದರೂ ಹೊಸ ಇತಿಹಾಸ ನಿರ್ಮಾಣವಾಗಲಿದೆ. ಪುರುಷರ ಐಪಿಎಲ್ ಇರಲಿ, ಮಹಿಳೆಯರ ಡಬ್ಲ್ಯುಪಿಎಲ್ ಇರಲಿ ಇದುವರೆಗೆ ಎರಡೂ ತಂಡಗಳಿಗೂ ಕಪ್ ಗೆಲ್ಲಲು ಸಾಧ‍್ಯವಾಗಿಲ್ಲ. ಹೀಗಾಗಿ ಮಹಿಳೆಯರ ತಂಡಗಳ ಪೈಕಿ ಯಾರೇ ಚಾಂಪಿಯನ್ ಆದರೂ ಅದು ಇತಿಹಾಸವಾಗಲಿದೆ. ಈ ಫೈನಲ್ ಪಂದ್ಯ ನಾಳೆ ಸಂಜೆ 7.30 ಕ್ಕೆ ನಡೆಯಲಿದ್ದು, ಜಿಯೋ ಸಿನಿಮಾದಲ್ಲಿ ನೇರಪ್ರಸಾರ ವೀಕ್ಷಿಸಬಹುದು.