ಅಹಮ್ಮದಾಬಾದ್: ವಿಶ್ವಕಪ್ 2023 ಫೈನಲ್ ಪಂದ್ಯ ಗೆದ್ದ ಆಸ್ಟ್ರೇಲಿಯಾ ಆಟಗಾರರ ಸಂಭ್ರಮ ಮುಗಿಲು ಮುಟ್ಟಿತ್ತು. ಆದರೆ ಈ ನಡುವೆ ಕ್ರಿಕೆಟಿಗ ಮಿಚೆಲ್ ಮಾರ್ಷ್ ಕಪ್ ಗೆ ಅವಮಾನ ಮಾಡಿದ ಪ್ರಕರಣ ನಡೆದಿದೆ.
ಟೂರ್ನಮೆಂಟ್ ಗೆದ್ದ ಖುಷಿಯಲ್ಲಿ ಮಿಚೆಲ್ ಮಾರ್ಚ್ ಡ್ರೆಸ್ಸಿಂಗ್ ರೂಂನಲ್ಲಿ ವಿಶ್ವಕಪ್ ಮೇಲೆ ಕಾಲೆತ್ತಿ ಹಾಕಿ ಕುಳಿತು ಥಮ್ಸ್ ಅಪ್ ಮಾಡುತ್ತಿರುವ ಫೋಟೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಈ ಫೋಟೋ ನೋಡಿ ನೆಟ್ಟಿಗರು ಕನಿಷ್ಠ ಪಕ್ಷ ನಿಮ್ಮ ಪರಿಶ್ರಮಕ್ಕಾದರೂ ಬೆಲೆ ಕೊಡಿ. ಅದು ವಿಶ್ವಕಪ್. ಅದಕ್ಕಾದರೂ ಬೆಲೆ ಬೇಡವೇ? ಅದರ ಮೇಲೆಯೇ ಕಾಲು ಇಟ್ಟು ಕೂತಿದ್ದೀರಲ್ಲಾ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ವಿಶ್ವಕಪ್ ಗೆ ಹೇಗೆ ಗೌರವ ಕೊಡಬೇಕು ಎಂದು ಭಾರತೀಯರನ್ನು ನೋಡಿ ಕಲಿಯಿರಿ ಎಂದು ಧೋನಿ, ಸಚಿನ್ ಈ ಹಿಂದೆ ಗೆದ್ದಾಗ ಕಪ್ ಗೆ ಮುತ್ತಿಕ್ಕಿ ಗೌರವ ಸಲ್ಲಿಸಿದ ಫೋಟೋ ಪ್ರಕಟಿಸಿ ಟಾಂಗ್ ಕೊಟ್ಟಿದ್ದಾರೆ.
ಕಳೆದ ಬಾರಿ ಇಂಗ್ಲೆಂಡ್ ವಿಶ್ವಕಪ್ ಗೆದ್ದಾಗ ಶೂಗೆ ವೈನ್ ಹಾಕಿ ಕುಡಿದು ಸಂಭ್ರಮಿಸಿದ್ದರು. ಇದು ಅವರ ಸಂಪ್ರದಾಯವಾಗಿದ್ದರೂ ಅವರ ಈ ಅತಿರೇಕದ ವರ್ತನೆಗೆ ಭಾರೀ ಟೀಕೆ ವ್ಯಕ್ತವಾಗಿತ್ತು.
