Video: ಕೆಎಲ್ ರಾಹುಲ್ ಗೆ ಸಂಜೀವ್ ಗೊಯೆಂಕಾ ಜೊತೆ ಆದ ಸಮಸ್ಯೆಗಳೇನು: ಓಪನ್ ಆಗಿ ಹೇಳಿದ ಕ್ರಿಕೆಟಿಗ

Photo Credit: X

ಐಪಿಎಲ್‌ನಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ತಂಡದ ನಾಯಕರಾಗಿ ಮೂರು ಆವೃತ್ತಿಗಳಲ್ಲಿ ತಂಡವನ್ನು ಮುನ್ನಡೆಸಿದ್ದ ಕನ್ನಡಿಗ ಕೆ.ಎಲ್. ರಾಹುಲ್, ಆ ತಂಡವನ್ನು ತೊರೆಯಲು ಕಾರಣವಾದ ಸಂದರ್ಭಗಳು ಮತ್ತು ತಮ್ಮ ಮನಸ್ಥಿತಿಯ ಕುರಿತು ಸಂದರ್ಶನವೊಂದರಲ್ಲಿ ಮುಕ್ತವಾಗಿ ಮಾತನಾಡಿದ್ದಾರೆ.

ಐಪಿಎಲ್ 2024ರ ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದ ಸೋಲಿನ ನಂತರ, ಎಲ್.ಎಸ್.ಜಿ ಮಾಲೀಕ ಸಂಜೀವ್ ಗೋಯೆಂಕಾ ಮೈದಾನದಲ್ಲೇ ಕೆ.ಎಲ್. ರಾಹುಲ್ ಅವರೊಂದಿಗೆ ಖಾರವಾಗಿ ಮಾತನಾಡಿದ್ದ ವೀಡಿಯೊ ವ್ಯಾಪಕ ಚರ್ಚೆಗೆ ಗ್ರಾಸವಾಗಿತ್ತು. ಈ ಕುರಿತು ಮೌನ ಮುರಿದ ರಾಹುಲ್, "ಮೈದಾನದಲ್ಲಿ ನಡೆದ ಆ ಘಟನೆ ನಿಜಕ್ಕೂ ಸರಿ ಇರಲಿಲ್ಲ. ಅದು ಇಡೀ ತಂಡದ ಮೇಲೆ ಮತ್ತು ಡ್ರೆಸ್ಸಿಂಗ್ ರೂಮ್‌ನ ವಾತಾವರಣದ ಮೇಲೆ ಪರಿಣಾಮ ಬೀರಿತು" ಎಂದು ಒಪ್ಪಿಕೊಂಡಿದ್ದಾರೆ.

ತಂಡ ತೊರೆಯುವ ನಿರ್ಧಾರದ ಕುರಿತು ಮಾತನಾಡಿದ ರಾಹುಲ್, "ನನಗೆ ಹೊಸದಾಗಿ ಆಟವನ್ನು ಆರಂಭಿಸುವ ಬಯಕೆಯಿತ್ತು. ಆಟಗಾರನಾಗಿ ನನಗೆ ಕೊಂಚ ಸ್ವಾತಂತ್ರ್ಯ ಸಿಗುವ ಮತ್ತು ಹಗುರವಾದ ವಾತಾವರಣವಿರುವ ತಂಡದಲ್ಲಿ ಆಡಬೇಕೆನಿಸಿತು. ಐಪಿಎಲ್‌ನಲ್ಲಿ ಈಗಾಗಲೇ ಒತ್ತಡ ಹೆಚ್ಚಿರುತ್ತದೆ, ಇಂತಹ ಸಮಯದಲ್ಲಿ ತಂಡದ ಒಳಗಿನ ವಾತಾವರಣ ಶಾಂತವಾಗಿರುವುದು ಮುಖ್ಯ" ಎಂದಿದ್ದಾರೆ.

ಐಪಿಎಲ್ ನಾಯಕತ್ವದ ಸವಾಲುಗಳ ಕುರಿತು ಮಾತನಾಡುತ್ತಾ, "ಅಂತರರಾಷ್ಟ್ರೀಯ ಕ್ರಿಕೆಟ್‌ಗಿಂತ ಐಪಿಎಲ್ ಆಡುವುದು ಮಾನಸಿಕವಾಗಿ ಮತ್ತು ದೈಹಿಕವಾಗಿ ಆಯಾಸ ತರುತ್ತದೆ. ಪಂದ್ಯ ಮುಗಿದ ಮೇಲೆ ಕ್ರಿಕೆಟೇತರ ಹಿನ್ನೆಲೆಯಿಂದ ಬಂದ ಫ್ರಾಂಚೈಸಿ ಮಾಲೀಕರಿಗೆ ಪ್ರತಿ ನಿರ್ಧಾರವನ್ನೂ (ಉದಾಹರಣೆಗೆ: ಆಟಗಾರರ ಆಯ್ಕೆ, ಪಂದ್ಯದ ಸೋಲು-ಗೆಲುವು) ವಿವರಿಸಿ ಉತ್ತರ ನೀಡುವುದು ಅತ್ಯಂತ ಕಷ್ಟಕರ ಹಾಗೂ ಶಕ್ತಿ ಹೀರುವ ಕೆಲಸ" ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಗುಜರಾತ್ ಟೈಟಾನ್ಸ್ ನಂತಹ ತಂಡಗಳನ್ನು ಉದಾಹರಿಸಿದ ಅವರು, "ಆ ತಂಡಗಳು ಗೆದ್ದರೂ ಅಥವಾ ಸೋತರೂ ಅತ್ಯಂತ ಶಾಂತವಾಗಿ ಮತ್ತು ಸಮತೋಲನದಿಂದ ಇರುತ್ತವೆ. ಆಟಗಾರರಿಗೆ ಉತ್ತಮ ಪ್ರದರ್ಶನ ನೀಡಲು ಇಂತಹ ವಾತಾವರಣವೇ ಸಹಕಾರಿ" ಎಂದು ಅಭಿಪ್ರಾಯಪಟ್ಟಿದ್ದಾರೆ.

pic.twitter.com/XPMQ6IoTOV — Mahi Patel (@Mahi_Patel_07) August 3, 2026