ಅಂತಾರಾಷ್ಟ್ರೀಯ ಕ್ರಿಕೆಟ್ ಗೆ ಗುಡ್ ಬೈ ಹೇಳಿದ ಅಜಿಂಕ್ಯಾ ರೆಹಾನೆ

ಭಾರತೀಯ ಟೆಸ್ಟ್ ಕ್ರಿಕೆಟ್ ತಂಡದ ಅತ್ಯಂತ ಪಂಥಾಹ್ವಾನಾತ್ಮಕ ಹಾಗೂ ನಂಬಿಗಸ್ತ ಬ್ಯಾಟರ್, ಮಾಜಿ ನಾಯಕ ಅಜಿಂಕ್ಯ ರಹಾನೆ ಅವರು ಇಂದು ಅಂತರರಾಷ್ಟ್ರೀಯ ಕ್ರಿಕೆಟ್ ಸೇರಿದಂತೆ ಎಲ್ಲಾ ಮಾದರಿಯ ಕ್ರಿಕೆಟ್‌ನಿಂದ ನಿವೃತ್ತಿ ಪ್ರಕಟಿಸಿದ್ದಾರೆ.

ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಭಾವುಕ ವೀಡಿಯೊ ಒಂದನ್ನು ಹಂಚಿಕೊಂಡಿರುವ 38 ವರ್ಷದ ರಹಾನೆ, "ಬದುಕಿನಲ್ಲಿ ಪ್ರತಿಯೊಂದಕ್ಕೂ ಆರಂಭ ಮತ್ತು ಅಂತ್ಯವಿರುತ್ತದೆ. ಕ್ರಿಕೆಟ್‌ನಿಂದ ಹೊರನಡೆಯಲು ಇದು ಸೂಕ್ತ ಸಮಯ" ಎಂದು ಹೇಳುವ ಮೂಲಕ ತಮ್ಮ 17 ವರ್ಷಗಳ ಸುದೀರ್ಘ ಕ್ರಿಕೆಟ್ ಪಯಣಕ್ಕೆ ತೆರೆ ಎಳೆದಿದ್ದಾರೆ.

ಟೆಸ್ಟ್ ಕ್ರಿಕೆಟ್ ನಲ್ಲಿ 85 ಪಂದ್ಯವಾಡಿರುವ ರೆಹಾನೆ 12 ಶತಕ ಸೇರಿದಂತೆ 5,077 ರನ್ ಗಳಿಸಿದ್ದಾರೆ. 90 ಏಕದಿನ ಪಂದ್ಯಗಳಿಂದ 2962 ರನ್ ಗಳಿಸಿದ್ದು ಇದರಲ್ಲಿ 3 ಶತಕ ಸೇರಿದೆ. 20 ಟಿ20 ಪಂದ್ಯವಾಡಿದ್ದು 375 ರನ್ ಗಳಿಸಿದ್ದಾರೆ. 

ರಹಾನೆ ವೃತ್ತಿಜೀವನದ ಐತಿಹಾಸಿಕ ಮೈಲಿಗಲ್ಲುಗಳು

ಆಸ್ಟ್ರೇಲಿಯಾ ನೆಲದಲ್ಲಿ ಐತಿಹಾಸಿಕ ಬಾರ್ಡರ್-ಗವಾಸ್ಕರ್ ಟ್ರೋಫಿ ಗೆಲುವು (2020-21):

ವಿರಾಟ್ ಕೊಹ್ಲಿ ಗೈರುಹಾಜರಿಯಲ್ಲಿ ಹಾಗೂ ಸಾಲು ಸಾಲು ಆಟಗಾರರು ಗಾಯಗೊಂಡಿದ್ದ ಸಂದರ್ಭದಲ್ಲಿ ಭಾರತ ತಂಡದ ನಾಯಕತ್ವ ವಹಿಸಿಕೊಂಡಿದ್ದ ರಹಾನೆ, ಮೆಲ್ಬೋರ್ನ್‌ನಲ್ಲಿ ಸ್ಮರಣೀಯ ಶತಕ ಸಿಡಿಸಿ ಆಸ್ಟ್ರೇಲಿಯಾ ವಿರುದ್ಧ 2-1 ಅಂತರದ ಐತಿಹಾಸಿಕ ಟೆಸ್ಟ್ ಸರಣಿ ಗೆಲುವಿಗೆ ಕಾರಣರಾದರು.

ವಿದೇಶಿ ನೆಲದಲ್ಲಿ ಕಠಿಣ ಪರಿಸ್ಥಿತಿಗಳ ಮಾಸ್ಟರ್:

ಇಂಗ್ಲೆಂಡ್‌ನ ಲಾರ್ಡ್ಸ್ ಅಂಗಳದಲ್ಲಿ (2014) ಸಿಡಿಸಿದ ಪಂದ್ಯಶ್ರೇಷ್ಠ ಶತಕ, ಮೆಲ್ಬೋರ್ನ್, ನ್ಯೂಜಿಲ್ಯಾಂಡ್ ಹಾಗೂ ದಕ್ಷಿಣ ಆಫ್ರಿಕಾದ ಕಠಿಣ ಪಿಚ್‌ಗಳಲ್ಲಿ ರಹಾನೆ ಬಾರಿಸಿದ ಶತಕಗಳು ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಸದಾ ನೆನಪಿನಲ್ಲಿರುತ್ತವೆ.

ಕ್ಲಾಸಿಕ್ ಸ್ಲಿಪ್ ಫೀಲ್ಡರ್:

ಬ್ಯಾಟಿಂಗ್ ಮಾತ್ರವಲ್ಲದೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತದ ಸ್ಲಿಪ್ ವಿಭಾಗದಲ್ಲಿ ಅತ್ಯಂತ ಸುರಕ್ಷಿತ ಕೈಗಳನ್ನು ಹೊಂದಿದ್ದ ರಹಾನೆ, ಕ್ಯಾಚ್‌ಗಳ ಮೂಲಕವೇ ಹಲವು ಪಂದ್ಯಗಳ ದಿಕ್ಕನ್ನೇ ಬದಲಾಯಿಸಿದ್ದಾರೆ. ತಮ್ಮ ವಿದಾಯದ ಸಂದರ್ಭದಲ್ಲಿ ಬಿಸಿಸಿಐ (BCCI), ಮುಂಬೈ ಕ್ರಿಕೆಟ್ ಅಸೋಸಿಯೇಷನ್ (MCA), ಸಹ ಆಟಗಾರರು, ಕುಟುಂಬಸ್ಥರು ಹಾಗೂ ಅಭಿಮಾನಿಗಳಿಗೆ ರಹಾನೆ ಕೃತಜ್ಞತೆ ಸಲ್ಲಿಸಿದ್ದಾರೆ.