ಏಕದಿನ ವಿಶ್ವಕಪ್: ಸೆಮಿಫೈನಲ್ ಒಂದು ಸ್ಥಾನಕ್ಕಾಗಿ ಮೂರು ತಂಡಗಳ ಪೈಪೋಟಿ

ಮುಂಬೈ: ಐಸಿಸಿ ಏಕದಿನ ವಿಶ್ವಕಪ್ ಕ್ರಿಕೆಟ್ 2023 ರ ಸೆಮಿಫೈನಲ್ ಹಂತ ತಲುಪುವ ತಂಡಗಳ ಪಟ್ಟಿಯಲ್ಲಿ ಈಗ ಒಂದು ಸ್ಥಾನಕ್ಕೆ ಪೈಪೋಟಿಯಿದೆ.

ಭಾರತ ಮೊದಲನೆಯ ತಂಡವಾಗಿ ಸೆಮಿಫೈನಲ್ ಪ್ರವೇಶಿಸಿದ್ದರೆ, ದ.ಆಫ್ರಿಕಾ, ಆಸ್ಟ್ರೇಲಿಯಾ ಮತ್ತೆರಡು ತಂಡಗಳಾಗಿವೆ. ಆದರೆ ನಾಲ್ಕನೇ ತಂಡ ಯಾವುದು ಎಂಬ ಪ್ರಶ್ನೆಗೆ ಉತ್ತರ ಸಿಕ್ಕಿಲ್ಲ. ಈ ಸ್ಥಾನಕ್ಕೆ ನ್ಯೂಜಿಲೆಂಡ್, ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನ ನಡುವೆ ಪೈಪೋಟಿಯಿದೆ.

ಈ ಪೈಕಿ ಕಿವೀಸ್ ಗೆ ಹೆಚ್ಚಿನ ಅವಕಾಶವಿದೆ. ಹೀಗಾಗಿ ಇಂದು ಲಂಕಾ ವಿರುದ್ಧ ಗೆದ್ದರೆ ನ್ಯೂಜಿಲೆಂಡ್ ಸೆಮಿಫೈನಲ್ ಹಾದಿ ಸುಗಮವಾಗಲಿದೆ. ಕಿವೀಸ್ ಇದುವರೆಗೆ ಆಡಿದ 8 ಪಂದ್ಯಗಳ ಪೈಕಿ 4 ರಲ್ಲಿ ಗೆಲುವು ಸಾಧಿಸಿದೆ. ಇತ್ತ ಪಾಕ್ ಕೂಡಾ 8 ರಿಂದ 4 ಗೆಲುವು ಸಂಪಾದಿಸಿದೆ. ಆದರೆ ರನ್ ರೇಟ್ ನಲ್ಲಿ ಪಾಕ್ ಹಿಂದಿದೆ. ಇನ್ನು ಅಫ್ಘಾನಿಸ್ತಾನದ್ದೂ ಇದೇ ಕತೆ. ಕಳೆದ ಪಂದ್ಯದಲ್ಲಿ ಆಸೀಸ್ ವಿರುದ್ಧ ಗೆದ್ದಿದ್ದರೆ ಅಫ್ಘಾನಿಸ್ತಾನವೇ ಸೆಮಿಫೈನಲ್ ಗೇರುತ್ತಿತ್ತು. ಆದರೆ ಸೋತಿದ್ದರಿಂದ 8 ಪಂದ್ಯಗಳಿಂದ 4 ಗೆಲುವು ಸಂಪಾದಿಸಿರುವ ಅಫ್ಘಾನಿಸ್ತಾನ ಈ ಉಳಿದಿರುವ ಒಂದೇ ಪಂದ್ಯದಲ್ಲಿ ಭಾರೀ ರನ್ ರೇಟ್ ಅಂತರದಲ್ಲಿ ಗೆಲುವು ಕಾಣಬೇಕಿದೆ. ಹಾಗಿದ್ದರೂ ಸೆಮಿಫೈನಲ್ ಹಾದಿ ಕಷ್ಟವೇ.