ಹಾರ್ದಿಕ್ ಪಾಂಡ್ಯಗೆ ತಲೆಬಿಸಿ ತಂದಿಟ್ಟ ಶಿವಂ ದುಬೆ

Photo Courtesy: Twitter

ಚೆನ್ನೈ: ಐಪಿಎಲ್ 2024 ರಲ್ಲೂ ತನ್ನ ಭರ್ಜರಿ ಫಾರ್ಮ್ ಮುಂದುವರಿಸಿರುವ ಯುವ ಆಲ್ ‍ರೌಂಡರ್ ಶಿವಂ ದುಬೆ ಇದೀಗ ಟಿ20 ವಿಶ್ವಕಪ್ ಆಡಲಿರುವ ಟೀಂ ಇಂಡಿಯಾದಲ್ಲಿ ಸ್ಥಾನ ಭದ್ರಪಡಿಸಿಕೊಳ್ಳುತ್ತಿದ್ದಾರೆ.

ಶಿವಂ ದುಬೆ ಅದ್ಭುತ ಫಾರ್ಮ್ ಖಂಡಿತವಾಗಿಯೂ ಹಾರ್ದಿಕ್ ಪಾಂಡ್ಯ ನಿದ್ದೆಗೆಡಿಸಲಿದೆ. ಕಳೆದ ಅಫ್ಘಾನಿಸ್ತಾನ ವಿರುದ್ಧದ ಟಿ20 ಸರಣಿಯಲ್ಲಿ ಟೀಂ ಇಂಡಿಯಾ ಪರ ಹಾರ್ದಿಕ್ ಅನುಪಸ್ಥಿತಿಯಲ್ಲಿ ಶಿವಂ ದುಬೆ ಅದ್ಭುತವಾಗಿ ತನ್ನ ಪಾತ್ರ ನಿಭಾಯಿಸಿದ್ದರು. ಬ್ಯಾಟಿಂಗ್, ಬೌಲಿಂಗ್ ಎರಡರಲ್ಲೂ ಮಿಂಚಿದ್ದು ಟೀಂ ಇಂಡಿಯಾದ ದೊಡ್ಡ ತಲೆನೋವು ನಿವಾರಿಸಿದ್ದರು.

ಇದೀಗ ಐಪಿಎಲ್ ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಪರ ಅದೇ ಫಾರ್ಮ್ ಮುಂದುವರಿಸಿದ್ದಾರೆ. ಅವರು ಐಪಿಎಲ್ ನಲ್ಲೂ ಇದೇ ರೀತಿ ಆಡುತ್ತಿದ್ದರೆ ಮುಂಬರುವ ಟಿ20 ವಿಶ್ವಕಪ್ ಗೆ ಟೀಂ ಇಂಡಿಯಾದಲ್ಲಿ ಸ್ಥಾನ ಪಡೆಯುವುದು ಖಚಿತವಾಗಿದೆ. ಇದರ ಜೊತೆಗೆ ಹಾರ್ದಿಕ್ ಪಾಂಡ್ಯ ಮೇಲೆ ಒತ್ತಡ ಬೀಳಲಿದೆ.

ಶಿವಂ ದುಬೆ ಮಿಂಚಿ, ಹಾರ್ದಿಕ್ ಪಾಂಡ್ಯ ಐಪಿಎಲ್ ನಲ್ಲಿ ನಿರೀಕ್ಷಿತ ಪ್ರದರ್ಶನ ನೀಡದೇ ಇದ್ದರೆ ಆಯ್ಕೆಗಾರರು ಖಂಡಿತವಾಗಿಯೂ ದುಬೆಗೇ ಮಣೆ ಹಾಕಲಿದ್ದಾರೆ. ಈಗಾಗಲೇ ವಿರಾಟ್ ಕೊಹ್ಲಿಗೇ ಕೊಕ್ ಕೊಡಲು ಸಿದ್ಧರಾಗಿರುವ ಆಯ್ಕೆಗಾರರಿಗೆ ಹಾರ್ದಿಕ್ ರನ್ನು ಹೊರಹಾಕುವುದು ಕಷ್ಟವಾಗಲಾರದು. ಹೀಗಾಗಿ ಶಿವಂ ದುಬೆ, ಈಗ ಹಾರ್ದಿಕ್ ಪಾಂಡ್ಯ ಸ್ಥಾನಕ್ಕೆ ಕುತ್ತು ತರುವ ಲಕ್ಷಣವಿದೆ.