ಪ್ರಧಾನಿ ಭೇಟಿಗೆ ಸಿದ್ಧರಾದ ಚಾಂಪಿಯನ್ ಭಾರತ ಮಹಿಳಾ ಕ್ರಿಕೆಟಿಗರು: ಮೋದಿಗೆ ಏನು ಗಿಫ್ಟ್ ಕೊಡಲಿದ್ದಾರೆ

ನವದೆಹಲಿ: ಏಕದಿನ ವಿಶ್ವಕಪ್ ಗೆದ್ದ ಭಾರತ ಮಹಿಳಾ ಕ್ರಿಕೆಟ್ ತಂಡ ಇಂದು ಪ್ರಧಾನಿ ಮೋದಿಯವರನ್ನು ಭೇಟಿ ಮಾಡಲಿದೆ. ಪ್ರಧಾನಿಗೆ ಮಹಿಳಾ ತಾರೆಯರು ಏನು ಗಿಫ್ಟ್ ನೀಡುತ್ತಾರೆ ಇಲ್ಲಿದೆ ಮಾಹಿತಿ.

ನವಿ ಮುಂಬೈನ ಡಿವೈ ಪಾಟೀಲ್ ಸ್ಟೇಡಿಯಂನಲ್ಲಿ ದಕ್ಷಿಣ ಆಫ್ರಿಕಾವನ್ನು 52 ರನ್ ಗಳಿಂದ ಸೋಲಿಸಿದ ಮಹಿಳಾ ಕ್ರಿಕೆಟಿಗರು ಇತಿಹಾಸ ನಿರ್ಮಿಸಿದ್ದರು. ಇದೀಗ ಪುರುಷ ಕ್ರಿಕೆಟಿಗರಂತೇ ಮಹಿಳಾ ಕ್ರಿಕೆಟಿಗರನ್ನೂ ಭೇಟಿ ಮಾಡಲು ಪ್ರಧಾನಿ ಕಚೇರಿಯಿಂದಲೇ ಅಧಿಕೃತ ಆಹ್ವಾನ ಬಂದಿದೆ.

ಇದಕ್ಕಾಗಿ ನಿನ್ನೆಯೇ ಮಹಿಳಾ ತಾರೆಯರು ದೆಹಲಿಗೆ ಬಂದಿಳಿದಿದ್ದಾರೆ. ದೆಹಲಿಗೆ ಬಂದಿಳಿದ ಆಟಗಾರರಿಗೆ ಭರ್ಜರಿ ಸ್ವಾಗತ ನೀಡಲಾಗಿದೆ. ಇಂದು ಪ್ರಧಾನಿ ನಿವಾಸಕ್ಕೆ ಭೇಟಿ ನೀಡಲಿದ್ದಾರೆ. ಈ ವೇಳೆ ಕ್ರಿಕೆಟಿಗರ ಜೊತೆ ಪ್ರಧಾನಿ ಮೋದಿ ಸಂವಾದವನ್ನೂ ನಡೆಸಲಿದ್ದಾರೆ.

ಇನ್ನು, ಪ್ರಧಾನಿ ಮೋದಿಗೆ ಉಡುಗೊರೆಯನ್ನು ನೀಡುವುದಾಗಿ ಕ್ರಿಕೆಟ್ ಆಟಗಾರ್ತಿ ದೀಪ್ತಿ ಶರ್ಮಾ ಹೇಳಿದ್ದಾರೆ. ಪ್ರಧಾನಿ ಭೇಟಿ ವೇಳೆ ಏನಾದರೂ ಉಡುಗೊರೆ ಖಂಡಿತಾ ನೀಡಲಿದ್ದೇವೆ. ಏನು ನೀಡಬೇಕು ಎಂದು ಇನ್ನೂ ನಿರ್ಧರಿಸಿಲ್ಲ. ಸಹಿ ಹಾಕಿ ಬ್ಯಾಟ್, ಟಿ ಶರ್ಟ್ ಏನಾದರೂ ಒಂದು ಸ್ಮರಣೀಯವಾಗಿರುವ ಉಡುಗೊರೆ ಖಂಡಿತಾ ನೀಡಲಿದ್ದೇವೆ ಎಂದಿದ್ದಾರೆ.