ಐಪಿಎಲ್ 2024: ಗೆಲುವಿನ ಒತ್ತಡದಲ್ಲಿರುವ ಎಸ್ಆರ್ ಎಚ್ ಗೆ ಇಂದು ರಾಜಸ್ಥಾನ್ ರಾಯಲ್ಸ್ ಎದುರಾಳಿ

ಹೈದರಾಬಾದ್: ಐಪಿಎಲ್ 2024 ರಲ್ಲಿ ಇಂದು ಸನ್ ರೈಸರ್ಸ್ ಹೈದರಾಬಾದ್ ತವರು ಮೈದಾನದಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಆಡಲಿದೆ. ಇಂದು ಮತ್ತೆ ಗೆಲುವಿನ ಹಳಿಗೆ ಮರಳುವ ವಿಶ್ವಾಸದಲ್ಲಿದೆ.

ಸನ್ ರೈಸರ್ಸ್ ಹೈದರಾಬಾದ್ ಹೊಡೆಬಡಿಯ ಆಟದಿಂದ ಈ ಟೂರ್ನಿ ಗೆಲ್ಲುವ ನೆಚ್ಚಿನ ತಂಡ ಎಂದು ಭರವಸೆ ಮೂಡಿಸಿತ್ತು. ಆದರೆ ಕಳೆದ ಎರಡು ಪಂದ್ಯಗಳಲ್ಲಿ ಪ್ಯಾಟ್ ಕುಮಿನ್ಸ್ ತಂಡ ಸತತ ಎರಡು ಸೋಲು ಕಂಡಿದೆ. ಎರಡೂ ಪಂದ್ಯಗಳಲ್ಲಿ ಹೈದರಾಬಾದ್ ಬ್ಯಾಟಿಂಗ್ ಕೈಕೊಟ್ಟಿತ್ತು. ಇದೀಗ ಅಂಕಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿರುವ ಹೈದರಾಬಾದ್ ಗೆಲ್ಲಲೇಬೇಕಾದ ಒತ್ತಡದಲ್ಲಿದೆ.

ಪ್ಲೇ ಆಫ್ ಹಂತಕ್ಕೇರಲು ಆರ್ ಸಿಬಿಗೆ ಇನ್ನೂ 6 ಅಂಕ ಬೇಕು. ಈಗ 9 ಪಂದ್ಯಗಳು ನಡೆದಿದ್ದು ಉಳಿದ ಐದು ಪಂದ್ಯಗಳಿಂದ ಹೈದರಾಬಾದ್ 6 ಅಂಕ ಗಳಿಸಬೇಕು. ಸದ್ಯಕ್ಕೆ ಟಾಪ್ 3 ಸ್ಥಾನಕ್ಕಾಗಿ ಭಾರೀ ಪೈಪೋಟಿಯಿದ್ದು, ಹೈದರಾಬಾದ್ ಇಂದಿನ ಪಂದ್ಯ ಗೆದ್ದರೆ ಮಾತ್ರ ಉಳಿಗಾಲ.

ಇನ್ನೊಂದೆಡೆ ಹೈದರಾಬಾದ್ ಗೆ ಎದುರಾಳಿಯಾಗಿರುವ ರಾಜಸ್ಥಾನ್ ಈಗಾಗಲೇ 16 ಅಂಕ ಸಂಪಾದಿಸಿದ್ದು ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನ ಕಾಯ್ದುಕೊಂಡು ಪ್ಲೇ ಆಫ್ ಗೆ ಬಹುತೇಕ ಸ್ಥಾನ ಖಚಿತಪಡಿಸಿಕೊಂಡಿದೆ. ಸಂಜು ಸ್ಯಾಮ್ಸನ್ ಪಡೆ ಈ ಬಾರಿ ಆಡಿದ 9 ಪಂದ್ಯಗಳಿಂದ 8 ಗೆಲುವು ಕಂಡಿದೆ. ಹೀಗಾಗಿ ರಾಜಸ್ಥಾನ್ ಗೆ ಈ ಪಂದ್ಯದ ಫಲಿತಾಂಶ ಹೆಚ್ಚೇನೂ ಪರಿಣಾಮ ಬೀರದು. ಹಾಗಿದ್ದರೂ ಇದುವರೆಗಿನ ಫಾರ್ಮ್ ಗಮನಿಸಿದರೆ ಇಂದು ಎರಡೂ ತಂಡಗಳ ನಡುವೆ ಜಿದ್ದಾಜಿದ್ದಿನ ಪೈಪೋಟಿ ನಿರೀಕ್ಷಿಸಬಹುದು. ಈ ಪಂದ್ಯ ಸಂಜೆ 7.30ಕ್ಕೆ ಆರಂಭವಾಗುವುದು.