ಸೆಂಚೂರಿಯನ್: ದ.ಆಫ್ರಿಕಾ ವಿರುದ್ಧ ಮೊದಲ ಟೆಸ್ಟ್ ಪಂದ್ಯದಲ್ಲಿ ವೇಗದ ಪಿಚ್‍ ನಲ್ಲಿ ಟೀಂ ಇಂಡಿಯಾ ಟಾಪ್ ಆರ್ಡರ್ ಕುಸಿದು ಕೂತಾಗ ಕನ್ನಡಿಗ ಬ್ಯಾಟಿಗ ಕೆಎಲ್ ರಾಹುಲ್ ಭಾರತದ ಪಾಲಿಗೆ ರಕ್ಷಕನಾಗಿದ್ದಾರೆ.
ಮೊದಲ ದಿನದಾಟದಲ್ಲಿ ಭಾರತ 8 ವಿಕೆಟ್ ನಷ್ಟಕ್ಕೆ 208 ರನ್ ಗಳಿಸಿತ್ತು. ಭಾರತ ಈ ಗೌರವಯುತ ಮೊತ್ತ ಗಳಿಸಲು ಕಾರಣವಾಗಿದ್ದು ಕೆಎಲ್ ರಾಹುಲ್. ಇಡೀ ಭಾರತದ ಇನಿಂಗ್ಸ್ ಹೆಗಲ ಮೇಲೆ ಹೊತ್ತು ನಡೆದಿದ್ದಾರೆ. ನಿನ್ನೆಯ ದಿನದಂತ್ಯಕ್ಕೆ ಅಜೇಯ 70 ರನ್ ಗಳಿಸಿ ಕ್ರೀಸ್ ಕಾಯ್ದುಕೊಂಡಿದ್ದಾರೆ.
ಕೆಎಲ್ ರಾಹುಲ್ ಈ ಇನಿಂಗ್ಸ್ ನಲ್ಲಿ ಬ್ಯಾಟಿಂಗ್ ಮಾತ್ರವಲ್ಲ, ಎದುರಾಳಿಗಳ ಕುಹುಕ ಮಾತಿಗೂ ನಗುವಿನ ಉತ್ತರ ನೀಡುವ ಮೂಲಕ ತಾವೆಷ್ಟು ಕೂಲ್ ಎಂದು ಸಾಬೀತುಪಡಿಸಿದ್ದಾರೆ.
ಆಫ್ರಿಕಾ ಬೌಲರ್ ಗಳಿಗೆ ತಲೆನೋವಾಗಿದ್ದ ರಾಹುಲ್ ರನ್ನು ಮಾರ್ಕೊ ಜೇನ್ಸನ್ ಸ್ಲೆಡ್ಜಿಂಗ್ ಮಾಡಿ ಏಕಾಗ್ರತೆ ಕೆಡಿಸಲು ನೋಡಿದರು. ತನ್ನ ಎಸೆತದಲ್ಲಿ ರಾಹುಲ್ ಚೆಂಡನ್ನು ಬೌಂಡರಿ ಗೆರೆ ದಾಟಿಸುತ್ತಿದ್ದಾಗ ತಾಳ್ಮೆ ಕಳೆದುಕೊಂಡ ಜೇನ್ಸನ್ ಕೈ ಸನ್ನೆ ಮಾಡಿ ರಾಹುಲ್ ಗೆ ಬೈಯ್ದರೂ ರಾಹುಲ್ ಮಾತ್ರ ನಗುತ್ತಲೇ ಪ್ರತಿಕ್ರಿಯಿಸಿ ತಾವೆಷ್ಟು ಕೂಲ್ ಎಂದು ತೋರಿಸಿಕೊಟ್ಟರು. ಪ್ರತಿಯಾಗಿ ತಮ್ಮ ಬ್ಯಾಟ್ ನಿಂದ ಮನಮೋಹಕ ಹೊಡೆತ ಹೊಡೆಯುವ ಮೂಲಕ ಉತ್ತರ ಕೊಟ್ಟರು. ರಾಹುಲ್ ನಗುವಿಗೆ ಮನಸೋತ ಅಭಿಮಾನಿಗಳು ಈಗ ನಮ್ಮ ರಾಹುಲ್ ಎಷ್ಟು ಕೂಲ್ ಎನ್ನುತ್ತಿದ್ದಾರೆ.
