ನವದೆಹಲಿ: ಬಾಲಿವುಡ್ ನಟ ಸೈಫ್ ಅಲಿ ಖಾನ್‌ಗೆ ಚಾಕು ಇರಿತ ಪ್ರಕರಣ ಸಂಬಂಧ ಇಡೀ ಚಿತ್ರರಂಗವನ್ನೇ ಬೆಚ್ಚಿಬೀಳಿಸಿದೆ. ಇದೀಗ ನಟ ಸೈಫ್‌ಗೆ ಬೆನ್ನುನ ಭಾಗಕ್ಕೆ ಚುಚ್ಚಿದ ಚಾಕುವನ್ನು ವೈದ್ಯರು ಶಸ್ತ್ರಚಿಕಿತ್ಸೆ ಮಾಡಿ ಹೊರ ತೆಗೆದಿದ್ದಾರೆ.
ಇದೀಗ ಸಾಮಾಜಿಕ ಜಾಲತಾಣಲದಲ್ಲಿ ಸೈಫ್‌ಗೆ ದೇಹದ ಒಳಗಿದ್ದ ಚಾಕುವಿನ ಫೋಟೋ ವೈರಲ್ ಆಗಿದೆ. ಇದು ಸುಮಾರು 2.5 ಇಂಚಿನ ಚಾಕುವಾಗಿದೆ.
ಬಾಂದ್ರಾ ನಿವಾಸದಲ್ಲಿ ಚಾಕುವಿನಿಂದ ಗಂಭೀರ ಹಲ್ಲೆಗೊಳಗಾದ ಸೈಫ್ ಅವರನ್ನು ಹತ್ತಿರದ ಲೀಲಾವತಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆ ನಡೆಸಿದ ವೈದ್ಯರ ತಂಡ ಸೈಫ್ ಬೆನ್ನಿನ ಭಾಗದಲ್ಲಿ 2.5ಇಂಚಿನ ಚಾಕುವನ್ನು ಹೊರತೆಗೆದಿದ್ದಾರೆ. ಖಾನ್ ಈಗ ಅಪಾಯದಿಂದ ಪಾರಾಗಿದ್ದಾರೆ ಎಂದು ವೈದ್ಯರು ದೃಢಪಡಿಸಿದ್ದಾರೆ.
54 ವರ್ಷದ ಖಾನ್ ಅವರು ತುರ್ತು ಶಸ್ತ್ರಚಿಕಿತ್ಸೆಯ ನಂತರ ಚೇತರಿಕೆಯ ಹಾದಿಯಲ್ಲಿದ್ದಾರೆ ಎಂದು ಲೀಲಾವತಿ ಆಸ್ಪತ್ರೆಯ ವೈದ್ಯರು ತಿಳಿಸಿದ್ದಾರೆ.
ಸುದ್ದಿಗಾರರೊಂದಿಗೆ ಮಾತನಾಡಿದ ಲೀಲಾವತಿ ಆಸ್ಪತ್ರೆಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (ಸಿಒಒ) ಡಾ.ನೀರಜ್ ಉತ್ತಮನಿ, ನಾವು ಬೆನ್ನುಮೂಳೆಯಿಂದ 2.5 ಇಂಚಿನ ಚಾಕುವನ್ನು ತೆಗೆದುಹಾಕಿದ್ದೇವೆ.
ನಟನ ಗಾಯಗಳ ಕುರಿತು ಡಾ.ಉತ್ತಮಣಿ ಅವರನ್ನು ಕೇಳಿದಾಗ, "ಎರಡು ತೀವ್ರ, ಎರಡು ಮಧ್ಯಂತರ ಗಾಯಗಳು ಮತ್ತು ಎರಡು ಸವೆತಗಳಿವೆ" ಎಂದು ಹೇಳಿದರು. ಅವರು ಹೇಳಿದರು, "ಅದೃಷ್ಟವಶಾತ್ ಸೈಫ್ ಅಲಿ ಖಾನ್ ಅವರ ಶಸ್ತ್ರಚಿಕಿತ್ಸೆಯನ್ನು ಚೆನ್ನಾಗಿ ಮಾಡಲಾಗಿದೆ ಎಂದು ನಾವು ನಿಮಗೆ ತಿಳಿಸಲು ಬಯಸುತ್ತೇವೆ. ಅವರು ಚೇತರಿಕೆಯ ಹಾದಿಯಲ್ಲಿದ್ದಾರೆ. ಅವರನ್ನು ICU ಗೆ ಸ್ಥಳಾಂತರಿಸಲಾಗಿದೆ. ಬಹುಶಃ ಒಂದು ಅಥವಾ ಎರಡು ದಿನಗಳಲ್ಲಿ ಅವರನ್ನು ವಾರ್ಡ್‌ಗೆ ಸ್ಥಳಾಂತರಿಸಲಾಗುವುದು.
ಗಾಯಗಳು ಗಂಭೀರವಾಗಿದ್ದವು, ಆದರೆ ಶಸ್ತ್ರಚಿಕಿತ್ಸಕ ತಂಡವು ಕಾರ್ಯವಿಧಾನವನ್ನು ಯಶಸ್ವಿಯಾಗಿ ನಿರ್ವಹಿಸಿತು. ನರಶಸ್ತ್ರಚಿಕಿತ್ಸೆ ಮತ್ತು ಪ್ಲಾಸ್ಟಿಕ್ ಸರ್ಜರಿ ಎರಡನ್ನೂ ನಡೆಸಲಾಗಿದೆ ಎಂದು ಡಾ.ಉತ್ತಮಣಿ ಹೇಳಿದರು.
