ತೆರೆಯ ಮೇಲೆ ಬರಲಿದೆ ಸಿಕ್ಸರ್‌ಗಳ​ ಸರದಾರ ಯುವರಾಜ್‌ ಸಿಂಗ್‌ ಜೀವನಾಧಾರಿತ ಸಿನಿಮಾ

Photo Courtesy X

ಮುಂಬೈ: ಟೀಂ ಇಂಡಿಯಾದ ಯಶಸ್ವಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರ ಬಯೋಪಿಕ್​ ಚಿತ್ರದಂತೆಯೇ ಇದೀಗ ಯುವರಾಜ್ ಸಿಂಗ್‌ ಜೀವನಾಧಾರಿತವು ಚಿತ್ರವಾಗಿ ಮೂಡಿಬರಲು ಸಜ್ಜಾಗಿದೆ.

ಈ ಸುದ್ದಿ ತಿಳಿಯುತ್ತಿದ್ದಂತೆ ಸಿಕ್ಸರ್‌ ಸರದಾರನ ಅಪಾರ ಸಂಖ್ಯೆಯ ಅಭಿಮಾನಿ ಬಳಗ ಜಾಲತಾಣಗಳಲ್ಲಿ ಭಾರೀ ಸಂತಸವನ್ನು ವ್ಯಕ್ತಪಡಿಸಿದೆ.

ಧೋನಿ ಅವರ ಬಯೋಪಿಕ್​ ಅನ್ನು ಹಿಂದಿ ಭಾಷೆಯಲ್ಲಿ ಎಂ.ಎಸ್​. ಧೋನಿ-ದಿ ಅನ್​ಟೋಲ್ಡ್​ ಸ್ಟೋರಿ ಎಂಬ ಶೀರ್ಷಿಕೆಯಡಿ ಬಿಡುಗಡೆಯಾಗಿ ಭಾರಿ ಯಶಸ್ಸು ಕಂಡಿತ್ತು. ಸುಶಾಂತ್‌ ಸಿಂಗ್‌ ರಜಪೂತ್‌ ಅವರು ಧೋನಿ ಅವರ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.

 ಈ ಚಿತ್ರ ನೋಡಿದ ಬಳಿಕ ಬಾಲ್ಯದಿಂದ ಕ್ರಿಕೆಟ್ ವೃತ್ತಿಯವರೆಗೂ ಧೋನಿ ನಡೆದುಬಂದ ಹಾದಿ ಮತ್ತಷ್ಟು ಸ್ಪಷ್ಟವಾಗಿ ತಿಳಿಯಿತು. ಈ ಸಿನಿಮಾ ಅನೇಕರಿಗೆ ಸ್ಪೂರ್ತಿ ಕೂಡ ತುಂಬಿತು. ಸದ್ಯ ಇದೇ ರೀತಿ ಈಗ ಯುವರಾಜ್ ಸಿಂಗ್​ ಅವರ ಜೀವನಾಧಾರಿತ ಚಿತ್ರ ತಯಾರಿಗೆ ಸಕಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗುತ್ತಿದೆ.

2011ರ ವಿಶ್ವಕಪ್​ ಹೀರೋ ಯುವಿ ಪಾತ್ರದಲ್ಲಿ ಯಾವ ಚಿತ್ರರಂಗದ ಸ್ಟಾರ್​ ನಟ ನಟಿಸಬಹುದು ಎಂಬ ಪ್ರಶ್ನೆಗಳು ಇದೀಗ ಭಾರೀ ಚರ್ಚೆಯಾಗುತ್ತಿದೆ. ಒಟ್ಟಾರೆ ಯುವರಾಜ್ ಸಿಂಗ್​ ಅವರ ಬಾಲ್ಯ, ಕಷ್ಟದ ದಿನಗಳು, ಗೆಲುವಿನ ಹಾದಿ ಹೇಗಿತ್ತು ಎಂಬುದನ್ನು ಬೆಳ್ಳಿ ಪರದೆಯ ಮೇಲೆ ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಕಾತರದಿಂದ ಕಾಯತೊಡಗಿದ್ದಾರೆ.

ಚಿತ್ರಕ್ಕೆ ಇನ್ನಷ್ಟೇ ಹೆಸರು ಇಡಬೇಕಿದೆ. ಚಿತ್ರದಲ್ಲಿ ಯುವಿ ಅವರ ಕ್ರಿಕೆಟ್‌ ವೃತ್ತಿಬದುಕಿನ ಏಳು ಬೀಳುಗಳ ಬಗ್ಗೆ ಬೆಳಕು ಚೆಲ್ಲಲಿದೆ.