ಪ್ರತಿ ವರ್ಷದ ಫೆಬ್ರವರಿ ತಿಂಗಳನ್ನು ಪ್ರೇಮಿಗಳಿಗಾಗಿಯೇ ಮೀಸಲಿಡಲಾಗಿದೆ. ಜಾತಿ, ಮತ, ಧರ್ಮಗಳ ಬೇಧವಿಲ್ಲದೇ ಪ್ರೇಮಿಗಳು ಆಚರಿಸುವ ಹಬ್ಬ ಇದಾಗಿದೆ. ಫೆಬ್ರವರಿ 7 ರಿಂದಲೇ ರೋಸ್ ಡೇ ಎಂದು ಆರಂಭವಾಗುವ ಈ ವ್ಯಾಲಂಟೈನ್ಸ್‌ ಡೇ ಫೆಬ್ರವರಿ 14 ರಂದು ಮುಗಿಯುತ್ತದೆ. ಯುವಕ ಯುವತಿಯರು ಈ ದಿನಕ್ಕಾಗೇ ಕಾದು ತಮ್ಮ ಪ್ರೀತಿಯನ್ನು ನಿವೇದಿಸಿಕೊಳ್ಳುತ್ತಾರೆ ಮತ್ತು ತಮ್ಮ ಹುಡುಗ ಅಥವಾ ಹುಡುಗಿಗೆ ಇಷ್ಟವಾಗುವ ಉಡುಗೊರೆಗಳನ್ನು ಕೊಟ್ಟು ಜೊತೆಯಲ್ಲಿ ಸಮಯವನ್ನು ಕಳೆಯುತ್ತಾರೆ.
ಪ್ರೇಮಿಗಳ ಈ ದಿನವನ್ನು ಸುಂದರವಾಗಿಸಲು ಮತ್ತು ನಿಮ್ಮ ಅತಿ ದೊಡ್ಡ ದಿನವನ್ನು ಅವಿಸ್ಮರಣೀಯವನ್ನಾಗಿಸಲು ನಾವು ಕೆಲವೊಂದು ಹಾಡುಗಳನ್ನು ಸೂಚಿಸಿದ್ದೇವೆ. ನಿಮ್ಮ ಪ್ರೇಮಿಯೊಂದಿಗೆ ಈ ರೋಮ್ಯಾಂಟಿಕ್ ಹಾಡುಗಳನ್ನು ಕೇಳುತ್ತಾ ನಿಮ್ಮ ದಿನವನ್ನು ಆನಂದಿಸಿ.
ಮೊದಲನೆಯದಾಗಿ 'ದಿಲ್‌ವಾಲೆ' ಚಿತ್ರದ 'ಗೇರುವಾ' ಹಾಡು. ಈ ಹಾಡು ಅರಿಜಿತ್ ಸಿಂಗ್ ಮತ್ತು ಅಂತಾರಾ ಮಿತ್ರ ಅವರ ಧ್ವನಿಯಲ್ಲಿ ಕೇಳಲು ಹಿತವಾಗಿದ್ದರೆ ಅದರಲ್ಲಿರುವ ಐಸ್‌ಲ್ಯಾಂಡ್‌ನ ಮನಮೋಹಕ ದೃಶ್ಯಗಳು ನೋಡಲು ಸಹ ಅಷ್ಟೇ ಸುಂದರವಾಗಿದೆ. ಇದರ ಹೊರತಾಗಿ ಹಿಂದೆ ಉತ್ತಮ ಜೋಡಿ ಎಂದೇ ಹೆಸರಾಗಿರುವ ಕಾಜೋಲ್ ಮತ್ತು ಶಾರುಖ್ ಈ ಹಾಡಿನಲ್ಲಿರುವುದರಿಂದ ನಮ್ಮ ಮೊದಲ ಆಯ್ಕೆ ಇದಾಗಿದೆ.
ಫೆಬ್ರವರಿ 12 ರಂದು ಬಿಡುಗಡೆಯಾಗುತ್ತಿರುವ ಚಿತ್ರ 'ವಿ-ಡೇ' ಯ 'ಯೇ ಫಿತೂರ್ ಮೆರಾ' ಹಾಡನ್ನು ನೋಡಲೇ ಬೇಕು. ಈ ಹಾಡನ್ನೂ ಸಹ ಅರಿಜಿತ್ ಸಿಂಗ್ ಹಾಡಿದ್ದು, ಹಾಡಿನಲ್ಲಿ ಆದಿತ್ಯ ರಾಯ್ ಕಪೂರ್ ಮತ್ತು ಕತ್ರಿನಾ ಕೈಫ್ ಜೊತೆಯಲ್ಲಿ ಕಾಣಿಸಿಕೊಂಡಿದ್ದಾರೆ.
ಕಳೆದ ವರ್ಷ 2017 ರಲ್ಲಿ ಎಲ್ಲಾ ಪ್ರಶಸ್ತಿಗಳನ್ನು ಬಾಚಿಕೊಂಡ ಚಿತ್ರ 'ಬಾಜಿರಾವ್ ಮಸ್ತಾನಿ'. ಈ ಚಿತ್ರದ 'ದಿವಾನಿ ಮಸ್ತಾನಿ' ಹಾಡನ್ನು ಯಾರು ತಾನೇ ಮರೆಯಲು ಸಾಧ್ಯ? ಸುಂದರವಾಗಿ ಕಾಣಿಸಿಕೊಂಡಿರುವ ದೀಪಿಕಾ ಪಡುಕೋಣೆ, ಅಷ್ಟೇ ಸುಂದರವಾದ ಸೆಟ್ ಮತ್ತು ಚಿತ್ರೀಕರಣ. ಈ ಹಾಡು ನಿಮ್ಮ ದಿನವನ್ನು ಸುಂದರವಾಗಿಸುವುದರಲ್ಲಿ ಸಂಶಯವೇ ಇಲ್ಲ, ಹಾಗಾಗಿ ನಮ್ಮ ಪಟ್ಟಿಯಲ್ಲಿ ಈ ಹಾಡೂ ಸಹ ಸೇರಿಕೊಳ್ಳುತ್ತದೆ.
ತಮ್ಮ ಜೀವನದ ಕಠಿಣ ಸಮಯವನ್ನು ಎದುರಿಸುತ್ತಿರುವ ಪ್ರೇಮಿಗಳಿಗಾಗಿ ನಾವು ಸೂಚಿಸುತ್ತಿರುವ ಹಾಡು 'ತಮಾಷಾ' ಚಿತ್ರದ 'ಅಗರ್ ತುಮ್ ಸಾತ್ ಹೋ'. ಮಾಜಿ ಪ್ರೇಮಿಗಳಾದ ರಣಬೀರ್ ಕಪೂರ್ ಮತ್ತು ದೀಪಿಕಾ ಪಡುಕೋಣೆ ಅಭಿನಯಿಸಿರುವ ಈ ಹಾಡು ನಿಮ್ಮ ಹಲವು ನೆನಪುಗಳನ್ನು ಕಣ್ಣು ಮುಂದೆ ತರುವುದರಲ್ಲಿ ಯಾವುದೇ ಸಂಶಯವಿಲ್ಲ.
ನಾವು ನಿಮಗಾಗಿ ಸೂಚಿಸುತ್ತಿರುವ ಕೊನೆಯ ಹಾಡು 'ಆಶಿಖಿ-2' ಚಿತ್ರದ 'ತುಮ್ ಹಿ ಹೋ'. ಆದಿತ್ಯ ರಾಯ್ ಕಪೂರ್ ಮತ್ತು ಶೃದ್ಧಾ ಕಪೂರ್ ಅಭಿನಯಿಸಿರುವ ಹಾಗೂ ಜನಪ್ರಿಯ ಗಾಯಕ ಅರಿಜಿತ್ ಸಿಂಗ್ ಹಾಡಿರುವ ರೋಮ್ಯಾಂಟಿಕ್ ಗೀತೆ ಇದಾಗಿದೆ. ಚಿತ್ರ ಬಿಡುಗಡೆಯಾಗಿ 4-5 ವರ್ಷಗಳಾದರೂ ಕೂಡ ಈ ಚಿತ್ರದ ಹಾಡುಗಳು ಇನ್ನೂ ಜನರ ಮನಸ್ಸಿನಲ್ಲಿ ಅಚ್ಚಳಿಯದೆ ಹಾಗೆಯೇ ಉಳಿದುಕೊಂಡಿದೆ. ಪ್ರೇಮಿಗಳ ದಿನದಂತಹ ರೋಮ್ಯಾಂಟಿಕ್ ದಿನಕ್ಕೆ ಈ ರೋಮ್ಯಾಂಟಿಕ್ ಗೀತೆಯನ್ನು ನಮ್ಮ ಪಟ್ಟಿಗೆ ಸೇರಿಸುತ್ತಿದ್ದೇವೆ. ಪ್ರೇಮಿಗಳ ದಿನದಂದು ಈ ಹಾಡುಗಳನ್ನು ನೋಡಿ ಮತ್ತು ಕೇಳಿ ನಿಮ್ಮ ದಿನವನ್ನು ಅವಿಸ್ಮರಣೀಯವಾಗಿಸಿಕೊಳ್ಳಿ.