ಹೈದರಾಬಾದ್: ಸಾನಿಯಾ ಮಿರ್ಜಾ ಮತ್ತು ಶೊಯೇಬ್ ಮಲಿಕ್ ದಂಪತಿ ಇತ್ತೀಚೆಗಷ್ಟೇ ಗಂಡು ಮಗುವಿಗೆ ಜನ್ಮವಿತ್ತಿದ್ದಾರೆ. ಆದರೆ ಟೆನಿಸ್ ಬೆಡಗಿಯ ಪುತ್ರ ಯಾರ ಹಾಗಿರಬಹುದು, ಹೇಗಿರಬಹುದು ಎಂದು ಅಭಿಮಾನಿಗಳಿಗೆ ಭಾರೀ ಕುತೂಹಲವಿತ್ತು.
ಆ ಕುತೂಹಲಕ್ಕೆ ಇದೀಗ ಸಾನಿಯಾ-ಶೊಯೇಬ್ ದಂಪತಿ ತೆರೆ ಎಳೆದಿದ್ದಾರೆ. ಸಾನಿಯಾ ಮೊನ್ನೆಯಷ್ಟೇ ಪುತ್ರನೊಂದಿಗೆ ಮುಂಬೈ ವಿಮಾನ ನಿಲ್ದಾಣದಲ್ಲಿ ಕಾಣಿಸಿಕೊಂಡಾಗ ಕ್ಯಾಮರಾ ಕಣ್ಣುಗಳು ಬೇಬಿ ಇಝಾನ್ ಫೋಟೋ ತೆಗೆಯಲು ಹರಸಾಹಸಪಟ್ಟಿದ್ದವು. ಆದರೆ ಸಾನಿಯಾ ಯಾರಿಗೂ ಮಗುವಿನ ಮುಖ ಕಾಣದಂತೆ ಕವರ್ ಮಾಡಿದ್ದರು.
ಆದರೆ ಇದೀಗ ಸಾನಿಯಾ ಹಾಗೂ ಶೊಯೇಬ್ ತಮ್ಮ ಸಾಮಾಜಿಕ ಜಾಲತಾಣ ಪುಟದಲ್ಲಿ ಮಗುವಿನ ಫೋಟೋ ಹಾಕಿದ್ದು, ಸೆಲೆಬ್ರಿಟಿಗಳು, ಅಭಿಮಾನಿಗಳು ಸೇರಿದಂತೆ ಸಾವಿರಾರು ಮಂದಿ ಲೈಕ್ ಮಾಡಿದ್ದಾರೆ.
ಥೇಟ್ ಸಾನಿಯಾರನ್ನೇ ಹೋಲುವ ಗುಂಡು ಗುಂಡಗಿನ ಮಗುವಿನ ಫೋಟೋ ನೋಡಿ ಪ್ರಿಯಾಂಕ ಚೋಪ್ರಾ, ನೇಹಾ ದುಪಿಯಾ ಸೇರಿದಂತೆ ಸೆಲೆಬ್ರಿಟಿಗಳು ಎಷ್ಟು ಮುದ್ದಾಗಿದೆ ಎಂದು ಕಾಮೆಂಟ್ ಮಾಡಿದ್ದಾರೆ. ಅಭಿಮಾನಿಗಳೂ ಈಗ ಅದನ್ನೇ ಹೇಳುತ್ತಿದ್ದಾರೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್ ದುನಿಯಾ ಮೊಬೈಲ್ ಆಪ್ ಡೌನ್ ಲೋಡ್ ಮಾಡಿ