ವೈವಿಧ್ಯಮಯ ರೈಸ್ ಬಾತ್‌ಗಳನ್ನು ದಿನನಿತ್ಯ ನಾವು ಸೇವಿಸುತ್ತಲೇ ಇರುತ್ತೇವೆ. ಆದರೆ ಜೀರಾ ರೈಸ್‌ನ ರುಚಿಯೇ ಬೇರೆ ತರಹದ್ದಾಗಿದೆ. ಮಾಡಲೂ ಸುಲಭವಾದ ಜೀರಾ ರೈಸ್ ಮನೆಯಲ್ಲಿ ಹೇಗೆ ಮಾಡಬಹುದು ಎಂದು ತಿಳಿಸಿಕೊಡ್ತೀವಿ.. ನೀವೂ ಒಮ್ಮೆ ಟ್ರೈ ಮಾಡಿ ನೋಡಿ..
ತಯಾರಿಸಲು ಬೇಕಾಗುವ ಸಾಮಗ್ರಿಗಳು :
* ಭಾಸುಮತಿ ಅಕ್ಕಿ 1 ಕಪ್
* ಎಣ್ಣೆ 1 ಚಮಚ
* ರುಚಿಗೆ ತಕ್ಕಷ್ಟು ಉಪ್ಪು
* ತುಪ್ಪ 2 ಚಮಚ
* ಜೀರಿಗೆ 2 ಚಮಚ
* ಕೊತ್ತಂಬರಿ ಸೊಪ್ಪು ಸ್ವಲ್ಪ
* ಅಕ್ಕಿ ಬೇಯಿಸಲು ನೀರು 5 ಕಪ್
ತಯಾರಿಸುವ ವಿಧಾನ :
ಮೊದಲು ಭಾಸುಮತಿ ಅಕ್ಕಿಯನ್ನು 20 ನಿಮಿಷಗಳ ಕಾಲ ನೀರಿನಲ್ಲಿ ನೆನೆಸಿಡಬೇಕು. ನಂತರ ಒಂದು ಬಾಣಲೆಯನ್ನು ತೆಗೆದುಕೊಂಡು ಬಾಣಲೆಗೆ 5 ಕಪ್ ನೀರನ್ನು ಹಾಕಿ ಆ ನೀರಿಗೆ ಉಪ್ಪು ಮತ್ತು ಎಣ್ಣೆಯನ್ನು ಹಾಕಿ ನೀರನ್ನು ಕುದಿಸಬೇಕು. ನಂತರ ನೆನೆಸಿದ ಅಕ್ಕಿಯ ನೀರನ್ನೂ ತೆಗೆದು ಕುದಿಯುತ್ತಿರುವ ನೀರಿಗೆ ಹಾಕಬೇಕು. ಅದನ್ನು 8 ರಿಂದ 10 ನಿಮಿಷ ಬೇಯಿಸಬೇಕು. ನಂತರ ಹೆಚ್ಚಿನ ನೀರನ್ನು ಜರಡಿಯನ್ನು ಉಪಯೋಗಿಸಿ ಬಸಿಯಬೇಕು.
ಇದನ್ನು ಮಾಡುವುದರಿಂದ ಅನ್ನ ಉದುರಾಗಿರುತ್ತದೆ. ನಂತರ ಬಾಣಲೆಗೆ 2 ಚಮಚ ತುಪ್ಪವನ್ನು ಹಾಕಿ ಅದು ಬಿಸಿಯಾದಾಗ ಅದಕ್ಕೆ ಜೀರಿಗೆಯನ್ನು ಹಾಕಿ ಹುರಿಯಬೇಕು. ನಂತರ ಅದಕ್ಕೆ ಅನ್ನವನ್ನು ಹಾಕಿ ಮಿಶ್ರಣ ಮಾಡಬೇಕು. ನಂತರ 1/4 ಚಮಚದಷ್ಟು ಉಪ್ಪನ್ನು ಹಾಕಿ ಮಿಶ್ರಣ ಮಾಡಬೇಕು. ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪನ್ನು ಹಾಕಿದರೆ ರುಚಿಯಾದ ಸುಲಭವಾಗಿ ಮಾಡಬಹುದಾದ ಜೀರಾ ರೈಸ್ ಸವಿಯಲು ಸಿದ್ಧ. ಇದರೊಂದಿಗೆ ದಾಲ್ ಫ್ರೈಯನ್ನೂ ತಯಾರಿಸಿಕೊಂಡು ಸವಿದರೆ ಇನ್ನೂ ರುಚಿ ಜಾಸ್ತಿ..
