ಭೋಪಾಲ್ : ವ್ಯಕ್ತಿಯೊಬ್ಬ ಮದ್ಯಕ್ಕೆ 200 ರೂ. ಹಣ ನೀಡದ ಕಾರಣ ಲಿವ್-ಇನ್ ರಿಲೆಷನ್ಶಿಪ್ನಲ್ಲಿದ್ದ ಗೆಳತಿಯ ಮೂಗನ್ನು ಕೊಡಲಿಯಿಂದ ಕತ್ತರಿಸಿದ ಘಟನೆ ಮಧ್ಯಪ್ರದೇಶದ ಖಾಂಡ್ವಾ ಜಿಲ್ಲೆಯ ಬಮಂಗಾವ್ನಲ್ಲಿ ನಡೆದಿದೆ.
ಸೋನು (35) ಹಲ್ಲೆಗೊಳಗಾದ ಮಹಿಳೆ. ಸೋನು ತನ್ನ ಪ್ರೇಮಿ ಲವಕುಶ್ ಜೊತೆ 2 ವರ್ಷ ಲಿವ್-ಇನ್ ರಿಲೆಷನ್ಶಿಪ್ನಲ್ಲಿದ್ದಳು. ಮಹಿಳೆಯ ಪತಿ 8 ವರ್ಷಗಳ ಹಿಂದೆಯೇ ಸಾವನ್ನಪ್ಪಿದ್ದನು.
ಆ ಬಳಿಕದಿಂದ ಆಕೆ ಹೊಲ-ಗದ್ದೆಯಲ್ಲಿ ಕೆಲಸ ಮಾಡುತ್ತಾ ತನ್ನ ಜೀವನವನ್ನು ಸಾಗಿಸುತ್ತಿದ್ದಳು. ಆದರೆ ಆಕೆಯ ಪ್ರೇಮಿ ಸದಾ ಮದ್ಯದ ಅಮಲಿನಲ್ಲಿರುತ್ತಿದ್ದು, ಯಾವುದೇ ಕೆಲಸ ಕಾರ್ಯವಿಲ್ಲದೆ ಅಲೆದಾಡುತ್ತಿದ್ದನು.
ಶನಿವಾರ ಬೆಳಗ್ಗೆ ಮದ್ಯದ ಅಮಲಿನಲ್ಲಿದ್ದ ಆತ, ಮತ್ತೆ ಕುಡಿಯಲು ಅವಳ ಹತ್ತಿರ ಹಣ ಕೇಳಿದ್ದಾನೆ. ಆದರೆ ಸೋನು ಕೂಲಿಗಾಗಿ ಅವರಿವರ ಜಮೀನಿನಲ್ಲಿ ಕೆಲಸ ಮಾಡುತ್ತಿದ್ದು, ಅವಳ ಜೀವನ ದುಡಿದ ಕೂಲಿಯ ಮೇಲೆ ನಡೆಯುತ್ತಿತ್ತು.
ಆದ ಕಾರಣ ಪ್ರೇಮಿಗೆ ಹಣ ಕೊಡಲು ಆಕೆ ನಿರಾಕರಿಸಿದ್ದಾಳೆ. ಇದರಿಂದ ಸಿಟ್ಟಿಗೆದ್ದ ಲವಕುಶ್ ಅಲ್ಲೇ ಇದ್ದ ಕೊಡಲಿ ತೆಗೆದುಕೊಂಡು ಆಕೆಯ ಮೂಗನ್ನು ಕತ್ತರಿಸಿ ಬಿಟ್ಟಿದ್ದಾನೆ.
ಘಟನೆಯಿಂದ ಗಂಭೀರಗಾಯಗೊಂಡ ಮಹಿಳೆಯನ್ನು ಸ್ಥಳೀಯ ನಿವಾಸಿಗಳು ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ಕೊಡಿಸಿದ್ದಾರೆ.