ಮದುವೆ ಡ್ರೆಸ್ ಕದಿಯಲು ಮಹಿಳೆಯನ್ನು ಕೊಲೆ ಮಾಡಿದ ದಂಪತಿ!

ನೋಯ್ಡಾ: ಯಾವುದೆಲ್ಲಾ ಕಾರಣಕ್ಕೆ ಕೊಲೆ ನಡೆಯುತ್ತದೆ ಎಂದು ಈ ಘಟನೆ ಓದಿದರೆ ಅಚ್ಚರಿಯಾಗುತ್ತದೆ. ಇಲ್ಲೊಬ್ಬ ದಂಪತಿ ಮದುವೆಯ ಬೆಲೆ ಬಾಳುವ ಡ್ರೆಸ್ ಕದಿಯಲು ತಮ್ಮ ಬಂಧುವನ್ನೇ ಕೊಲೆ ಮಾಡಿದ್ದಾರೆ.

ಇದು ನಡೆದಿರುವುದು ಉತ್ತರ ಪ್ರದೇಶದ ಗಾಝಿಯಾಬಾದ್ ನಲ್ಲಿ. ಕೊಲೆಯಾದ 25 ವರ್ಷದ ಮಹಿಳೆ ಮಾಲಾ ಗುಪ್ತಾ ಎರಡು ವರ್ಷಗಳ ಹಿಂದೆ ಕುಟುಂಬದವರ ವಿರೋಧದ ನಡುವೆ ಮದುವೆಯಾಗಿದ್ದಳು. ಮದುವೆ ಬಳಿಕ ಇವರಿಬ್ಬರೂ ಗಾಝಿಯಾಬಾದ್ ನ ಅಪಾರ್ಟ್ ಮೆಂಟ್ ಒಂದರ ಎರಡನೇ ಮಹಡಿಯಲ್ಲಿ ವಾಸವಿದ್ದರು.

ಅದೇ ಅಪಾರ್ಟ್ ಮೆಂಟ್ ನ ಒಂದನೇ ಮಹಡಿಯಲ್ಲಿ ವಾಸವಿದ್ದ ಇವರ ಬಂಧುಗಳೆನಿಸಿಕೊಂಡ ಆರೋಪಿ ದಂಪತಿ ಸೌರವ್ ದಿವಾಕರ್ ಮತ್ತು ರಿತು ನೆಂಟಸ್ತನ ನೆಪದಿಂದ ಕೊಲೆಗೀಡಾದ ಮಹಿಳೆ ಮಾಲಾ ಮನೆಗೆ ಬಂದಿದ್ದರು. ಈ ವೇಳೆ ಮಾಲಾ ತನ್ನ ಮದುವೆಯ ಸಂದರ್ಭದಲ್ಲಿ ತೊಟ್ಟುಕೊಂಡಿದ್ದ ಬೆಲೆ ಬಾಳುವ ಉಡುಪುಗಳನ್ನು ಇವರಿಗೆ ತೋರಿಸಿದ್ದಳು.

ಈ ವೇಳೆ ದುಬಾರಿ ಬೆಲೆಯ ಡ್ರೆಸ್ ನೋಡಿ ದುರಾಸೆಗೊಳಗಾದ ದಂಪತಿ ಮರುದಿನ ಮಾಲಾಳನ್ನು ಊಟದ ನೆಪದಲ್ಲಿ ತಮ್ಮ ಮನೆಗೆ ಕರೆದೊಯ್ದು ಕೊಲೆ ಮಾಡಿದ್ದಾರೆ. ಬಳಿಕ ಮಾಲಾ ಇರುವ ಫ್ಲ್ಯಾಟ್ ಗೆ ತೆರಳಿ ಎರಡು ಸೂಟ್ ಕೇಸ್ ತೆಗೆದುಕೊಂಡು ಒಂದರಲ್ಲಿ ಬೆಲೆ ಬಾಳು ಡ್ರೆಸ್ ಗಳನ್ನು ತುಂಬಿದ್ದಾರೆ. ಇನ್ನೊಂದು ಸೂಟ್ ಕೇಸ್ ನ್ನು ಮನೆಗೆ ತಂದು ಮಾಲಾ ಮೃತದೇಹವನ್ನು ತುಂಬಿ ಗಾಝಿಯಾಬಾದ್ ನ ನಡುರಸ್ತೆಯೊಂದರಲ್ಲಿ ಎಸೆದು ಪರಾರಿಯಾಗಲು ಯತ್ನಿಸಿದ್ದಾರೆ. ಆದರೆ ಇದೀಗ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದು ತಪ್ಪೊಪ್ಪಿಕೊಂಡಿದ್ದಾರೆ.

ತಾಜಾ ಸುದ್ದಿಗಳನ್ನು ಓದಲು ವೆಬ್ ದುನಿಯಾ ಮೊಬೈಲ್ ಆಪ್ ಡೌನ್ ಲೋಡ್ ಮಾಡಿಕೊಳ್ಳಿ.